世事政情

　　完善選舉制度嘅條例草案，好快就會去返立法會恢復二讀同三讀。其實由開始推出到依家就快三讀，好多政圈中人都心裏明白，成份草案可以修改嘅空間，特別係喺各界別組成部分，根本就係細到無得再細，所以Tina一直以來，都唔係好聽到有界別嘅人「夠膽」喺當權者面前當眾講一句不是，唯獨「阿姐」汪明荃打破呢個沉默。

　　阿姐日前獲邀出席特首林鄭月娥主持嘅《選委界別分組面面觀》節目，一開始阿姐斬釘截鐵咁話，體演文出界議席由原本60席減到得返30席，「而且唔係全部直選，有15席係透過3個指定團體，有15個又經過另一個稱為表列團體，政府已立法，變成好多人都無機會，又點可以代表？有一半聲音無咗，他們當然有很多不滿。」

（節目片段截圖）

　　喺一個叫《選委界別分組面面觀》政治味咁濃嘅節目，阿姐咁問法，如果係幾年前嘅香港，貼題之餘，仲可以話係天經地義，唔單止佢業界，甚至係普通市民都覺得言之成理。之但係今時今日，政治氣氛大不同，就連林鄭都笑住口回應：「阿姐，你問咗啲好政治性嘅問題」。從呢個回應Tina可以想像得到，林鄭由始至終都無諗過，會有一個受訪對象、仲要係咁老資歷嘅人大政協，會咁直接去問呢條大家心入面都想問嘅問題，或者林鄭一早已經預計，對於新選舉制度嘅標準答案大家都會話「好好呀，雖然少咗票，但更加體現到均衡參與同有廣泛聲音」，阿姐呢個講法，絕對係「政治性」。

　　阿姐喺節目上面嘅單刀直入質問特首，比起立法會議員謝偉俊口中所講嘅官員表現，可以話係可圈可點。謝偉俊噚日喺立法會討論民建聯張國鈞提出嘅「改善施政」無約束力議案時話，有好多司局長私下反映「平日不敢或不想表達意見」，認為政府有一言堂文化，導致政策有盲點同離地。Tina立即同建制派打聽，被打聽對象都話，過去幾個月周不時都聽到類似嘅消息，特別係喺防疫抗疫之上，林鄭「一言堂」形象係非常鮮明，包括要求食肆員工打針先可以放寬、去到要菲傭打咗針先畀續約，都係容不下反對意見，所以大家都係按指示做嘢，唔敢直言相諫。阿姐同官員嘅表現，真係可以話相映成趣。

　　不過正如林鄭名句「官到無求膽自大」，阿姐嘅唔係官、地位超然，自然無求，膽大好正常。至於一眾官員，心中有求定無求，大家都清楚明白，就連林鄭自己仲夠唔夠膽講多一次自己係「官到無求膽自大」都好難講。只可以話，阿姐嘅坦白，今時今日來講，尤見珍貴。

　　如果問依家有咩嘢可以令到全香港市民槍口一致嘅，的士業可以話係唯一。自從有的士行家自行放蛇捉Uber司機之後，全香港市民(除咗的士從業員)都齊心聲討的士行業，將過往坐的士受過嘅冤屈氣都發晒出嚟。雖然的士業將會有重組，推出的士車隊，而的士業最近亦都搞禮貌活動，但都無阻政府全面檢討網約車規管嘅決心，似乎政府已經心裡有數，香港即將落實Uber合法化。

　　Tina最近同一位執法部門高層飯局，佢就直言，Uber今時今日喺夾縫之中生存，擺到明就係得到政府嘅首肯；Uber嘅業務肯定唔會係合法，以政府今時今日嘅行政主導，再加上警隊嘅雷厲風行，有心要打擊Uber的話，肯定佢地明日就連上線都上唔到。「點解政府唔郁手？最重要就係Uber解決到的士行業永遠都解決唔到嘅問題：唔會揀客、唔會拒載、唔會濫收車資，所有行程都有後台去監察，有咩問題都投訴有門。更重要嘅係， 政府依家係要『無處不旅遊』，全世界大部分嘅旅客都會有Uber App去叫車，Uber就正正係幫到政府解決呢個大難題，試問的士業又點會有條件去同政府講數？」

的士業最近推行禮貌活動，但無阻政府全面檢討網約車規管（資料圖片）

　　有立法會議員就坦言，Uber所代表嘅網約車行業喺全世界都已經證明咗畀的士更有效率，而內地更加係其中之一，「網約車喺內地成行成市，亦都見到網約車同的士係可以拼行，你好難同阿爺講點解香港就只可以有的士而無網約車」。不過呢位立法會議員亦都坦言，特區政府亦都有責任平衡各方利益，全面開放市場令到的士牌價大幅下跌亦都唔係政府願意見到，所以佢都私下建議，下一步開放網約車的話，亦都要將網約車同的士嘅功能劃分，「的士可能係繼續打大眾化市場，而網約車就可以定更高嘅價格，係畀啲捨得花更多錢買服務嘅人士，咁就各有各嘅市場，河水不犯井水。」

　　議員亦都向的士業界派定心丸，認為如果網約車合法化，網約車司機亦都要喺規管之下營業，咁就自然要交牌照費、更高嘅保險費等等，「佢地嘅經營成本亦都會大增，唔會好似依家咁，有車牌、有架車就可以做，所以估計只會有部分網約車司機會正式登記，某程度上亦都會令到客源流返去傳統的士業嗰邊，同依家比，應該係有利無害。」