職場

　　冇功都有勞。講得這句說話的，肯定是做了一段日子的員工。覺得委屈了，辛勞工作並沒有得到管理層的讚賞重視，加薪升職花紅從來絕緣，甚至發現自己的名字出現在裁員的名單上！

　　其實最有資格講這句說話的，非牛莫屬！因為人做事總會有出錯，亦沒有一個制度可以公平計算究竟付出了幾多。但是牛就不一樣了，每日做幾多個鐘耕幾多塊田，從來身不由己，全部農夫由操作操控，即是老闆全權決定話事。工作期間，沒有偷懶卸膊Hea做的可能，任勞任怨日日做不停，換來的飽飯只是草。只不過幾盡心盡力又如何？老了病了體力不足了，不能再耕田了，就失去生存的價值了，要不自生自滅，要不被毁滅成為其他動物的食物或者肥田料！鞠躬盡瘁死而後已，為甚麼沒有換來農夫的憐憫？

　　農夫冇人性？把牛當作工具的農夫，是不會和工具講感情的！當初願意付出金錢買牛，就是買牛的能力生產力，期間一直有照顧，有草食有牛棚住。當牛老了，失去能力生產力了，就需要換一套新的牛了，買牛，是需要錢的，新來的那隻牛，同樣需要食草和住牛棚的。其實是很簡單的數學題，更加是一個循環，想深一層，人生何嘗不一樣？

　　只不過不是所有農夫只把牛當工具的，會和牛隻講感情的，只能講句同牛唔同命。日日肩並肩一起努力耕田，慢慢培養出感情默契，互相扶持拍住上。牛是有靈性的動物，其實天下萬物皆有靈性，感情日益深厚，即使不再能夠工作了，一輩子的辛勞奉獻，建立起的感情關係，農夫自會養牛終老。

　　員工認為自己冇功都有勞，但站在老闆的立場，個個月有糧出的對嗎？一個出力一個出錢，貨銀兩訖，以事論事，不存在誰欠誰！跟對人的重要性，很多人整日掛在嘴邊的識人好過識字，究竟幾多人知道當中的真正意義？識人，不是識得人多的字面意思，是學識如何看人的本事。

　　職場本來就是競技場，是一個論價值計貢獻、不是講感情的地方。所以良禽擇木而棲，要懂得運用自己的價值做籌碼，為自己爭取想要的權益得益。

　　你要是牛的話，又懂得講說話的話，你會和農夫說甚麼？如何為自己爭取一個善終？

　　好多打工仔自覺成日唔夠時間用，除咗工作太忙、公司太多豬隊友、老細個腦太細之外，亦因為能做到真・時間管理嘅人唔多。而且不少人對時間觀都唔太了解，結果有再多時間也唔能夠完成工作。以下幾個對時間觀同工作效率嘅誤解，值得大家反思。學懂改善時間管理技巧，就算做唔到時間管理大師，都要學會用較少時間完成更多工作。

「有更多時間，先能夠完成手上工作」

　　首先要明白，如果係自身唔識好好管理時間，就算一日有 36個鐘，你都係唔夠時間用，36個鐘亦會出現36個鐘工作量。不免經常會感到，今日雖然時間好似鬆動咗，但後來又因出現相對嘅工作而變得好忙。歸根究柢重點係高效率，唔係時間多少；當做到高效率時，時間就會變得更多。所以唔係更多時間完成工作，而係更高效率完成工作。

　　要做到高效率有好多方法。老生常談，最先要學懂何時放棄。何時放棄工作質素、何時放棄某啲工作、何時放棄老細每一個要求等等。當然人人都想每件事情做到最好，但如果時間已迫爆時，只能放棄某啲事情。交由他人處理或用錢去處理，都係放棄嘅一種。不過點放棄都好，絕唔可以放棄自己底線，不然就會跌落忙死輪迴之中。

「親力親為係最好、最快」

　　職場上唔難見到好多高效率、高能力嘅同事，通常都係最忙一群，其中一個原因係佢哋傾向凡事親力親為。經常會覺得「我教得佢嚟，我做自己已經做完」，大多都係藉口。因為當你有能力嘅時候，你就有方法搵到對的人、做對的事。其實主要原因係呢類人往往缺乏安全感，一來唔放心交低工作，二來如果自己有太多空餘時間時，反而感到不安。最後習慣自己親力親為，習慣「忙」呢種感覺，沒完沒了嘅壓迫最後迫死自己。親力親為只能換來一刻嘅方便，要以長線嘅高效為目標先係真理。

「時間管理只在於管理工作」

　　好嘅時間管理同高效工作能力，只係助你完成工作嘅一種方法，係所有事情嘅第一步。最終目的係當你完成工作後，先能夠可以好好管理人生唔同事情。千萬唔好自己已經做到高效，而「搵野做」去填補每一個空檔。得閒冇野做，唔代表浪費時間。人生好多更重要的事情需要管理，不論係家庭、朋友，健康、興趣等，以上先係你嘅目標。緊記，100%填滿工作，並非充實人生。