過往專欄

　　返工日踩至少8粒鐘，湊完客湊老細再湊啲細，已經夠煩人。身為OL，每朝出門口前更要係屋企上演一場「前哨戰」，兼過以下8關︰

1/ 明明爆櫃都覺得無衫著

　　一開衣櫃就山泥傾瀉咁款，發現恤衫原來未熨、想著條裙又未洗、著One piece又唔襯對鞋......儘管面對有一大堆衫，仍然係望唔透。

2/ 前一晚襯好咗，但第二朝唔想著

　　有時候驚趕唔切，就會係週末或者前一晚襯好一套套衫，諗住一起身就換得。點知，是日M到、心情不佳諸如此類，最後都係開返個衣櫃嚟睇吓。

3/ 日日睇天氣做人

　　著衫睇自己心情，仲要睇個天嘅心情。撞正季節交替，忽冷忽熱最難揀衫；如果遇上陰晴不定嘅日子，仲要出動水靴等防水裝備。

4/ Accessories失晒蹤

　　襯著咩衫未夠，下一步仲要諗戴咩耳環、手鏈、頸鏈等配飾。首先會發現想戴嘅耳環少咗一隻、手鏈、頸鏈翹埋一堆。就算好彩畀你搵到，到頭來總會發現唔襯套衫。

5/ 化妝好似開戰

　　化妝是一大重點，但每朝時間趕急，打底、畫眉、畫眼線，戴Con等等，少啲心機都會破壞大局，眼瞓手震令到眼線離地，於是又要重頭嚟過。

6/ 個頭吹極都唔掂

　　瞓完一晚，個頭唔係「扁」咗，就係變成「奧米加頭」，無時間洗頭再吹，而濕水吹都好似於是無補。只可以講一句︰「頭髮，生性吧。」

7/ 換袋倒瀉咁倒

　　「手挽」定「單邊」？換袋幾乎係OL每日必做之事，但要袋入面所有嘢完整地「過檔」並非易事，總會漏咁一兩件唔記得帶。

8/ 著新鞋大冒險

　　最後一項挑戰，係著新鞋。鞋頭「夾腳趾」已經係小事，最痛苦莫過於腳踭刮腳，行返公司仍需努力，返到公司又要周圍搵膠布急救。

　　最後得出嘅結論係︰OL能夠準時返工，堅係值得加許嘅！

　　「土壤論」，我查勻網上，也找不到，但這種定論，在中六時，已在腦中萌芽。

　　乜意思？正是，一粒種子，放在某一種土壤上，只要正常施肥灌溉，就會茂盛地開花結果；不過，同一粒種子，放到不合適的土壤上，就算正常施肥淋水，卻可能一日內凋萎，又或，無法開花結果，就算有，也是瘦弱不堪，難抵風雨。

土壤，對任何植物及人才皆十分重要，關乎生與死！

　　點解中六時開竅？因會考成績普通，故被一間高水準的名校請離，改報讀一間低水準的普通書院。就此，變「虎入羊群」，個人突然信心飛升，學業成績立時大進。

　　那年，我開始明白，每個人都有不同天份不同能力，對環境的適應也有所不同，故此，一定要爭取自己落在適當的土壤。

　　講個真實經歷，1987年某一個晚上，仍在公司處理文件時，收到「敵對」機構老闆電話，劈頭就話：「想約你晚飯，可以嗎？」

　　當時，我即時反應：「好，請通知時間地點！」

　　放低電話才知，弊，被上司知道咪死得？竟與對家阿頭單對單晚飯？間諜行為喎！

　　立即找上司通報，佢笑哈哈大方講：「你咪去囉，呢類邀請，我不時都有啦，即係你有料到呀 ！」

　　準時赴會，對方單刀直入：「阿碌，我想挖你過嚟幫手，人工加一倍，職位在我之下！睇好你，不應只做目前的職位，浪費才華！」

　　幸而，我早早有「土壤論」的掌握，禮貌回答：「今晚見面，正因仰慕你在業內的過人貢獻，有機會共飯，是項榮耀。不過，自己知自己事，我的能力、喜好及天份，百分百只適合公營機構；事實，也做得很開心，並得到上司賞識，故準備服務終身，絕不考慮轉機構。但無論如何，謝謝你你的賞識及好意。」

我自知只適合做不以牟利為目標的公營廣播，商營的「土壤」，絕對不利發揮潛能。

　　結果？哈哈，這餐飯有點「不歡而散」，因當年這個小子真是「不識抬舉」。

　　從此，與這位大老闆在任何場合碰見，佢必立時轉身，絕不打招呼。

　　故事繼續下去，此君終於搵咗另一敝機構猛將加盟。不過⋯⋯未夠半個月已「一拍兩散」。這正是掉到不適當土壤中的惡果。

 有土壤也要有栽培者，我的，正是吳錫輝。

　　今日講此主題，因小弟認識眾多香港名廚，上周有位阿A約見，擺明心緒不寧。

　　A君乃香港某大飲食集團靈魂，捧場客眾多，老闆錫晒，剛剛又再蟬聯米芝蓮。

　　突然，對頭大集團老闆約見，拿出空白支票：「我誠意邀請，年薪任開，你填啦。過嚟之後，將再開10間不同品牌店你管！」

　　小弟一五一十將「土壤論」詳細解釋， 阿A若有所思。究竟決定如何，未知。

沈殿霞也是最佳「土壤論」人物，一如不少早年TVB藝人，一過檔亞洲電視，立即黯然失色。

　　英語有云，想一個人成功，就put the right people in the right place；相反，想佢死，就put the right people in the wrong place！