06/11/2020
隔空宣傳《使徒行者3》 林峯笑認湊女生活好開心
【晴報專訊】台慶劇《使徒行者3》將於下周一在翡翠台首播，劇中演員苗僑偉（三哥）、袁偉豪、黃智雯及黃翠如等昨日出席宣傳活動。林峯雖然身在深圳拍戲，但接受電話訪問跟大家互動，當三哥問他的湊女生活如何，林峯似乎來不及反應，還尷尬稱：「乜唔係問劇情咩？」
林峯昨日隔空參與宣傳台慶劇《使徒行者3》，苗僑偉笑問他是否掛著開工搵奶粉錢？林峯不懂反應，只稱忙於開工。司儀問他拍攝時可有難忘回憶？林峯表示跟一班台前幕後合作很開心。當現場演員互選誰在劇中最chok，大家不約而同指著三哥，連林峯都認同說︰「呢個世界無人chok得過三哥，佢瞓醒嗰下已經chok。」司儀趁機追問他當爸爸的生活如何？林峯只好推說：「開心，好開心，會更加努力工作。（係咪要賺奶粉同尿片錢？）無錯。」
誰人在劇中最chok？全場不約而同指著苗僑偉，場面搞笑。
三哥其後向傳媒爆料稱已看過林峯B女的照片，他笑言︰「有啲似阿峯。（有無講湊女經？）等佢返嚟先啦，佢應該都要拍到過埋年，預咗佢返唔到嚟宣傳，所以一定要屈佢請食飯。」提到林峯尷尬避談B女，三哥對此表示︰「偶像對呢啲嘢可能有啲避忌，不過都係開心嘢，又唔係未公開，佢可能未習慣啦。」
三哥智雯咀戲被刪
黃智雯、江美儀在活動上大鬥性感。
三哥和智雯在《使徒3》有咀嘴戲，兩人皆表示只屬蜻蜓點水式，該場咀戲在內地版本欠奉，他們希望香港觀眾可以看得到，即使收錄在「彩蛋」也好。三哥提到拍攝該場咀戲時，本來想突然咀過去，但他笑言︰「後尾諗諗下都係要同佢（智雯）講聲，怕佢揼瓜我，因為佢喺劇入面都係武林高手。」