分享到

2021-07-14

《Make Money》投資移民多選擇,最平最貴入場費點樣揀?

  近期好多媒體都報道機場入面,港人預備移民以及同親友不捨嘅畫面,令好多人都開始思考會唔會去外地尋找新發展,但走得早不如走得好,每個地方嘅移民條件都唔一樣,究竟邊個先係最適合自己呢?今日我哋就以「投資移民」嘅角度,睇睇常見移民地嘅入場費啦!

 

 

 

 (Shutterstock圖片)

 

英國:入場最少2000萬港紙,要求較高

 

 

  (Shutterstock圖片)

 

  香港人對英國最為熟悉不過,正正因為熟悉,所以成為唔少人嘅移民首選,假如你無BNO而選擇投資移民的話,入場費就頗高啦!據網上資料顯示,想拎到「投資簽證」(Investor Visa Tier 1)要幾個條件,其中就係必須年滿18歲、要係英國投資銀行開戶以及投資最少200萬英鎊(約2000萬港紙)係指定基金、債券、投資產品或英國企業。

 

  只要投資200萬英鎊,再係英國住滿5年,就可以申請永久居留。不過都可以有快速方法拎到居留權嘅,例如投資金額達500萬英鎊,居住滿3年後就可以拎到;而投資1000萬英鎊,就可以縮短到2年後就可以申請居留權。不過相信選擇呢條路都只係小數人,就算賣埋自住層樓有千萬,但被人鎖住5年資金,呢個風險都頗大啦,況且投資移民係唔可以申請公共福利!

 

台灣:600萬新台幣入場費,惟傳聞近期收緊移民申請

 

 

  (Shutterstock圖片)

 

  相對之下,台灣入場費就親民好多啦!台灣都係一個香港人常到嘅旅遊地方,一來文化接近,二來兩地距離都相當近,飛機一程都係兩個鐘,就算回鄉探親都相當方便!據台灣最新法規,投資移民申請人須要有600萬新台幣(約156萬港紙)嘅創立資金,呢筆可以係開設實際業務公司或者投資現有台灣;另外每年最少聘請2名以上台灣藉員工,以及營運滿3年,再經過審理,就可以辦理居留啦!

 

  假如百幾萬都真係比較難拎到,台灣仲有一個「創業家簽證」,就係當地進行創業投資,或於政府認定之國際性募捐平台籌資200萬新台幣(約52萬港紙);又或者設立符合「具創新能力之事業認定原則」化事業,擔任該事業負責人並投資新台幣100萬元(約25萬港紙)以上;又或者你本身係一啲專利擁有人、曾經參與過並拎到國際性獎項、甚至擁有專業技能都可以透過「創業移民」呢條途徑!

 

  不過,近期台灣疫情嚴重,加上近年由香港往台灣移民啲人數多左,有傳近呢一兩年台灣當局係申請審批移民方面都收緊,所以雖然入場費平,但可能等候時間會比其他地方較長。

 

加拿大:120萬加紙入場費,而且只適用於魁北克省

 

 

  (Shutterstock圖片)

 

  加拿大都係香港人喜愛嘅一個熱門移民勝地!有人講笑話係加拿大聽到廣東話仲多過講英文,唔知真定假啦!近期加拿大新公布兩個永久移居方式:包括A組及B組。其中,A組係過去3年完成加拿大專上課程;B組須在過去三年係加拿大累積至少一年全職工作經驗,假如是兼職,則需要累積1560小時工作經驗。留意返,兩個方式係不適用計劃係魁北克省定居嘅人。

 

  如果想投資移民呢,入場費就比較高啦,首先投資移民計劃只適用於魁北克省,申請人要求係魁北克投資局,作出為期5年,金額為120萬加元(約745萬港紙)嘅投資;而申請人(和配偶)本身都需要擁有200萬加元(約1242萬港紙)資產;而魁北克省係加拿大主要嘅法語區省分,如果你本身識法文,可能都有小小加分啦!

 

撰文:李皆穎

相關文章