世事政情

　　香港好唔容易捱過咗疫情、捱過咗令回歸以來最大嘅政治動盪，當所有人都喺依家經濟環境極不明朗嘅情況之下，希望能夠真係可以慢慢復常，但點知你唔搵政治，政治都係會搵上門，仲要係政府搵上門。

　　事緣中環有一間快餐店門外有一幅超過十年歷史嘅塗鴉壁畫，因為係畫兩個戴住黃帽嘅地盤工人，點知近月就有市民向政府投訴幅畫令佢聯想到港獨，最後餐廳突然收到中西區民政處嘅通知，話幅畫存在可能「或構成國安法法律風險」，最後喺餐廳店主同意之下（因為係私人地方），被當局清除咗。事件曝光之後就惹來輿論爭議，件事亦牽涉到幾個層面討論。

　　首先，當然係幅畫喺「黑暴」之前已經存在，而明眼人一睇亦都睇到畫緊嘅係地盤工人，咩人睇到咩事，有市民咁有聯想力都惟有讚佢妙想天開，但政府當局收到投訴之後，究竟有無考慮過幅畫已經存在咗喺嗰度超過十年？有無考慮到幅畫作嘅原意係乜？係咪有任何人投訴一啲嘢涉及國安，政府部門條線就要劃到去有咁左得咁左？

(Google街景網頁截圖)

　　其次就係事件曝光之後，民政處嘅解釋真係令人丈八金剛。佢地回覆傳媒查詢時話，當時並未有提及壁畫涉及違反國安法，只不過提到「或構成國安法法律風險」。試問一般小市民眼中，見到政府部門話你「或構成國安法法律風險」，佢地會有咩諗法？唔通仲可以好平常咁嘅繼飲茶食包？

　　最後一個值得討論嘅點，係民政署做呢個決定之前，竟然無向國安處徵詢專業意見而自行作出有關決定。要知道執行國安法嘅主要部門就係國安處，佢地理應係最有專業知識去判斷究竟是否涉及國安，民政處管嘅係民政事務，國安嘅嘢真係「識條鐵」，唔識之下竟然連問都唔問，下個咁錯嘅判斷，咁就真係會令到所有喺香港生活嘅人，無論係本地定係外地人都不禁心寒，因為真係唔知所有政府部門都係會拎呢把尺去自己判斷，萬一自己唔小心拎住把黃雨傘、戴住頂黃帽影張相就被人扣帽子，令自己跌入政治旋渦之中。試問喺咁嘅氛圍之下，仲有無外資願意喺香港投資？有無人仲有心情去推動夜消費？點解政府主動咁將一啲小市民推向政治旋渦之中？

　　暫時立法會之中得一個新界北直選議員張欣宇出聲關注，事發所在地嘅港島西兩位議員葉劉淑儀同陳學鋒都未有主動開聲會跟進協助。Tina只係希望，完善咗選舉制度之後嘅立法會議員，唔好以為搞個「好聲音」大家齊齊唱下歌表演下就話係與民同樂，做咗嘢，真正嘅「歌舞昇平」，係要成個社會唔會噤若寒蟬、樂於表達意見，「好聲音」之餘，亦希望佢地「出聲音」。

　　負責為全港超過19萬公務員制定薪酬調整幅度指標嘅「薪酬趨勢調查委員會」，剛剛喺噚日（16日）公布最新嘅2024年薪酬趨勢調查報告，各級公務員加薪淨指標，分別係高級公務員4.01%、中級公務員4.32%同埋低級公務員5.47%，遠遠超過之前市場預期嘅3%至4%。

　　消息一公布，市面「嘩嘩聲」四起，事關成4%至5%人工加幅，對私營市場九成打工仔近幾年嚟講，都係遙不可及。有熟知政府運作嘅政界中人就話，每年嘅薪酬趨勢調查委員會報告，都令到政府高層頭都大埋，佢形容：「私營機構加幾多人工，梗係睇吓公司去年盤數同埋預測未來2、3年經營狀況去決定，簡單好多；但政府加幾多人工畀公務員，要考慮嘅因素唔單止係自己個荷包，仲要睇埋對私營市場嘅影響，絕對係政治學上一門高深學問。」

　　今年公布呢個遠超市場預期嘅加幅，絕對係令到政府處於幾尷尬嘅局面。如果跟足建議去加人工，好處當然係公務員士氣獲得提振，有助現屆政府繼續積極推行各項政策，等下面嘅公務員「攰死」之餘，起碼荷包得以充實。不過現時市場經營環境並唔係一面向好，以往一直係「天之驕子」嘅金融機構更加出現裁員情況，中小企更加喺北上消費熱潮之下「得個做字」，街上、商場吉舖處處，如果政府帶頭加足5%薪酬，對私營市場絕對係沉重打擊。

薪酬趨勢調查委員會建議嘅公僕加薪幅度，遠超市場預期。(Shutterstock)

　　喺面對千億財赤、儲備跌到得番7000億元、政府甚至要加大發債去支持基建項目嘅時候，加薪5%，講緊每年開支要增加超過60億元，政界中人就話：「呢頭你話政府唔夠錢要研究加呢樣收費、減嗰樣使費，到頭來加人工就要每年使多60億至70億元，試問又點樣同市民交代？」

　　而加唔足嘅話，對政府運作亦有唔少影響。有公務員朋友形容，呢幾年行政主導勢頭之下，個個局都要交足功課，上面有任何諗頭，做細嘅就要出頭，唔少部門嘅中高層都做得辛苦過出名工時長嘅四大核數師行，夜晚10點後收工都係等閒事，「人工加得唔夠好，可能就會令到人手流失加劇，特別係30幾歲中層嗰班，佢哋有政府工作經驗，行出去好多私營機構都爭住要，政府人工加唔夠，呢班中堅走咗就好難再填補」。

　　有立法會議員就私底下透露，早排都已經有評論認為公務員要減人工去同政府庫房共度時艱，不過佢自己就覺得，呢種講法無非都係社會嘅一種怨氣，「要解呢口怨氣好簡單，只要最高嗰班官員唔加人工之餘仲自願凍薪，甚至減人工，輿論就自然會覺得高層有承擔，呢啖氣就自然吞得落，下面加得足又點話呢！」