世事政情

　　鄭秀文自從去年5月患上新冠肺炎，隨後受「長新冠」後遺症影響，導致長期聲沙沙，本身患有嚴重哮喘的她長達一個多月時間仍然未癒，最終無奈宣布演唱會延期至今年7月舉行。此後，Sammi未知是否養病，一直都甚少出席公開活動，連社交平台都冇出Po，只是偶爾Po IG Story簡單交代日常打扮的服裝。近日，網上流傳多張Sammi跟家人聚會的照片，其中她跟許志安激罕同框合照，兩公婆笑晒口甜到漏。

不少粉絲都擔心偶像的情況。（鄭秀文IG）

鄭秀文演唱會因病宣布延期（鄭秀文IG）

鄭秀文去年5月確診新冠肺炎（鄭秀文IG）

　　IG和小紅書都發現這次聚會的私人合照，見到聚會中除了有Sammi的媽媽和家姐外，其他估計是媽媽家庭的成員，屬於Sammi的表親，其中有不少小朋友同場，非常熱鬧。一頭金髮的Sammi心情輕鬆，而她跟安仔有同媽媽及長輩們合照，一向著重打扮的Sammi，連媽媽都一樣，Auntie雍容華貴大方得體，跟女兒合照時都難掩幸福笑容。而Sammi跟親友們合照都有求必應，除了餐廳內合照外，去到街頭臨別一刻，仍然大玩街頭自拍，原本已經戴上口罩的許志安都特別拉下口罩，齊齊展現燦爛笑容。

　　其實鄭秀文自從宣布演唱會延期後一直養病，未有公開露面，連IG都甚少出Story，許志安上月中出席TVB的《歡樂滿東華》為慈善獻唱，他接受訪問時都有提到Sammi的康復進度，他說：「（康復進度）良好嘅，但係就需要啲時間，佢本身有哮喘，唔係好舒服，所以有啲難少少。」

許志安去年為《歡樂滿東華》演出，跟粉絲顏志恒合照留念。（顏志恒IG）

　　去年2023年算是Sammi大豐收的一年，她憑電影《流水落花》獲得「第29屆香港電影評論學會大獎」最佳女演員、「2022年度香港電影導演會年度大獎」最佳女主角、「第41屆香港電影金像獎」最佳女主角及最佳原創電影歌曲獎，下半年一心打算專注演唱會的她，可惜未能如願舉辦，工作更亦養病而全面叫停。

　　即將在七月份到紅館舉行一連十三場演唱會的天后鄭秀文，日前推出新歌《心魔》，已引來樂迷極大迴響，今日《心魔》MV正式上架，破格和充滿電影感的拍攝手法，Sammi坦言入行以來從未試過。而今次《心魔》MV，Sammi專程飛到泰國進行拍攝，亦是她首次到當地拍MV，而且導演Kero、拍攝團隊、40位舞者和排舞師都是泰國最頂尖的陣容，加上分別在舊式劇院和郊外的校園取景，Sammi表示MV每一個畫面，都能震撼入心！

　　「今次MV比較特別，親身飛到泰國搵咗一位當地導演操刀，整個拍攝團隊、Dancers、排舞師等，全部都係嚟自泰國，去製作呢首新歌《心魔》嘅MV。點解呢？事緣喺YouTube睇到一首歌嘅MV，呢位導演拍攝嘅風格，我好鍾意，入咗腦，記喺心裏，好大嘅憾動，如果搵到佢拍MV一定可以將首歌昇華，多謝經理人（郭啟華）搵到呢位導演，做到呢件事。今日我就飛到泰國，整個拍攝我覺得非常值得，團隊專業，處理畫面、意境，歌詞裏面最深入嘅靈魂，我覺得係拍到呢首歌嘅靈魂，呢一點相當重要，我自己一路拍攝，某啲鏡頭我甚至會起雞皮，Dancers唔只係跳舞，佢哋身體嘅率動，都好多情緒喺入面，絕對幫我呢首歌畫面處理到真係極緻嘅狀態。」Sammi說。

　　今次MV的行程相當緊密，Sammi黃昏抵達當地後，馬上回酒店進行fitting、試戴不同顏色的隱形眼鏡、戴上MV中的長假髮給髮型師進行修剪等，翌日早上九時便埋位拍攝，當日氣溫高達三十六度，Sammi一直在悶熱的外景進行拍攝，直到凌晨一時才收工，為在演唱會前夕保持最佳狀態，Sammi未有機會品嘗當地美食，但她覺得一切的辛苦都是值得，尤其與四十位泰國Dancers共舞的畫面，充分地表達到歌曲的意境及主題。

　　「其實好多唯美嘅畫面，亦有勾畫心魔嘅意境、意象，呢啲意象都係用人嚟堆砌，我哋搵咗40位Dancers去拍攝，即使係一個好簡單嘅動作，人多動作又齊整嘅時候就有一種好強大嘅震動感覺。歌詞好容易令人進入歌曲情緒，所以好拍到《心魔》嘅主題。」

　　MV中，Sammi有不少獨特造型，其中一件大褸因為重量十足，令Sammi舉步難行，另外身上的紋身貼紙，要花上近四十五分鐘剪貼，每一個造型、細節都非常用心。問她拍MV最難忘是那個時刻和造型？她說：「每一個時刻、每一個場境我都好鍾意，導演處理每個場口和細節，燈光和意境都好唔一樣，再加上我為咗呢個MV做咗好多造型，營造氣氛，完全揀唔到，每一個場景我都未拍過，就連類似都未試過，所以感覺好新鮮。」

　　能夠順利完成《心魔》MV，Sammi坦言非常感謝唱片公司的支持，她說：「整個MV嘅籌備過程，我交晒俾經理人處理，要多謝唱片公司支持我飛咁大個團隊嚟泰國拍攝。至於我嘅準備，我即刻諗到歌曲混音部份，點樣做先可以將歌曲嘅意境提升？點樣將成首歌嘅歌詞和音樂嘅靈魂完全呈現。仲有造型都好多和特別，好快就諗到髮型和化妝，腦裏面有好多形象呈現。去到現場，最震憾係舞蹈，甚至對嘴唱歌部份，有好多連我自己都意想不到，勾起我好深好Deep嘅情緒走出嚟，令到畫面好強烈。因為嗰刻情感係真實，Dancers亦都係帶住豐富情緒演繹，某啲場面有啲毛管戙，一切都來自真摯嘅情緒。」