世事政情

　　全國政協副主席、國務院港澳事務辦公室主任夏寶龍上星期五出席「香港國安法實施一周年回顧與展望」專題研討會，國安法係主菜之外，夏主任仲特別提到，「希望香港可以告別劏房、籠屋」。一句說話，據聞令到特區政府管治班子，特別係負責房屋政策嘅都如坐針氈。

　　夏主任開得聲要告別劏房、籠屋，期望現時特區政府嘅主事人能夠立即交到功課的話，都認真係不切實際，但問題係，內地主事香港嘅官員已經唔係第一次談論香港嘅房屋問題，證明喺阿爺心目之中，香港近年出現嘅「亂」，「因」都係房屋問題。阿爺推行《國安法》令香港回復平穩，之後都係要港府自己去處理個「因」，夏主任都已經放話，特區政府起碼都要有個「告別劏房籠屋」路線圖同時間表，要見到隧道係有盡頭。

(資料圖片)

　　不過呢個香港歷久都未能夠解決嘅問題，真係可以靠政府搞得掂？根據統計處根據2016年中期人口調查公布全港劏房最新統計數字，全港約有2.7萬個屋宇單位有分間劏房，劏房估計約有9.3萬個，呢啲分間樓宇單位有近21萬人住緊，每住戶平均人數為2.3人。記住，呢個都只不過係2016年嘅數字，隨著香港樓價再創新高，貧富只有愈來愈懸殊，最新數字只會有增無減，究竟政府要點想覓地建公屋去安置呢批人？係唔係安置到佢地私樓價格就會回落令到更多後生仔女能夠無父蔭之下都可以置業？

　　Tina同一位建制派朋友呢個周末Afternoon Tea時傾開，佢就話夏主任放話之後，特區政府高層，特別係同土地、房策嘅都真係非常緊張。朋友估計，新上任嘅政務司司長李家超仍然係主力喺各方面落實國安法，所以特首同埋土地房屋嘅官員，甚或至係財爺等等，為交功課喺呢屆政府任期完結之前，解決劏房、籠屋問題可以話係成績表之中比重最高嘅項目。朋友仲話：「林鄭最近興走數，但呢條數佢一定唔敢走，佢走的話，真係走得(無得連任)！」

　　如果問依家有咩嘢可以令到全香港市民槍口一致嘅，的士業可以話係唯一。自從有的士行家自行放蛇捉Uber司機之後，全香港市民(除咗的士從業員)都齊心聲討的士行業，將過往坐的士受過嘅冤屈氣都發晒出嚟。雖然的士業將會有重組，推出的士車隊，而的士業最近亦都搞禮貌活動，但都無阻政府全面檢討網約車規管嘅決心，似乎政府已經心裡有數，香港即將落實Uber合法化。

　　Tina最近同一位執法部門高層飯局，佢就直言，Uber今時今日喺夾縫之中生存，擺到明就係得到政府嘅首肯；Uber嘅業務肯定唔會係合法，以政府今時今日嘅行政主導，再加上警隊嘅雷厲風行，有心要打擊Uber的話，肯定佢地明日就連上線都上唔到。「點解政府唔郁手？最重要就係Uber解決到的士行業永遠都解決唔到嘅問題：唔會揀客、唔會拒載、唔會濫收車資，所有行程都有後台去監察，有咩問題都投訴有門。更重要嘅係， 政府依家係要『無處不旅遊』，全世界大部分嘅旅客都會有Uber App去叫車，Uber就正正係幫到政府解決呢個大難題，試問的士業又點會有條件去同政府講數？」

的士業最近推行禮貌活動，但無阻政府全面檢討網約車規管（資料圖片）

　　有立法會議員就坦言，Uber所代表嘅網約車行業喺全世界都已經證明咗畀的士更有效率，而內地更加係其中之一，「網約車喺內地成行成市，亦都見到網約車同的士係可以拼行，你好難同阿爺講點解香港就只可以有的士而無網約車」。不過呢位立法會議員亦都坦言，特區政府亦都有責任平衡各方利益，全面開放市場令到的士牌價大幅下跌亦都唔係政府願意見到，所以佢都私下建議，下一步開放網約車的話，亦都要將網約車同的士嘅功能劃分，「的士可能係繼續打大眾化市場，而網約車就可以定更高嘅價格，係畀啲捨得花更多錢買服務嘅人士，咁就各有各嘅市場，河水不犯井水。」

　　議員亦都向的士業界派定心丸，認為如果網約車合法化，網約車司機亦都要喺規管之下營業，咁就自然要交牌照費、更高嘅保險費等等，「佢地嘅經營成本亦都會大增，唔會好似依家咁，有車牌、有架車就可以做，所以估計只會有部分網約車司機會正式登記，某程度上亦都會令到客源流返去傳統的士業嗰邊，同依家比，應該係有利無害。」