吃喝玩樂

　　嘩嘩嘩，一年一度的AIA歐陸嘉年華又嚟喇！今年的歐陸嘉年華總共有29款機動遊戲，款式多元化，適合兒童，家庭以及喜歡挑戰刺激的朋友。此外，現場更有25個攤位遊戲以及送出一百萬個毛公仔，當中包括怪獸公仔、小小兵、小飛象、維尼熊等。咁多遊戲，花多眼亂，究竟有邊款機動遊戲必玩？又有邊個攤位遊戲最易贏到公仔？等小編同你總結一下「AIA歐陸嘉年華遊戲攻略」啦！

 

 

最「嚇到你心離一離之」的４大機動遊戲：

 

1.Starflyer極限飛天韆鞦（2015年最新遊戲！）

 

　　飛天韆鞦很多地方都可以玩，或者你會問「有咩特別姐？」但講明係「極限飛天」，就當然是非一般，Starflyer 40米高，坐上去都成十幾層樓高，本身都已經「驚驚哋」，再加上不斷旋轉下所產生離心力，每一下都好似要「飛出去」一樣，小編企喺下面都經已腳軟！至於風景呢，如果大家唔太驚，全程眼睛張開，都可以看清園內以及維港的美景！

 

 

驚嚇度：★★★★☆

 

2.DAS DUN SCHIFF極速巨浪海盜船（2015年最新遊戲！）

 

　　如果你以為只是普通海盜船咁簡單，你就太天真了，小編正正以為「小兒科」，就登船挑戰，誰不知呢隻海盜船，上到最高處有差唔多20米高，整隻船近乎垂直，成個人就好似企咗喺度咁，離心的衝擊近乎跳樓機！

 

 

驚嚇度：★★★★☆

 

3.NO LIMIT　瘋狂尖叫「無極限」

 

　　32米高的NO LIMIT，將你反轉再反轉，公轉再自轉，真係轉到頭都暈埋，小編每次行過，都聽到「無極限」的瘋狂尖叫聲，喜歡挑戰刺激的朋友，必定要一試！

 

 

 

驚嚇度：★★★★★

 

4.AtmosFear　

 

　　Atmos Fear 絕對稱得上係大驚嚇！十六個座位會作三百六十度旋轉，更會上下不停擺動，到時將會完全失去重心，帶來失重感覺，擺動的最高點達到二十四米，驚嚇程度爆哂分，少點心血都玩不了！

 

 

驚嚇度：★★★★★

 

下頁介紹親子輕量級機動遊戲

 

　　自問不是膽識過人的你，一樣有機動遊戲啱玩！

 

1.Super Giant Slide　巨人滑梯

 

　　這座充滿馬戲團色彩的高塔原來係瀡滑梯嚟架！其實上年都有，但呢個值得一玩再玩！行入去之前，首先要拎一張草氈，然後就可以進入塔內，行樓梯到塔頂，最後當然係沿著高塔的外圍瀡落嚟啦！

  

 

好玩度：★★★★☆

 

2.Doggems碰碰車

 

　　無論去到邊，碰碰車都一樣係咁受歡迎！大家一上車就可以一嘗橫衝直撞的快感，全程笑不停，個心就淨係諗住點樣喺車群中撞嚟撞去，又唔危險，真係好好玩！

 

 

好玩度：★★★★★

 

3.Bavarian Fun House　逃出機關屋

 

　　Bavarian Fun House是一個室內闖關遊戲，大家進入後就在屋中穿梭行走，入面有多個機關，每一步都會遇上不可預測的機關！ 

 

 

好玩度：★★★★☆

 

下頁帶你玩盡攤位遊戲，話你知邊個最易贏公仔！

 

　　嘩嘩嘩，現場有25個攤位遊戲，送出一百萬個毛公仔，咁多遊戲，花多眼亂，又有邊個攤位遊戲最易贏到公仔？小編玩盡所有攤位遊戲，同你總結一下「攤位遊戲必勝攻略」啦！

 

 

1.「怪獸公司」小木樽保齡球

 

 

玩法：利用木球，將所有保齡樽推倒即贏。四次機會，一次便能推倒所有保齡樽可得特大獎；兩次將保齡樽全倒，可得大獎；如此類推。

 

 

所需代幣：2（4次機會）

難度：★☆☆☆☆

公仔吸引度：★★★★☆（這攤位送出的毛毛同大眼仔，實在太可愛了！）

Tips：只要「出盡全力」將球推出去，就可以把保齡樽撞跌，輕鬆贏得怪獸公司公仔， 

 

 

2.「小小兵」牛奶樽

 

 

玩法：將球拋進牛奶樽內。四次機會，一次拋進牛奶樽可得特大獎；兩次拋進牛奶樽，可得大獎；如此類推。

 

 

所需代幣：2（4次機會）

難易度：★★★☆☆

公仔吸引度：★★★★☆（有多款造型小小兵任你揀，包括：吸血鬼、英國士兵等）

Tips：因為距離很近，所以只要學似「打籃球」射籃般，就能輕易入樽，不過千萬記住要輕力投球！

 

 

3.滾動七彩珠

 

 

玩法：將七彩珠碌至有數字的洞，4球的數字總和達100分或以上便得獎。

 

 

所需代幣：2（4次機會）

難易度：★★★☆☆

公仔吸引度：★★☆☆☆（普通一隻熊仔，不算太吸引，但勝在易玩，易中獎。）

Tips：其實沒有技術可言，只要將球推出，就會停在洞上，不過要中高分數的洞，就需要一點運氣，100分的洞有兩個，亦有4個50分洞，所以玩一兩次都有可能中到大獎，是易玩易中獎的遊戲！

 

話咁快，又中咗一隻公仔啦！

 

場內其他公仔，包括：胡迪，巴斯光年。

 

冰雪奇緣小雪人

小飛象

粉紅色史迪仔

巨型白熊／熊貓

 

下頁介紹園內影相位！

 

　　場內亦設有多個影相位，大家玩樂的同時，不妨拍照呃LIKE！

 

1.浪漫馬車－女生可以一嚐公主夢，與另一半拍攝童話般的照片！

 

 

2.冬日雪地－香港竟然都有雪景？坐在長椅上，或者單車旁拍照，畫面都超美哦！

 

 

3.遊覽世界－場內有多個國家的象徵性地標，包括英國的鐘樓、法國的巴黎鐵塔等。

 

 

4.三隻小豬－大家可以與朋友化身成三隻小豬以及大灰狼，拍下有趣的照片！

 

 

5.溜冰場－溜冰場上與朋友一人一隻「學行」海獅，在一片白茫茫的冰雪上拍照，充滿樂趣！

 

 

6.旋轉木馬－浪漫的代表，是必拍的影相位！

 

 

7.嘉年華夜景

 

最後當然要同「勝利品」合照啦！

 

　　嘉年華尚有不少設施未開放，包括小編最期待的濕身飛船Log Flume以及充氣遊樂設施，日後開放以後，必定入場再大玩特玩！

 

 

友邦歐陸嘉年華 AIA

日期：12 月 17 日至 2016 年 2 月 21 日

時間：11am - 11pm

地點：中環海濱活動空間

門票：成人 $125（包括十個代幣）；小童、長者或殘疾人士 $90（包七個代幣）

查詢：2524 6433