世事政情

　　專欄作家屈穎妍一篇《我不是建制派》文章，噚日喺建制派群組瘋傳。其實原因非常簡單，屈小姐一文，不但觸動藍營支持者對政府抗疫措施嘅不滿，更同時喺議會現時零反對派議員看守之下，挑起建制派進一步「反省」。長久以來，特別係自反修例事件以來，建制派「保皇黨」嘅角色，會否進一步蠶食佢地嘅票源，個個依家都諗緊計點同林鄭割席。

　　有建制派議員就指出，屈穎妍篇文章喺藍營群組不斷相傳，某程度上已經係為林鄭判咗刑，「選民傳畀你同你講，屈小姐篇文寫得真係好，你夠唔夠膽幫林鄭講好說話？我肯定無議員咁蠢，仲敢孭住林鄭呢個計時炸彈！」

　　本地藍營反林鄭情緒升溫以外，內地部分人對林鄭嘅睇法，亦都係越趨負面。有同唔少內地地方官員相熟嘅政協同Tina講，今次爆發第四波一發不可收拾，內地官員私下微信佢問候香港情況之時，無不加入批評林鄭之列。呢啲內地地方官指出，以林鄭今時今日嘅抗疫成績，特別喺阿爺派專家落嚟幫手抗疫之後都搞成咁，丟盡阿爺架，換轉喺內地，林鄭早早已經被「人頭落地」，官運亦已經劃上句號，「肯定早早就可以日日同老公傾計」。更令香港周邊地區嘅內地官員不滿嘅係，香港爆到七彩，好容易將疫情帶返去內地，到時一個唔小心喺內地爆發，被炒嘅又會係內地官員，「你話內地官員見到林鄭嘅所謂抗疫措施，點會唔佛都有火？」

　　咦？如果內地官員都咁睇林鄭，咁林鄭咪連任無望？呢位政協就話，單單睇抗疫成績就梗係滿江紅，肯定無得留低，但問題係香港形勢太複雜，大前提係要有一個人阿爺信得過而又肯做特首嘅先得。聽講背後有唔少曾經諗過下染指特首嘅商界精英，諗起將來可能成屋現金，甚至被制裁到周圍都去唔到，依家再探下路睇下對寶座仲有無興趣，個個都耍手擰頭，「只可以話2022要選嗰陣係點無人知，但今日林鄭個位仍然係好穩陣。」

　　咁，似乎罵林鄭將會成為建制派選舉之前嘅主旋律，但罵嘅只會留喺本地政策、抗疫措施，但凡涉及同內地融合嘅，建制派仍然係會自覺咁埋位。

　　如果問依家有咩嘢可以令到全香港市民槍口一致嘅，的士業可以話係唯一。自從有的士行家自行放蛇捉Uber司機之後，全香港市民(除咗的士從業員)都齊心聲討的士行業，將過往坐的士受過嘅冤屈氣都發晒出嚟。雖然的士業將會有重組，推出的士車隊，而的士業最近亦都搞禮貌活動，但都無阻政府全面檢討網約車規管嘅決心，似乎政府已經心裡有數，香港即將落實Uber合法化。

　　Tina最近同一位執法部門高層飯局，佢就直言，Uber今時今日喺夾縫之中生存，擺到明就係得到政府嘅首肯；Uber嘅業務肯定唔會係合法，以政府今時今日嘅行政主導，再加上警隊嘅雷厲風行，有心要打擊Uber的話，肯定佢地明日就連上線都上唔到。「點解政府唔郁手？最重要就係Uber解決到的士行業永遠都解決唔到嘅問題：唔會揀客、唔會拒載、唔會濫收車資，所有行程都有後台去監察，有咩問題都投訴有門。更重要嘅係， 政府依家係要『無處不旅遊』，全世界大部分嘅旅客都會有Uber App去叫車，Uber就正正係幫到政府解決呢個大難題，試問的士業又點會有條件去同政府講數？」

的士業最近推行禮貌活動，但無阻政府全面檢討網約車規管（資料圖片）

　　有立法會議員就坦言，Uber所代表嘅網約車行業喺全世界都已經證明咗畀的士更有效率，而內地更加係其中之一，「網約車喺內地成行成市，亦都見到網約車同的士係可以拼行，你好難同阿爺講點解香港就只可以有的士而無網約車」。不過呢位立法會議員亦都坦言，特區政府亦都有責任平衡各方利益，全面開放市場令到的士牌價大幅下跌亦都唔係政府願意見到，所以佢都私下建議，下一步開放網約車的話，亦都要將網約車同的士嘅功能劃分，「的士可能係繼續打大眾化市場，而網約車就可以定更高嘅價格，係畀啲捨得花更多錢買服務嘅人士，咁就各有各嘅市場，河水不犯井水。」

　　議員亦都向的士業界派定心丸，認為如果網約車合法化，網約車司機亦都要喺規管之下營業，咁就自然要交牌照費、更高嘅保險費等等，「佢地嘅經營成本亦都會大增，唔會好似依家咁，有車牌、有架車就可以做，所以估計只會有部分網約車司機會正式登記，某程度上亦都會令到客源流返去傳統的士業嗰邊，同依家比，應該係有利無害。」