【港童開學記】遠離填鴨 移民台灣

　　為了小朋友的教育，家長們可以去到幾盡？古有孟母三遷，今有兩對父母為了讓小朋友擺脫填鴨式教育，不惜移民台灣，尋找另類教育，讓孩子快樂學習。

　　80後港人夫婦Cass和Warren，放棄合共7萬月薪全職湊仔兩年。去年為了讓小朋友接受主張戶外學習和主題式教學的森林教育，以投資移民方式搬到桃園，開設港式茶記維生；前傳媒人天爸和天媽，認同華德福教學理念，3年前與台南華德福校長一見如故，共建華德福學校，讓小朋友接受沒有課本的教育。今年5月創辦親子共學館，望推廣親職友善的環境。

　　在香港，另類教育屬異數，華德福教育、蒙特梭利教育法、森林教育等並不普及，師資短缺，學位少之餘，每年學費逾十萬港元。移民台灣逾30年的港人羅寶鴻（Henry）是蒙特梭利教育專家，主張以有限度的自由和紀律，營造一個適合小朋友生理和心理需要的環境去學習和發展。他經營Facebook個人專頁有近4萬粉絲追蹤，不時接獲和解答港人家長的查詢，大嘆香港另類教育資源不足夠。心繫香港的他亦揚言，將來如有好的發展機會，不排除回流發展，在港推廣另類教育法。

桃園直擊：夫婦棄高薪 攜子赴桃園 讀森林學校 悟真正快樂

　　與台北相隔一小時的車程的桃園，沒台北般繁華，帶點樸素原始味道。卻吸引這對80後的港人夫婦Cass和Warren，去年舉家移民到桃園，為了讓兒子接受森林教育。

80後港人夫婦Cass和Warren，為了讓小朋友接受森林教育，去年舉家移民到桃園，更在當地開餐廳做生意維生。

　　今年5月上旬，記者到訪桃園，沿路人煙稀少，鄉郊味濃，即使從桃園高鐵站乘坐的士入內，亦要將近40分鐘才到達Cass和Warren開設的港式茶記，當時他們正值忙著籌備搬新店，幸仍能與記者見上一面。Cass是一位測量師，Warren則曾任職泰國旅遊局，2014年兩人放棄合共7萬元月薪的全職工作，投身全職爸媽行列，為的就是陪伴孩子成長。

對港填鴨式教育絕望

　　育有兩子分別6歲及4歲的Cass和Warren，曾任全職爸媽兩年，卻因為要為大仔挑選小學，萌生移民台灣念頭。當時他們去了心儀的香港小學觀課，老師正在教常識科公園的主題，Cass說道，「老師成堂喺度播放有關公園的幻燈片和相，話俾小朋友聽呢個係涼亭，公園有樹、有滑梯，亦播放雀仔聲，成堂裏面就係好抽象咁樣同你講咩叫公園，但其實學校出面就有一個好大的公園。」

　　除了教學模式一成不變，令Warren驚訝的是，就連創意題都有標準答案，「當時老師問完一條創意題題目就話，『如果大家無咩頭緒或者唔識，其實呢條橫線可以填呢幾個字』，原來創意題最後都有一個Model answer。」觀課後，夫婦二人均認為香港的填鴨式教育未必適合兒子，遂萌生起報讀另類學校念頭。

　　「當時我們都有睇過香港華德福學校、自然學校等，但聽講好多香港華德福學校模式都係參考台灣，所以最後都覺得不如去台灣試一試。」2016年暑假，Cass和Warren帶同兒子去台灣兩星期，到過花蓮、苗栗、桃園實地考察，參觀位於桃園的諾瓦創意學校時，兩人被其教學模式深深吸引，「它無課本，無分科，以玩樂形式去學習，最勁嘅係成績表內唔會有分數，唔會有數字，只會寫上鼓勵說話或評語，這樣對小朋友的影響來得更正面和重要。」

