世事政情

　　【晴報專訊】鄭秀文（Sammi）昨日出席時裝活動，Sammi老公許志安正式復出，推出新歌之餘，早前更舉行網上音樂會，反應不俗；Sammi表示有收看安仔的音樂會，並大讚老公努力練歌及保持狀態。另外，向來身形纖瘦的Sammi，揚言到70歲退休時便會容許自己長胖點，肥20磅也沒問題。

Sammi笑言到退休時才縱容自己大吃大喝及減少運動。

　　鄭秀文、廖子妤（Fish）、蔡思韵及楊文蔚昨日到中環出席時裝活動，身穿毛衣配背心的Sammi，笑言在織冷衫等「女人嘢」完全不在行，自己人生亦只織過一條頸巾送給爸爸，連老公許志安也無份：「因為我針法好差，織到疏窿，戴咗都唔會保暖！」提到安仔近日推出新歌《人與人之間》，並舉行網上音樂會，Sammi表示有收看音樂會，又大讚安仔十分盡力。她說：「我睇到佢（安仔）為演出做咗好多準備工夫，好似練歌、保養把聲，同埋一直保持最佳嘅體態。佢好珍惜呢個機會，因為唔係必然，有唱片公司同觀眾畀機會，自己執生啦。佢咁大個人，知道『珍惜』唔係淨係講咁容易，要用行動支撑呢兩個字。要有誠意演出，保持水準好重要，我幫唔到佢，要靠佢自己，佢都會『自動波』去做。」

安仔早前舉行網上音樂會，獲歌迷大讚歌藝保持水準。（網上截圖）

　　Sammi笑言自己過往只珍惜身形，現在愈來愈珍惜健康，「我本身瘦咗好多年，但每次出嚟大家話我瘦，其實毋須咁驚訝，係因為運動同飲食而養成呢個體質。可能我若干年後退休會畀自己肥啲，脹20磅都無問題，都只係120磅。到時我會食嘢亂章法啲、少啲運動，因為到我70、80歲時，使鬼咁fit咩！」談到工作，Sammi透露工作已排到2024年底，除了明年七月的紅館騷，還有拍電影及開巡迴演唱會，「去到呢個年紀唔好計劃咁遠，兩年都已經好長。」

廖子妤「收埋」圈中男友

（左起）楊文蔚、廖子妤及蔡思韵以毛衣造型現身。

　　同場的Fish十年前由馬來西亞來港發展，她笑言難忘首年在港度過的冬天：「啱啱嚟嗰陣真係凍死我，要飲熱水保暖。」提議她找個男友做「人肉攬枕」便可保暖，她怕醜笑認早已有一位拍拖數年的圈中男友。問男方是否同公司藝人？她即說：「我公司得麥子樂，唔係佢啦！」Fish自言性格負面，擔心若公開關係，將來分手又要對外解釋，所以拒透露男友身份，「不過依家相處開心嘅，我都同佢屋企人食過飯。」

　　即將在七月份到紅館舉行一連十三場演唱會的天后鄭秀文，日前推出新歌《心魔》，已引來樂迷極大迴響，今日《心魔》MV正式上架，破格和充滿電影感的拍攝手法，Sammi坦言入行以來從未試過。而今次《心魔》MV，Sammi專程飛到泰國進行拍攝，亦是她首次到當地拍MV，而且導演Kero、拍攝團隊、40位舞者和排舞師都是泰國最頂尖的陣容，加上分別在舊式劇院和郊外的校園取景，Sammi表示MV每一個畫面，都能震撼入心！

　　「今次MV比較特別，親身飛到泰國搵咗一位當地導演操刀，整個拍攝團隊、Dancers、排舞師等，全部都係嚟自泰國，去製作呢首新歌《心魔》嘅MV。點解呢？事緣喺YouTube睇到一首歌嘅MV，呢位導演拍攝嘅風格，我好鍾意，入咗腦，記喺心裏，好大嘅憾動，如果搵到佢拍MV一定可以將首歌昇華，多謝經理人（郭啟華）搵到呢位導演，做到呢件事。今日我就飛到泰國，整個拍攝我覺得非常值得，團隊專業，處理畫面、意境，歌詞裏面最深入嘅靈魂，我覺得係拍到呢首歌嘅靈魂，呢一點相當重要，我自己一路拍攝，某啲鏡頭我甚至會起雞皮，Dancers唔只係跳舞，佢哋身體嘅率動，都好多情緒喺入面，絕對幫我呢首歌畫面處理到真係極緻嘅狀態。」Sammi說。

　　今次MV的行程相當緊密，Sammi黃昏抵達當地後，馬上回酒店進行fitting、試戴不同顏色的隱形眼鏡、戴上MV中的長假髮給髮型師進行修剪等，翌日早上九時便埋位拍攝，當日氣溫高達三十六度，Sammi一直在悶熱的外景進行拍攝，直到凌晨一時才收工，為在演唱會前夕保持最佳狀態，Sammi未有機會品嘗當地美食，但她覺得一切的辛苦都是值得，尤其與四十位泰國Dancers共舞的畫面，充分地表達到歌曲的意境及主題。

　　「其實好多唯美嘅畫面，亦有勾畫心魔嘅意境、意象，呢啲意象都係用人嚟堆砌，我哋搵咗40位Dancers去拍攝，即使係一個好簡單嘅動作，人多動作又齊整嘅時候就有一種好強大嘅震動感覺。歌詞好容易令人進入歌曲情緒，所以好拍到《心魔》嘅主題。」

　　MV中，Sammi有不少獨特造型，其中一件大褸因為重量十足，令Sammi舉步難行，另外身上的紋身貼紙，要花上近四十五分鐘剪貼，每一個造型、細節都非常用心。問她拍MV最難忘是那個時刻和造型？她說：「每一個時刻、每一個場境我都好鍾意，導演處理每個場口和細節，燈光和意境都好唔一樣，再加上我為咗呢個MV做咗好多造型，營造氣氛，完全揀唔到，每一個場景我都未拍過，就連類似都未試過，所以感覺好新鮮。」

　　能夠順利完成《心魔》MV，Sammi坦言非常感謝唱片公司的支持，她說：「整個MV嘅籌備過程，我交晒俾經理人處理，要多謝唱片公司支持我飛咁大個團隊嚟泰國拍攝。至於我嘅準備，我即刻諗到歌曲混音部份，點樣做先可以將歌曲嘅意境提升？點樣將成首歌嘅歌詞和音樂嘅靈魂完全呈現。仲有造型都好多和特別，好快就諗到髮型和化妝，腦裏面有好多形象呈現。去到現場，最震憾係舞蹈，甚至對嘴唱歌部份，有好多連我自己都意想不到，勾起我好深好Deep嘅情緒走出嚟，令到畫面好強烈。因為嗰刻情感係真實，Dancers亦都係帶住豐富情緒演繹，某啲場面有啲毛管戙，一切都來自真摯嘅情緒。」