按盤價 
《小傳日記》呢輪魚缸日日潛水，跌完兩千幾點到今日先企穩返喺２５０００點樓上。大跌
市期間，重磅大份嘅阿里（０９９８８）、美團（０３６９０）、ＱＱ（００７００）少不免都
要缸底來相見。除左重磅嘢，海底撈（０６８６２）都日日陪住一齊沉底，今日仲試過跌穿３０
蚊去到２９蚊，好在而家都守得住喺３０蚊。咁樣沉海底法，仲撈唔撈得起呢？
海底撈年頭受惠疫情放緩，ｋｅｅｐ住升到上歷史新高８５﹒７，可惜摸頂之後就跌唔停，
到６月就得返４０上下。就喺呢個時候，瑞信就出報告話火鍋股跌得咁甘，都係市場過份擔心，
就維持住魚缸三大火鍋股「跑贏大市」評級，想吹返旺海底撈個火。
不過今個星期一大跌之際，海底撈發咗盈喜，話較同期賺多咗１﹒０４倍，雖然由蝕變賺，
但係都達唔到管理層嘅預期。於是瑞信都頂唔順，即刻將海底撈評級推落「中性」，不過就留有
一線，維持目標價５０蚊。其實瑞信就係覺得，海底撈「潛水潛得快，上水上得慢」，盈利同翻
枱率都係慢過預期，所以就由「睇好」變成而家「唔多睇好」。
其實海底撈或者其他火鍋股，股價升跌或者賺蝕係好睇疫情，疫情改善有得賺，疫情加重就
要跌，可以稱得上係「疫情概念股」。雖然海底撈好努力想係疫市求存，開多幾間舖想托住個盈
利，可惜升勢不似預期，呢一年內地疫情都係反反覆覆，搞到海底撈個算盤都打唔響。海底撈自
己都講到，賺得唔夠多係由於開新舖開支大，拉低咗盈利。
所以中線嚟講，疫情唔大幅放緩，海底撈都仲要掙扎多一段時間。短線睇嘅，就要睇下個月
８月出嗰份中期業績靚唔靚仔，同店平均日銷售額加同店平均翻檯率有無改善，有嘅話都仲算利
好因素可以支持住，如果做唔好，隨時繼續海底漫遊。
表列火鍋股或中概餐飲股表現：
股份（編號） 現價 變幅
－－－－－－－－－－－－－－－－－－－－－－－－－－－－－－
海底撈（０６８６２） ３０﹒７０元 跌１﹒１３％
呷哺呷哺（００５２０） ６﹒９７元 升９﹒２５％
九毛九（０９９２２） ２６﹒１５元 升２﹒７５％
奈雪的茶（０２１５０） １０﹒０８元 升１０﹒１６％
百勝中國（０９９８７） ４８０﹒００元 升２﹒６１％
－－－－－－－－－－－－－－－－－－－－－－－－－－－－－－
編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