創意考試玩得又學得

　　森林學校考試模式差別更大，皆因就連學生和家長都不知道確實的考試日期，考核的形式亦不是紙筆答題，「考試模式可能係老師同學生講玩一個野外定向比賽，憑住課堂學嘅嘢和線索去搵Checkpoint。目的是透過『考試』睇下小朋友有無學唔到或者Miss咗某些內容，而唔係考核小朋友的能力。」如果某些題目都大多學生都不懂得解決，或許是教學上的問題，「換轉我們以前讀書，如果有大半班同學肥佬，老師會叫我們罰企。上過自然學校的私訓班後，其實學生考得差，應該老師反省，會唔會係老師教得唔好呢？」

　　惟私立的諾瓦小學學費不便宜，要入讀前家長亦要先與創辦人面試，這曾令夫婦二人卻步。普遍台灣家長在翌年1月先開始約面談，鑑於Cass和Warren早在暑假前已經到台灣實地考察，早著先機，後來他們決定博一博，先面試，後決定移民與否。兩人仍記得與創辦人會面3小時的畫面，既要畫家族樹（Family tree），被問及父母、祖父母等血型、星座、學歷、婚姻狀況等資料，亦要交代自己的個人成長發展史，以及兩人由拍拖到結婚的歷程，「因為森林教育的理念是，原生家庭非常影響個人的成長。」雖然Warren笑指自己只能夠答得出自己的血型，就連父母的星座、血型都不清楚，「面試完結後，我們講笑話可唔可以Copy返呢幾張紙，因為過程中都了解多咗自己，亦未試過睇得咁清楚成個家族。」Cass補充道，「其實父母的背景，平時點樣教我們，好影響我們今時今日點樣教小朋友。」

戶外教學從生活學習

　　直至兒子獲取錄後，兩人本著一試無妨的心態，豁出去移民台灣，「當時我哋仲做緊全職爸爸媽媽，即使唔移民，在香港亦要出返嚟做嘢，因為我們唔係Plan退休，無收入呢種生活唔可以長此落去。與其在香港原地踏步，兩個出返嚟做嘢，請工人姐姐湊小朋友，倒不如試下一家人過來呢邊（台灣）生活。」

搬到台灣後，一家人不時趁假日去島內小旅行。

　　兒子就讀的學校行活動及主題式教學，不設課本，平日上堂靠小朋友自行畫底所教的內容，「雖然老師唔會捉住他們隻手，喺Copybook度寫字，但小朋友會自己寫喺本簿，用圖畫形式去記。整個過程小朋友參與其中，亦會做好多唔同實驗，好投入。」每月亦有一次戶外教學，如露營、日營或島內小旅行等。Cass指出，最欣賞是戶外教學背後的理念，例如一年級課題是台灣火車鐵道，「因為小朋友唔識睇錶，成日問火車幾時到，上完Field trip後就返去學睇鐘，學時鐘的概念。」

　　大仔和細仔入讀森林學校後，兩人都較以往活潑，腦筋亦轉得比以往快，「來台灣前，他們連一句國語都唔識講，返學返咗兩個月已經可以跟其他小朋友溝通。」Warren笑指，兒子現時喜歡上學，每朝更會自動自覺刷牙、洗面，「因為他們返學真係好開心，幼稚園無功課，連字都唔洗寫，但他們會睇好多書，老師也會教他們好多知識。」

從天賦決定發展路向

　　移民台灣，讓小朋友接受體制外的教育，談何容易。回望過去，夫婦二人坦言，如非因為過去有全職父母的經驗，未必那麼容易踏出舒適圈。選擇這條新的教育路，他們亦遇過不少香港家長和朋友質疑︰「你細細個畀小朋友讀呢啲學校，大學你諗住送佢出國讀書嗎？英文點算呀？」「台灣大學唔係咁多國家認可㗎喎。」兩人認為與其教小朋友答問題，訓練其解難能力更為重要，「倒不如訓練小朋友從小點樣（自己）去搵答案，自己解決，識得面對逆境和解決問題。」加上科技發達，若小朋友想學習一種外語或吸收新資訊，其實上網「Google一下」已經有答案，「解難能力、自信心重要過小朋友今日識得幾多詞語和識得幾多英文文法。」

