23663 京東匯豐四甲購A (認購證)
即時 按盤價 升0.350 +0.055 (+18.644%)

17/03/2021 17:55

《古臣周記-古臣》熱炒內銀股難抉擇,一文了解郵儲行招行優劣

  《古臣周記》近日孖屐繼續風起雲湧,啲錢睇住花旗長債息嚟炒,幾乎日日都上演資金輪動
!上期阿臣同大家分析完整個內銀板塊現時嘅可取之處,今期就同大家睇吓邊隻內銀佬值博啲。
以前買內銀大家都係貪佢息率高,夠穩定,但正當銀行板塊補漲時,有邊間行有獨特概念可以跑
出?唔通真係得四大行可以吼?等阿臣同缸友一齊解構一下。
  內銀大概可以分為兩大類,首先就係6間國有大行,包括工農中建交郵儲;其次仲有12間
股份制銀行,包括招行、興業、光大、中信同平安銀行。而我哋今日嘅焦點就係郵儲行
(01658)同招行(03968)。
  點解一嚟就排除咗四大行呢?當然工農中建係風險相對較低嘅優質選擇,派息亦十分慷慨,
但神州政府繼續要求內銀讓利實體經濟,巨型國有行要相對更嚴格咁執行中央指令,盈利壓力比
其他中型商業銀行沉重,加上郵儲行同招行業務較進取,由於阿臣今次建倉目的係想追求高回報
多於避險,所以得出以上選擇。

*郵儲行招行勢均力敵*

  先談相同優點,兩行零售銀行業務突出,業務模式著重個人存款、貸款、私人銀行、理財產
品等,存貸款來源主要為中小企及個人戶,可以帶嚟低利息成本存款同高收益貸款,淨利差同加
權風險資產收益率都可以保持較高水平。兩行均以零售業務為主,零售貸款佔比超過五成,現時
商業銀行面臨向實體經濟讓利嘅考驗,當前零售業務息差水平較高,資產質量相對較好。
  用最簡單易明嘅內銀經營數據做比較,舊年第三季,郵儲行同招行嘅淨利差分別係
2﹒35%同2﹒45%,而淨利息收益率分別係2﹒4%同2﹒53%;而四大行中表現最強
嘅建行(00939),淨利差亦只係有2﹒12%、淨利息收益率2﹒26%。資產質量方面
,招行第三季不良貸款率為1﹒17%,郵儲行僅為0﹒88%,其他5間國有行不良貸款率均
為1%以上。
  資產質量方面郵儲行勝,經營表現而言招行勝,各有千秋。

*直銷銀行有前景*

  兩行相比同業仲有另一個優勢,都有開展直銷銀行。直銷銀行係互聯網金融領域嘅新概念,
透過電子渠道提供金融產品同服務,可以通過線上渠道開展零售業務,突破物理限制,同個人網
銀相比,又突破了本行帳戶局限,可以向其他銀行用戶開放。要比喻嘅話,傳統銀行係咩金融產
品都有嘅超級市場,而直銷銀行就係產品精簡,但隨時隨地都搵到用到嘅便利店。對於郵儲行同
招行嚟講,最吸引嘅當然係直銷銀行開拓零售市場嘅能力,畢竟用家唔一定要有自己行嘅借記卡
都可以開戶嚟用,方便性更加係招攬新客戶嘅良藥,吸納更多嘅支付同消費信貸業務。
  不過兩行嘅打造方向都有不同,郵儲行以自主經營,旗下中郵郵惠萬家銀行係佢全資子公司
,基本上完全繼承母行定位,係佢向金融科技探路嘅旗艦;而招行就同京東(09618)聯手
合辦招商拓撲銀行,發展招行擅長嘅個人戶同小微領域,由招行京東分別持股七成同三成。
  兩行嘅選擇都反映咗郵儲行對自身業務嘅自信。業內人士指,郵儲行獨立經營直銷銀行可能
基於佢嘅零售網點優勢,佢有成4萬個經營網點,覆蓋神州九成九地區,係最多經營網點嘅內銀
,亦有意將網點賦能轉型,利用金融科技將4萬個網點打造成4萬個「微商圈」、「微社區
」。反之,招行只專注於珠三角同長三角等發達經濟區域,網點優勢相對偏弱。
  中信建投指出,隨著互聯網存款管理辦法推出,百度、阿里巴巴(09988)、騰訊
(00700)、京東嘅部分金融業務受限,睇好持有直銷銀行新牌照嘅招行同郵儲行,預計郵
儲行舊年第四季淨利潤按年增長有望超過兩成二。

