按盤價 
《小傳日記》近期魚缸水靜鵝飛之際，行會召集人葉劉向呢一池死水掟咗粒石仔，令到魚缸
掀起咗一陣漣漪，然後就沒有然後了！恒指最終都係跌市收場，全日跌４２點，總成交都係得
８２１億銀。
話說今朝葉劉接受商台英文訪問時就提到，香江可以考慮對神州人士買樓免徵雙倍印花稅
（ＤＳＤ），《彭博》引述報道就話，葉劉提到「內地嘅專業人士一直要求喺佢哋取得居留權之
前，可以免除佢哋繳付雙重印花稅」。消息一出，平時唔係好郁嘅地產佬即刻跑出，新世界發展
（０００１７）一度急彈超過６巴仙，魚缸都轉跌為升，最多升成２０５點。
不過放飯期間財爺辦公室就澄清，無就放寬ＤＳＤ做過討論。而始作俑者葉劉都回應，話個
意見只係新民黨嘅意見，將會喺《施政報告》諮詢期向特首提出。於是興奮咗細半日嘅地產佬即
刻散水，回吐升幅，最終恒地（０００１２）升唔夠１巴仙，報２７﹒９５銀；新地
（０００１６）升多過兩巴仙，報９５﹒７銀；新世界發展升多過兩巴仙，報２６﹒７５銀；長
實（０１１１３）升多過兩巴仙，報５５﹒２銀。
葉劉以行會召集人身分受訪，但又講出咗原本只係屬於新民黨嘅建議出嚟，原因無從稽考，
不過地產佬跑出就證明孖屐對此非常受落。近期雖然地產界都表明樓市回落之後係會回升，但係
近期蝕讓盤愈來愈多，間唔中都會有藍籌屋苑蝕讓報道，早一兩日先有德福花園劈價一成半，蝕
１７６萬銀轉手成交，所以難免令到孖屐不寒而慄。
而免收ＤＳＤ對內地投資者絕對非常吸引，一來港樓投資價植都仲喺度，二來香江絕對唔會
有爛尾樓出現，當然買得過啦！不過孖屐受落又唔等於廣大市民受落，吸引返北水嚟買樓，樓價
又會繼續高，關乎民生之處，要實行都仲有好多因素要考量。葉劉出嚟提一提，亦「正好」畀各
界平衡孖屐同民生所需，當然阿爺政策大方向都係考慮之列。請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
