按盤價 
《小傳日記》魚缸水頭繼續半乾涸狀態，成交又係得７００幾億，低成咁樣，就算恒指上返
１０天線都好難講係咪轉強訊號。
咁嘅環境下，各大股份都好努力自製材料畀孖屐炒吓。小米（０１８１０）就公布咗有關旗
下自動駕駛技術的研發進展，話已經制訂咗全棧自研嘅技術戰略，首期投入３３億元人仔研發費
用，組建超過５００人嘅研發團隊。智慧芽數據就顯示，小米同埋其關聯公司總共有超過
２６００件自動駕駛領域相關嘅專利申請，發明專利佔比約８５％，主要集中於圖像處理、顯示
屏幕、無人駕駛、人機交互、攝像頭等技術領域。
其實近嚟神州中企都好積極開拓無人駕駛呢個仲未普及嘅「無人領域」，好似百度
（０９８８８）同舜宇（０２３８２）都已經各顯神通。不過以百度進展最好，旗下無人自動駕
駛的士品牌「蘿蔔快跑」已經落戶好幾個大城市，早幾日仲已經喺武漢同重慶攞到全無人駕駛的
士服務嘅批准，比起仲係只聞樓梯響嘅舜宇同小米真係「快跑」得多。
但係小米近期真係危機處處，先唔好講喺無人駕駛領域仲係「口水花」研究階段，本業手機
業務喺主要海外市場印度都受到打壓，為咗要另闢收入來源，仲要硬住頭皮踩入高端手機市場呢
個鱷魚潭，要同Ａｐｐｌｅ同「三叔」正面交鋒，前路真係頗為難行。面對內憂外患，無人駕駛
研發真係要加快，產品愈遲落地就好易被百度搶佔「孖屐些牙」；另外，今次小米１２初戰高端
市場嘅成績亦對之後嘅部署好有啟示性。請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
