財智

　　香港整個建制陣營，上至政府下至街坊組織，今個星期「外張內張」（完全冇「弛」呢個狀態），點解？你知我知，正是由治入興後，第一個區議會選舉周日投票，全球萬眾矚目！

　　一如某某高官「漏咀」（slip of tongue），今次催谷投票，真真去到「無所不用其極」手段。

特區高層，傾巢而出谷谷谷！

　　所以，近日無論駕車駛經隧道、睇電視、上YouTube，名人高官議員之外，能動員呼籲的（例如NGO、各式義工隊、個別藝人⋯⋯）不停亮相，整個攻勢，比以往任何一次選舉更排山倒海、更肉緊。

投票廣告，無處不在。「翻生」藝人尹光，滿力催谷。

　　不過，投票是市民的責任及權利，同時也是自由。所以，效果及反應如何，未到12月10日點完票，無法有定論。

　　近日老友飯局，一談到選舉，多會問兩個問題：一，你投唔投票（反而冇人問投邊個？）；二，你估投票率有幾高？

　　第一個問題，屬八卦及侵犯私隱，所以，十個有十個都唔會公開答。尤其面對陌生人，個心反應是——我投唔投票關你乜事？八卦！

　　但第二個問題則不同，個個爭住發表意見，興高采烈估估估。

　　香港人， 十之七八好賭（包括馬、波、樓、股、債、金、麻雀、啤牌⋯⋯），一有機會賭，就興奮。

　　老友之間，無謂以金錢作賭注，免傷和氣。但牙骹式輸賭一餐，則大部分人會視作一項社交之中的小樂趣，正是贏咗得餐食、輸咗做闊佬。

上屆投票率歷史新高，因有「特殊政治氣氛」。

　　重溫歷史，上次區議會選舉在2019年，候選人競逐452個民選議席，結果，在「特殊政治氣氛」下，創出香港歷史上最多人參與及最高投票率的一次，達到2943842名登記選民投票，投票率為驚人的71.23%。

　　好了，今次又如何？

麥美娟打個底先。

　　首先睇睇登記選民數字，超過430萬。究竟周日會有多少人投票呢？這個，當然有眾多因素影響。正正有眾多因素影響，故大家才充滿好奇，究竟投票率如何？

　　我已參與三個飯局的投票預測，「下注」前先聽多位經驗豐富的政治評論員及政黨中人分析（主要是建制陣營的）。更重要，參考大數據。如今科學昌明，甚麼也講大數據，預測的準繩度，遠比純粹靠估高。其實，政府在這方面掌握的，絕不會少。即是，政府早已心裏有數投票率大致如何。這樣，就可早早設計回應中外傳媒對結果提問的答案。

大數據通常極精準，且看今次中唔中？

　　究竟，我估投票率會是多少？除飯局內的老友，冇人知，小弟也不會公開。

　　一於唔話你知，等你心思思！

　　區議會選舉塵埃落定，估唔到一場事前咁唔被睇好嘅選舉，最終都能夠咁戲劇性收場。唔少人唔睇好投票率，點知喺政府力推之下都推到上27%，仲要臨收工搞到個系統故障要加時作賽，真係劇本都好難寫到咁精彩。

　　今次選舉，焦點並不在於邊個選區選到咩人，而係各大政團最終能夠收割到幾多議席。直選議席方面，44個地區直選選區，一共有88個席位，貴為香港第一大黨嘅民建聯，每區派出一個人，最終只係得3個人落馬，一共奪得41席之多，成功率達九成三。另外佢哋喺地委會界別共有77人參選，68人贏咗，成功率亦有八成八。透過呢兩個選舉已經囊括109席，仲多過梁山泊嘅好漢。

　　睇番搶灘第二位嘅建制派工聯會，25人出戰直選，7人落選，18人搶到議席，當選比率都有七成二，但喺地委會選舉，21人出選就只係得9人當選，即係合共僅取得27席，只係得民建聯嘅四分之一，更遑論其他議席更少嘅新民黨、自由黨同經民聯。

民建聯及工聯會是今次區選得到議席最多的頭兩大政黨。（資料圖片）

　　民建聯紮根地區咁多年，得到較多議席自然係好正常嘅事，例如2015年區議會選舉，全部議席都係直選，佢哋派出171人出選，都有119席，放飛其他建制派政團。不過有其他建制中人就指出，今次完善咗嘅區選制度，直選畀民建聯拎到44席都無問題，但問題在於連地委會界別佢哋都拎到咁多席，畀人嘅感覺就係成個選舉遊戲出現明顯偏差，搞到其他政黨都不是味兒。

　　呢位建制中人表示，依家無咗泛民，全部建制派對陣，好明顯嘅一個效果，就係無論地區直選定地委會選舉，「識得人多就有著數」，佢又話：「大家講嘅政綱都差唔多，喺市民心目中亦都覺得選到邊個都差唔多，所以投票率創新低，而咁嘅環境之下，有樁腳、動員能力強嘅政黨，優勢顯而易見。而民建聯過往做區出身，咁三會入面好多人都有民建聯背景或者同民建聯領導層都係熟絡，進一步鞏固佢哋嘅優勢。試問一日個選舉制度不變，啲細黨或地區聯繫無咁強嘅政團，有乜可能同到佢哋競爭？」而喺選舉期間，已經出現工聯會嘅重量級人馬專係去幫民建聯嘅對手站台嘅現象，好明顯就係大家對於「大黨」好有怨言。

　　仲有個細政團叫香港新方向，讀者可能無聽過，不過佢哋嘅立法會議員張欣宇都算係曝光率幾高嘅議員。佢哋區選出五人，僅僅得一個當選，地委會更加無派人去選。之後佢哋就向全港市民發公開信，信中有一段提到：「政治，從來不應該只是僅僅取悅粉絲或圍爐埋怨的遊戲。政治，本就應當回歸到市民日常生活的每一天。」呢一句正正道出成個新選制之下，要贏，就要靠圍爐、就要靠日常生活嘅每一天去取悅粉絲。睇嚟未來兩年（現屆立法會餘下任期），各大政團都會諗諗計點樣減低「大黨」嘅影響力。