《古臣周記－古臣》「指數基金之父」造福散戶，投資巨人名留青史

　　《古臣周記》有話２０１８年係一個告別嘅年份，由娛樂圈、藝術界到科學界都有名人離開
塵世，而踏入２０１９年，上星期有「指數基金之父」之稱嘅博格爾（Ｊａｃｋ　Ｂｏｇｌｅ）
仙逝，終年８９歲，作為全球第二大資產管理公司領航（Ｖａｎｇｕａｒｄ）嘅創辦人，同第一
個創立同指數掛勾基金嘅著名投資者，就連「股神」巴菲特都對佢十分尊敬，而且兩人喺投資上
都有相同以處，不如等阿臣講吓當中嘅故事。
　
＊領航５００基金累計回報８６倍＊　　　
　
　　要講博格爾嘅投資方法之前，首先我哋可能要先講佢成立指數基金嘅事跡，喺１９７５年嘅
時候，當時佢創立咗市場首隻股票指數基金Ｖａｎｇｕａｒｄ　５００　Ｉｎｄｅｘ　Ｆｕｎｄ
（領航５００指數基金），成為零交易佣金嘅經典，一改過去基金收費過高嘅詬病，古臣打個比
喻，如果喺無盈富基金（０２８００）呢類ＥＴＦ嘅時候，指數成分股要一手一手呁買嘅情況下
，投資金額隨時就要過百萬元，所以就連「股神」喺２０１７年嘅時候都話，博格爾普及咗指數
基金，等於讓散戶創造數以百億計嘅財富，絕對係投資界嘅「英雄」。
　　不過，其實當時投資界對呢個概念唔賣帳，因為大家都認為呢類指數基金最多都係同大市同
步，同其他以揀股跑贏大市嘅基金嚟講唔吸引，甚至有人話博格爾嘅做法好「唔美國」（唔夠大
膽）咁話。不過，指數基金嘅優勢正正係要以年計先可以發揮到威力，就以領航５００基金為例
如果由１９７５年持有到依家，回報已經高達８６倍！
　
＊投資組合擬降低股票比重至六成＊
　
　　博格爾同巴菲特嘅投資智慧都係買貨後長線持有，唔同嘅係前者投資指數，後者就睇重個股
嘅內在價值。仔細去睇博格爾將佢市場收益分成兩個來源，一部分係投資收益，一部分係投機收
益。投資收益係股息率加上未來嘅收益增長率，平均嚟講係５巴仙，但唔會高於７巴仙；投機收
益就同市場估值有關，通常佢會持貨１０年，如果當中嘅魚毛市盈率由１０倍升到２０倍，咁
１０年內平均就可以增長７巴仙。
　　缸友可能更加關心現時金融市場嘅走勢，其實博格爾喺佢離世之前，就已經對投資者講現時
全球主權同企業債務巨大、加上貿易衝突變得明顯，喺不明朗因素之下，再加上投資者選擇投資
指數基金，令主動型基金嘅投資者減少，令魚缸升市時升突，跌市就愈多人沽，長遠嚟睇可能為
金融市場埋下爆煲伏筆。
　　佢建議投資者喺現時嘅投資組合入邊降低股票投資比重，如果依家有七成係股票，三成係固
定收入，現時最好改為六成及四成之比。不過，博格爾都要重申佢從來唔建議長線投資者應該完
全清倉，相反投資者應該要知道自己可以承擔自己風險，同時做一啲防守性重嘅投資，去應付一
場金融危機。
　　古臣其實都覺得「基金之父」講嘅嘢有道理，但缸友都要知道佢嘅「買指數」理論，係建基
於成熟市場嘅股票指數長遠而言幾乎百分百上升嘅「真理」，另外上述投資指數基金的確係一個
門檻低，又唔使太花心思嘅投資，而長遠嚟睇回報亦好可觀，但正如「基金之父」講你要認清自
己嘅風險，古臣依稀記得長和系前主席誠哥（李嘉誠）宣布退休嘅時候有講過，如果持有一股長
和（００００１）以４６年計，加埋派紅股、拆細、重組及股息，回報會有逾１５００倍，所以
缸友應該衡量適合自己嘅投資方法，千萬唔好盲從過去嘅成功啊！
　
＊魚缸險守二萬七，短期橫行整固＊　　
　
　　講返阿臣個倉。
　　魚缸前日（２２日）高見三個半月高位２７３２３點之後，開始回吐部分升幅，而大部分時
間都係２７０００關口之間上演攻防戰，其實都難怪嘅之前神州公布嘅ＧＤＰ增速係近三十年嚟
最低，以上季度嚟講亦係近十年以嚟最弱，而且貿易戰再傳暗湧，中美雙方除咗喺知識產權方面
未有共識，花旗國已經通知咗楓葉國政府，將會提出引渡華為太子女孟晚舟嘅請求，令到大家都
擔心事件會令中美加三國關係變差，現時魚缸唔上唔落，古臣預計到下個星期中美貿易戰再有消
息傳出前，魚缸都要先保持橫行格局。
　　阿臣上星期買入新創建（００６５９）同潤電（００８３６），其中潤電因為近排煤價上漲
，而令股價受壓，另外佢亦宣布會同新濠國際（００２００）主席何猷龍持有嘅黑桃資本合作組
資能源企業。另外，阿臣上周沽出兩隻呢個月創出高位嘅股份－－領展（００８２３）同粵海投
資（００２７０），本周繼續高位整固，暫時未有太大突破。
　
　　表列截至１月２３日（１１：００ａｍ止）投資組合表現：
　
　　股份　　　　　　股數　　　　平均買入價　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　港股：
　　寶勝　　　１００００股　　　　１﹒５６元　　　　１﹒５１元　　　１５１００元
　　新創建　　　１０００股　　　１７﹒２４元　　　１７﹒６０元　　　１７６００元
　　華潤電力　　２０００股　　　１５﹒９０元　　　１５﹒７４元　　　３１４８０元
　　－－－－－－－－－－－－－－－－－－－－－－－－－－－－－－－－－－－－－－－－
　　股票市值　　　　　　：　６４１８０元
　　剩餘現金　　　　　　：　８９３７０元
　　組合淨值　　　　　　：１５３５５０元
　　組合本月收益表現：　＋　０﹒３５％（截至上月底止組合淨值：１５３００１元）
　　組合累計收益表現：　＋　４６﹒２％（本金１０５０００元計）（２０１６年８月開倉）
　
　　＊數據截至今日１１：００ａｍ