從2015紅到2016 十大必食紫薯新寵！
要評選2015年風頭最勁的食物，紫薯一定榜上有名。這款自帶夢幻紫色的超級食材，贏得外貌協會成員的歡迎,更具有抗氧化、穩定血壓、預防疾病等好處。而且紫薯味道清甜口感綿密，與其他食材搭配相得益彰，城中不少食店用紫薯做創意，麵包、雪糕、薯條、漢堡、甜品，全部都可以找到紫薯的身影。
在2016新年之際，我們特別搜集出城中10款紫薯新寵，區區都有，新春食多D，包你一整年都好似紫薯咁人見人愛，紅到發紫！
【上環】
1、叮噹最愛4層紫薯銅鑼燒
HK$88 連一杯紫薯Latte
上環摩羅街一帶小店林立，café、書店、古董店、畫廊、精品店多到數不清，最適合消磨一個下午時光。the Roaster, SteP by SteP就是其中一間格調café，紫薯甜品setting全部靚爆！小店墻上還掛滿本地畫家作品，食甜品同時兼賞畫，真係要喊一句C'est la vie !
Hkfoodprint：4層銅鑼燒加4層紫薯蓉，軟熟既銅鑼燒配上香濃紫薯蓉，口口都是紫薯香味。紫薯蓉只加入丁點嘅糖作調味，所以味道絕不死甜。再配上香甜雲尼拿雪糕，食落剛好中和紫薯甘苦味道，隨餐附上一杯紫薯latte，紫薯味不算非常濃，但正正適合係食完甜品後享用。
同場加映
2、紫薯棉花糖多士
HK$68
Poortravellers：多士烘得香口，上面的紫薯顏色相當薯，吃下紫薯味道夠出且香濃，棉花糖烤得微微外脆，棉花糖可以拉扯出微絲，煙韌，整體配合得相當好。
the Roaster, SteP by SteP
地址：上環摩羅上街26號地下
【西營盤】
3、 韓國亞朱媽紫薯年糕多士大戰雪糕
HK$63
自從地鐵西營盤站開通後，這一區的特色Café慢慢嶄露頭角，當中有一間韓國風甚濃的Seoulmate café，是人氣食店之一，週末前來點都要等上20分鐘才能入座。小店食物品種不多，當中一系列紫薯產品最受歡迎！
hey.food.here：兩片薄身烤得脆口既多士，面頭灑上紫薯粉，放上雪糕。多士中間夾住麻糬同埋紫薯蓉，入口微暖，滿口煙韌既麻糬同香甜既紫薯蓉，烤得脆身既多士中和左膩感。配上烤得香口既南瓜籽同杏仁片，更添香口。焦糖雪糕好甜膩，仲有粒粒脆脆焦糖係中間呢。身為紫薯迷既我就食到停唔到口。不過兩人食都會有啲膩，所以多多分享下就更正啦。
同場加映
4、紫得艷麗紫薯芝士蛋糕
HK$42
hey.food.here：紫得艷麗，芝士蛋糕中間夾雜住紫薯，軟身幼滑，入口即化。淡淡既紫薯味略嫌俾濃郁既芝士味覆蓋，但紫薯味道天然，亦算出眾。
Seoulmate café
地址：西環西營盤第三街83號
【旺角】
5、沖繩名物 紫薯空氣炸包
HK$ 30
沖繩料理在香港不是很常見，最近有一間位於朗豪坊的沖繩人氣炸包店Antoshimo Cafe & Bakery成功跑出，法寶之一就是鎮店之紅芋年糕！
Tungtunglaw：紅芋年糕即是我們說的紫薯年糕啦！炸麵包出到黎真係熱辣辣，要小心啲食！咬落去，就即刻食到餡，絕對唔係空氣包質素。紫薯餡唔太甜，年糕可能因為熱辣辣嘅關係，和芋蓉撈埋一起，食到佢凍凍地嘅時候，先可以好似卡通片咁拉到一條長絲出來！
Antoshimo Cafe & Bakery
地址：旺角亞皆老街8號朗豪坊10樓21-25號舖
6、超浮誇 栗香紫薯山
HK$65
旺角黑布街是有名的甜品區，街上幾間賣甜品的小店各有特色，每間店鋪都有不少忠實擁躉，Next Station Dessert以充滿實驗精神的Test Tube以及紫薯系列闖出名堂，而且店內裝修店以木和黑為主，感覺簡潔舒服， 非常適合三五friend傾偈。
iphosing9999：甜品擺放得好用心，利用左雪糕、紫薯泥同栗蓉製作左一隻「紫薯人」，加上糖飾配襯，極為精緻，完全滿足到大家「相機食先」的習慣。我很少吃紫薯甜品，這裡的紫薯質感綿密，微微嘅甜味，食落都幾特別。另外栗蓉配埋有少少果仁，口感食落幾香脆。
同場加映
7、紫薯窩夫
HK$62
oct: 紫薯窩夫味道唔錯，窩夫好厚身，烘得好香而且外脆內軟。入面嘅紫薯蓉落得好足，而且真係有好濃嘅紫薯味，啱曬各位紫薯迷！
Next Station Dessert
地址：旺角黑布街13號地舖
【跑馬地】
8、創意中菜 紫薯金沙球
HK$36
「早進來晚進來早晚進來」、「多吃點少吃點多少吃點」位於跑馬地的中菜館壹玖捌叁門口掛著這樣一幅對聯，及平易近人，又點名主題，讓人會心一笑這裡提供的精緻中菜，顛覆不少人對傳統中菜的印象。
eat_eat_everyday：煎堆般的流沙球十分脆，而且富有芝麻香。深紫的內層，散發著高貴，令人心花怒放。可惜紫薯味淡，味蕾嚐不到，只有看的份兒。流沙效果一流，但味道偏甜。
壹玖捌叁
地址：跑馬地載德街2-4號1樓
【大坑】
9、不離不棄 紫薯三兄弟
HK$48
Small Potato Ice Creamery雪糕店上年中開業，以「紫薯」為題，店內到處都見到別緻的紫薯裝飾公仔和大型墻畫。招牌雪糕有「紫薯味」及「海鹽味」，可加上不同的配料在雪糕上如：爆谷、日本芝士蛋糕、馬卡龍等。
Vi_lovefood：紫薯三兄弟，雪糕味道偏甜，質地幾滑，因為入面撈左紫薯蓉，所以食落啖啖紫薯幾飽肚， 而雪糕既紫薯味唔太重，不過紫薯蓉就好濃，所以夾埋都唔錯。上面既白玉煙韌好味，但抹茶厥餅就同紫薯有點格格不入。份量好大杯，一個人食半杯已經有d滯，$48都算抵食！
Small Potato Ice Creamery
地址：銅鑼灣希雲街28-30號地下
【大圍】
10、100%手製紫薯花花包
HK$ 33
隱藏於大圍小巷內的一間咖啡店，由兩位年輕人打理，有著夢一樣的名字，咖啡選擇不多,食物亦以輕食為多。店內供應的麵包全部是按時令食材製作，堅持手制麵包，今個冬季他們出品的紫薯花花包在IG上最受歡迎。
Applehoneyhk：上枱時還加已微微烘熱,入口倒真百份百真實紫薯，可惜就沒太大紫薯香,建議加點糖,提升味道，功夫最大可說是紫薯蓉要經過(篩)動作，功夫加心機$33這個價理應值價。
Dear Coffee & Bakery
地址：大圍積運街2-8號海福花園地下22號舖