*零售之王隱憂多*

  而有零售之王美譽嘅招行有不少隱憂,首先係佢信用卡不良貸款快速攀升,睇返近幾年年報
,招行響2018同2019年嘅信用卡不良貸款率分別係1﹒11%同1﹒35%,而去到舊
年上半年,信用卡貸款不良率已經去到1﹒85%,半年時間升咗半巴仙,反之郵儲銀行
2020上半年信用卡不良率分別雖然有1﹒99%,但只係升咗0﹒25巴仙,響承受較大疫
情壓力嘅國有行入面算做得唔錯!另外,招行作為神州最大信用卡發放行亦開始面臨監管陰霾,
舊年年尾銀保監會點名批評股份行信用卡業務,招行舊年第三季信用卡相關投訴就有成近
5600宗,按季增加兩成四,係最多投訴股份制銀行。
  信用卡不良率都未動搖到招行嘅地位,但負債成本方面先令人憂慮。根據彭博綜合市場資訊
,截止舊年9月底,郵儲行存款對總資產佔比達90巴仙,而招行只有68巴仙。招行負債中有
大部分都係嚟自向央行以及同業借錢,正正依家全球踏入經濟復甦周期,神州復甦步伐更加領先
全球,銀保監會主席郭樹清更加表明貸款利率或會回升,幣策收緊幅度愈來愈大,市場利率逐漸
走強,同業拆借及同業存單成本都會上行,喺「收水」大環境下,存款優勢愈大嘅銀行淨利差擴
張愈快,反而招行能否保持現時領先同行嘅淨利差就令阿臣有不少疑慮。

*下沉市場潛力高*

  睇返郵儲行,雖然佢經營表現略為不及招行,但佢具有極高嘅存款佔比、優異嘅資產質量、
以及自主嘅金融科技直銷銀行業務。而且郵儲行亦係下沉市場零售之王,佢擁有超過6億嘅個人
客戶,有近4萬個營業網點分布喺整個神州,當中有近六成位於中西部嘅縣域地區,正正係金融
基礎較薄弱嘅區域,郵儲行可以免去競爭咁滲透鄉村市場。隨著神州加快推動縣域經濟,下沉市
場金融需求有一大片藍海等待開發,舊年《中國縣域經濟百強研究》就提到,百強縣以佔神州不
到2%嘅土地同7%嘅人口,就創造咗全國近一成嘅GDP,金融業務潛能巨大。截至2019
年,郵儲行借記卡結存卡量超過10億張,而信用卡結存卡量只有約3110萬張,佔比只有近
3%,業務拓展空間巨大。
  除咗上述嘅直銷銀行業務,郵儲行亦有喺成個科技領域亦有急起直追,行長郭新雙表明郵儲
行會喺「十四五」時期內每年將3%營業收入用於發展金融科技,近日該行亦有同上海及大連市
政府聯手合作推動數字人民幣應用,科技創新亦可憧憬。
  另外,郵儲行喺舊年11月向控股股東郵政集團發A股,集資不超過300億人仔,用於補
充核心一級資本,有助貸款增長和盈利改善。
  綜上所述,郵儲行現時業務層面同招行不相伯仲,但發展潛力同想像空間較後者為大。

*果斷建倉郵儲行*

  身為「股神」巴菲特愛將李祿心頭好嘅郵儲行,喺近期反覆市之下亦相對穩定,企喺5﹒8
銀以上橫行咗一段時間,阿臣覺得雖然現價都係高位,但仍然值博,亦對嚟緊月底放榜有信心,
喺今日低位6﹒1銀入兩手,以12200銀買入兩千股。
  另外阿臣留意到持倉嘅世茂服務(00873)已經有兩成五嘅升幅,於是喺今日以17銀
沽出止盈,扣埋手續費,總共套現17000銀,淨賺3485銀。
  以上兩個操作後,倉位現金共計有50309銀。


   表列截至3月17日全日收市阿臣投資組合表現:
 
   股份        股數  平均買入價(元)    現價(元)  總值(元) 
      
   --------------------------------------
   港股:   
   港交所      100股   264﹒50  454﹒60元  45460
   九龍倉置業   2000股    32﹒00   44﹒75元  89500
   京東集團     100股   335﹒60  329﹒00元  32900
   中金公司    2000股    18﹒22   17﹒06元  34120
   郵儲行     2000股     6﹒10    6﹒11元  12220
   -------------------------------------- 
   股票市值    : 214200元 
   剩餘現金    :  50309元 
   組合淨值    : 264509元 
   組合本月收益表現: -4﹒9%(截至上月底止組合淨值:278064元)
   組合累計收益表現:+151﹒9%(本金105000元計)(2016年8月開倉)

   *數據截至3月17日全日收市

全新etnet健康網購,送你【健骨維他命D3(1000IU)】乙樽(價值$108)► 立即行動!

備註: 即時報價更新時間為28/03/2024 18:00
  港股即時基本市場行情由香港交易所提供; 香港交易所指定免費發放即時基本市場行情的網站
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力