世事政情

由於呢個星期突然爆出多單猛料，所以今期專欄分別就人大選舉同錯播國歌事件同大家八一八啲花邊消息。

一、人大選舉

　　立法會補選提名期已經完咗， 4個補選位置將會由6人爭奪，估唔到同期舉行嘅人大選舉先係眼球焦點所在。噚日有媒體報道，由於人大常委譚耀宗由於已經有返咁上下年紀，所以佢就唔會再尋求連任，取而代之嘅，可能會係前特首林鄭月娥。

　　呢單傳聞傳出之後，Tina即時反應就係「唔係呀嘛！」，立即打電話俾政圈朋友打聽。大家都話對於呢個傳聞絕對係難以想像，事前更加係諗都無諗過。其中一位熟悉內地政治體制嘅圈中人指出，林鄭嘅地位當然夠晒料去做呢個位，履歷表上唯一較差嘅就係林鄭多年來喺香港官場打滾，其實係對內地法律體制無深入認識，要做常委的話絕對係要先行做好多功課先接到手。不過呢位圈中人就話，「好打得」又「考第一」嘅佢，呢啲都只不過係碎料。

　　林鄭接手譚Sir做人大常委嘅最大問題，就係會令林鄭多好多面對傳媒嘅曝光機會，因為一旦涉及人大立法又關香港嘅事，媒體都係直接搵譚Sir，林鄭取而代之的話，加上佢前特首嘅身份，上鏡嘅機會只會有增無減。讀者應該都記得，過往前特首梁振英都不時喺社交媒體對林鄭政府指指點點，惹來不少風風雨雨，到後來先有所收斂，如果林鄭做咗人大常委，少不免都要對一啲涉及國家同香港嘅政策點評，到時又會唔會令到李家超政府尷尬呢？呢個絕對係考慮要點。另外有人話以佢曾經係一區之首嘅身份去做人大常委，身份上絕對係唔匹配，不過Tina認為，呢個唔會係林鄭考慮之列，只要有位畀佢繼續服務國家，林鄭係一定會做。就睇下嚟緊林太會唔會再次站喺鎂光燈之下。

二、國歌風波

　　周初掀起嘅香港欖球隊國歌風波，雖然有唔少立法會議員喺施政報告致謝議案之中對事件抨擊香港欖球隊，但係去到周末前似乎已經熄咗少少火。

　　事件由一開始未搞清楚責任誰屬，建制派KOL蜂湧而出諗住「港獨再現」，甚至有人諗住要去韓國領事館抗議，到依家發現極可能係韓國方面一啲超低級錯誤導致發生事件，反而轉口向香港欖球隊問責，仲有議員要求解散欖球隊。

　　其實Tina就唔多明白呢班指責欖球隊員嘅建制派議員邏輯所在，運動員一向都專注於運動上表現，要佢哋能夠滴水不漏咁處理呢件突發嘅政治事件，絕對係強人所難，更何況呢班球員之中大部分都係非華人，將問題指向一班被問題所影響嘅人身上，係唔係議員應有之言？Tina認同整個香港體育界應該要汲取教訓，訂立一個應對方式以免再有咁尷尬嘅情況再次出現，但你話要批鬥到懲處呢班唔係佢哋做錯嘅運動員，只會令人心寒。

　　負責為全港超過19萬公務員制定薪酬調整幅度指標嘅「薪酬趨勢調查委員會」，剛剛喺噚日（16日）公布最新嘅2024年薪酬趨勢調查報告，各級公務員加薪淨指標，分別係高級公務員4.01%、中級公務員4.32%同埋低級公務員5.47%，遠遠超過之前市場預期嘅3%至4%。

　　消息一公布，市面「嘩嘩聲」四起，事關成4%至5%人工加幅，對私營市場九成打工仔近幾年嚟講，都係遙不可及。有熟知政府運作嘅政界中人就話，每年嘅薪酬趨勢調查委員會報告，都令到政府高層頭都大埋，佢形容：「私營機構加幾多人工，梗係睇吓公司去年盤數同埋預測未來2、3年經營狀況去決定，簡單好多；但政府加幾多人工畀公務員，要考慮嘅因素唔單止係自己個荷包，仲要睇埋對私營市場嘅影響，絕對係政治學上一門高深學問。」

　　今年公布呢個遠超市場預期嘅加幅，絕對係令到政府處於幾尷尬嘅局面。如果跟足建議去加人工，好處當然係公務員士氣獲得提振，有助現屆政府繼續積極推行各項政策，等下面嘅公務員「攰死」之餘，起碼荷包得以充實。不過現時市場經營環境並唔係一面向好，以往一直係「天之驕子」嘅金融機構更加出現裁員情況，中小企更加喺北上消費熱潮之下「得個做字」，街上、商場吉舖處處，如果政府帶頭加足5%薪酬，對私營市場絕對係沉重打擊。

薪酬趨勢調查委員會建議嘅公僕加薪幅度，遠超市場預期。(Shutterstock)

　　喺面對千億財赤、儲備跌到得番7000億元、政府甚至要加大發債去支持基建項目嘅時候，加薪5%，講緊每年開支要增加超過60億元，政界中人就話：「呢頭你話政府唔夠錢要研究加呢樣收費、減嗰樣使費，到頭來加人工就要每年使多60億至70億元，試問又點樣同市民交代？」

　　而加唔足嘅話，對政府運作亦有唔少影響。有公務員朋友形容，呢幾年行政主導勢頭之下，個個局都要交足功課，上面有任何諗頭，做細嘅就要出頭，唔少部門嘅中高層都做得辛苦過出名工時長嘅四大核數師行，夜晚10點後收工都係等閒事，「人工加得唔夠好，可能就會令到人手流失加劇，特別係30幾歲中層嗰班，佢哋有政府工作經驗，行出去好多私營機構都爭住要，政府人工加唔夠，呢班中堅走咗就好難再填補」。

　　有立法會議員就私底下透露，早排都已經有評論認為公務員要減人工去同政府庫房共度時艱，不過佢自己就覺得，呢種講法無非都係社會嘅一種怨氣，「要解呢口怨氣好簡單，只要最高嗰班官員唔加人工之餘仲自願凍薪，甚至減人工，輿論就自然會覺得高層有承擔，呢啖氣就自然吞得落，下面加得足又點話呢！」