同事間有種親密，叫「距離」
「你返工有無朋友架？」同事T在電梯內問，殺我一個措手不及。若是新仔同事問，我會理解為稚氣讓辦公室充滿人情味；不過T已經不是新仔了，而且最近還升職任主管級，照計不會再問這樣沒水準的問題。
「不如咁講，想請教下你，點樣先可以好似你咁，做到咁高級，人緣都咁好。就係咁喇，無端白事都會有人好似我而家咁，向你打開心窗。」見我畀不出反應，醒目的T來個醒目的兜，我暗自高興「果然無升錯你」；但同時，一想到他剛才的問題，就擔心「唔通升你反而害咗你」？
T提起，我才意會到……升職前，他有一班飯腳，每逢Lunch time都會柴娃娃圍威喂食飯去；升職後，他卻一個人去開餐，剛好在電梯遇上我。
「有無約人？不如一齊食。」跟同事食飯，我列入工作範圍之一，而且本人對於和T食餐飯這件事，並不抗拒。
「其實……好難做呀可……我意思係，做管理。」T吞吞吐吐，可能對我有點戒心，道理大概與他的「被下屬」同事對他起了戒心相同。
「嗯，其實都係架，因為Human Resources Management在學術上可以分為x個層面。拿，單就Recruitment呢個範疇，已經唔容易；另外一個挑戰，就係計糧。你知唔知計糧壓力幾大……blablabla」我一輪咀，既沒尾音亦不停頓，極盡囉唆及聽唔明之能事。
果然不出所料，非人力管理專業的T聽到一頭霧水，正中下懷。「嗯，係好唔簡單。」明顯聽得出，他分明hea應。
「哈哈哈！」我忍不住爆笑。「係咪好難頂？」我望望T，見他有難言之隱，繼續︰「話不投機哩！但又唔敢講哩！下次唔敢應承我食飯哩！」
T望著我，眼神相當複雜，既不能同意更多，卻不能表示同意。
「咪係囉，己所不欲，勿施於人。何必勉強要人同你食飯？上司同下屬呢，係可以做朋友嘅，但大前提係雙方都做到公私分明。照你地而家呢個狀況嚟睇……保持距離好啲囉。」我沒有問他明天要不要一起Lunch，幸而他也沒問。
世界上有一種親密的關係——叫做「保持距離」。
原文刊載於ctgoodjobs.hk