世事政情

　　今日（13日）星期五，係立法會放完暑假之後再開番內務委員會嘅日子，亦可以話標誌住立法會回歸正常會議。

　　立法會議員係受薪「工作」，一般打工仔每年頂多都係得十幾日年假，而議員可以「放假」放成3個月，的確係一份超筍工。不過有唔少議員喺無會開呢段日子都仍然有唔少同議會相關嘅工作要處理，10萬蚊一個月又唔係淨係話開會同投票嘅，呢方面亦都要公道啲。

　　月前休會之後，有媒體就同一眾議員「埋單」派一派成績表，睇吓議員有無坐定定投足票，係咪夠勤力。結果成個年度24項政府法案，竟然當中有16項喺表決時，在席參與表決議員人數一半都無，表決時最少議員嘅法案僅係得11人在席，佔全體議員12%。Tina當時亦有引述過呢篇報道，可以話令到政圈一片嘩然。復會在即，班議員又會點樣面對？

　　先再次科普一下，投票係有兩種，一種係「記名表決」，即係每位議員都要喺位嗰度按下贊成、反對或棄權票；另一種就係大家就咁舉手，由主席望落去決定究竟係唔係大多數支持。前者會有晒會議紀錄，記低邊個議員投咗咩票，後者就只會話全體通過。所以「記名表決」一般都會有無形壓力，令到議員乖乖咁坐定定投票；而舉手的話，大家絕對係可以得過且過，亦所以有議案得12%人坐定定舉手投票。

立法會投票分記名表決及舉手表決兩種。(AP)

　　Tina聽聞，議會各個勢力嚟緊復會之後都將會有所安排，聽聞會非正式要求，所有議員要喺所有議案投票時，無論記名又好、舉手表決又好，都要坐定定喺度，無得再因為只係舉手通過，就唔出席議案嘅投票。

　　有議員就同Tina呻，話投票只係議員其中一項「工作」，可以話佔實質工作時間唔夠1%，但就被傳媒放大來講，「舉手投票，又唔會記得邊個支持邊個反對，而如果個議案真係無乜爭議的話，大家亦知道大家都係贊成，咁點解一定要議員個『肉身』喺會議廳呢？」呢位議員仲話，有陣時真係好難預料究竟有幾多議員會就議案發言，亦唔知大家發言會發幾耐，喺辦公室有時都真係未必趕得切返落去投票，「到時可能真係要全日留喺會議廳，行都行唔開！」

　　如果問依家有咩嘢可以令到全香港市民槍口一致嘅，的士業可以話係唯一。自從有的士行家自行放蛇捉Uber司機之後，全香港市民(除咗的士從業員)都齊心聲討的士行業，將過往坐的士受過嘅冤屈氣都發晒出嚟。雖然的士業將會有重組，推出的士車隊，而的士業最近亦都搞禮貌活動，但都無阻政府全面檢討網約車規管嘅決心，似乎政府已經心裡有數，香港即將落實Uber合法化。

　　Tina最近同一位執法部門高層飯局，佢就直言，Uber今時今日喺夾縫之中生存，擺到明就係得到政府嘅首肯；Uber嘅業務肯定唔會係合法，以政府今時今日嘅行政主導，再加上警隊嘅雷厲風行，有心要打擊Uber的話，肯定佢地明日就連上線都上唔到。「點解政府唔郁手？最重要就係Uber解決到的士行業永遠都解決唔到嘅問題：唔會揀客、唔會拒載、唔會濫收車資，所有行程都有後台去監察，有咩問題都投訴有門。更重要嘅係， 政府依家係要『無處不旅遊』，全世界大部分嘅旅客都會有Uber App去叫車，Uber就正正係幫到政府解決呢個大難題，試問的士業又點會有條件去同政府講數？」

的士業最近推行禮貌活動，但無阻政府全面檢討網約車規管（資料圖片）

　　有立法會議員就坦言，Uber所代表嘅網約車行業喺全世界都已經證明咗畀的士更有效率，而內地更加係其中之一，「網約車喺內地成行成市，亦都見到網約車同的士係可以拼行，你好難同阿爺講點解香港就只可以有的士而無網約車」。不過呢位立法會議員亦都坦言，特區政府亦都有責任平衡各方利益，全面開放市場令到的士牌價大幅下跌亦都唔係政府願意見到，所以佢都私下建議，下一步開放網約車的話，亦都要將網約車同的士嘅功能劃分，「的士可能係繼續打大眾化市場，而網約車就可以定更高嘅價格，係畀啲捨得花更多錢買服務嘅人士，咁就各有各嘅市場，河水不犯井水。」

　　議員亦都向的士業界派定心丸，認為如果網約車合法化，網約車司機亦都要喺規管之下營業，咁就自然要交牌照費、更高嘅保險費等等，「佢地嘅經營成本亦都會大增，唔會好似依家咁，有車牌、有架車就可以做，所以估計只會有部分網約車司機會正式登記，某程度上亦都會令到客源流返去傳統的士業嗰邊，同依家比，應該係有利無害。」