兩夫婦認為，讓子女快樂學習和生活最重要。

　　Cass和Warren都是傳統教育下的產物，以往讀完A-Level就揀科，視乎將來「錢途」、社會因素去選擇大學讀甚麼，而非選擇自己有興趣的科目，「我們行過呢一步，就係唔想小朋友再行，他們找到自己有興趣、鍾意的內容，學習開心愉快最重要，就算唔讀大學都無問題。」他們認為，為人父母，最重要就是認清自己子女的能力和興趣，「做父母就是要認清楚，你的小朋友係一條魚，定係一隻馬騮。如果你知佢係一隻馬騮，就唔會逼佢游水。好多家長想小朋友樣樣都叻，樣樣都試下，覺得小朋友游水游得叻，就不如試下爬樹、跳遠，咩都學啲就唔會執輸，忘記了小朋友本身的天賦。」

兒子製作陶瓷時，老師會教他們分辨泥的特性和種類外，亦會教他們如何控制泥的比例，從中灌輸數學的比例概念。

何謂「森林教育」？

　　主張主題式教學，摒棄課本，透過「旅行」、戶外教學方式參觀和學習，在經驗中獲取知識，從而培養其解難、社交、環境適應能力，以及自信和積極人生觀。

投資移民 開港式茶記 放手一博

　　80後的夫婦Cass和Warren，去年移民台灣後，在桃園龍潭區開港式茶記——NEXT STOP 香港.手作料理。最初考慮移民，為了小朋友能接受更好的教育外，亦有考慮到大人如何維生，「我們辦投資移民，一定要做生意，唔係純粹小朋友開心和讀書好就得，亦要考慮大人點樣維生。」鑑於丈夫是從事Marketing工作，而妻子Cass任測量師，兩人來到台灣後無其他技能，認為「煮嘢食都幾開心」，遂放手一試，開餐廳創業。

今年5月，他們搬到同區較大店舖內繼續經營港式茶記，新舖樓高兩層，可容納更多客人之餘，營業時間亦有所延長。

　　餐廳位於龍潭區內，在公路旁的貨櫃屋內，舊舖黃色的貨櫃箱外形非常搶眼和易認。店內主打黯然銷魂飯、冰火菠蘿包（即雪糕菠蘿包）和粒粒西多士。未曾經營過飲食業的他們，不斷上網尋食譜，笑指當試勻所有食譜後，就能創作自己的食譜，「試第一次唔好，第十次應該差唔多，到第20次應該可以見得吓人。」

店內的招牌特色菜——粒粒西多士。

沒有包袱的港式菜單

　　最初經營餐廳時，兩人由廚房、收銀、樓面一腳踢，後來餐廳生意慢慢上軌道才聘請員工幫忙。沒有大廚包袱的Cass和Warren，有時想到甚麼就試甚麼，以西多士為例，Cass認為食西多士時，經常吃到中間位置，就覺得西多士不夠脆，故不時嘗試製作不同形狀的西多，有時切下三角形，有時切下正方形，「西多士最好食係條邊，我們有一款西多士係切到一粒粒，熟客先識叫嚟食。」他們亦不時設計新產品吸客，「在士多啤梨當造時，有諗過會唔會喺中間搽草莓醬，（西多士）上面放士多啤梨和煉奶，變成期間限定的草莓西多。」

　　記者當日到達舊舖時，店內面積不算大，店內只有5張桌子，只可容納約20人。舊店逢星期日和一休息，只開早上10時至下午2時半，仍門庭若市。今年5月底，他們搬到同區內的較大舖位內繼續經營，營業時間較以往長，朝十晚五，星期五、六晚更營業至8時。

全新etnet健康網購，送你【健骨維他命D3(1000IU)】乙樽(價值$108)► 立即行動！