【見工必讀】做一個反客為主的應徵者!6條必問面試題目大拆解(上)
#2019打工秘笈 #見工 #職場 #辦公室貼士 #打工仔你揀工時、工都揀你,面試除咗係一個互相銷售嘅過程,仲係一個互相試探嘅角力賽。相方會向對方銷售自己,同時亦會試探對方嘅底蘊,了解對方對自己嘅喜愛度,從而為自己爭取最好嘅利益。雖然好多時僱主都係處於主導嘅一方,應徵者經常會被問到一啲較尖銳嘅問題,但其實只要清晰問題嘅動機,應徵者都能夠反客為主。
「覺得自己有乜野缺點」
數別人缺點好容易,但同其他人講自己有幾差其實好難。喺面試過程中,應徵者多數時間只會向對方展示自己最好嘅一面,所以當面試官問及自己有乜野缺點時,多數應徵者一時間都會措手不及。
其實面試官主要目的有三個:一,考驗應徵者嘅反應,二,了解應徵者真正嘅問題同缺點,三,了解其為人會否過份自大/自信。見過有應徵者回答「我其實冇乜缺點」、「我做事比人好、比人快,所以令其他人有好大壓力」,呢啲都係過份自信變成自大嘅表現。
知道自己缺點嘅人,先有進步空間,所以坦白地講出自己嘅缺點,並提出解決方法,係最有效嘅回答方式。「我本身英文唔係太好,同外藉同事溝通時可能會慢一點,但上個月已經報讀英語進修班,相信問題好快會改善」。肯面對問題並主動改善,能令僱主看到你成熟嘅處事手法。另一方面,僱主及早知道你嘅缺點,能夠喺工作上作出適當安排,其實係win-win嘅做法。
當然,回答時冇需過份坦白,千萬唔好將自己所有嘅缺點逐一列出,咁做只會有反效果。
「上一份工作離開嘅原因」
「你好似份份工都做唔長」、「有少少jumpy」、「點解咁快辭職」等等,都係面試嘅必答題。大多應徵者嘅回應「搵到一份更好嘅工作」、「覺得上一份工唔太適合自己」等類似嘅standard answer,但其實同類嘅問題,可以有更好嘅答法。
第一個要點係,千萬唔可以講大話,如果真係被炒魷魚,就要如實回答。但回答時要記得追加補救方法,「因為我處理e-Commerce嘅能力欠佳,所以一年後被公司解僱,但我早前已經報讀咗相關嘅課程,相信而家能夠勝任」。第二點,嘗試將不同公司嘅工作經驗綜合起來,將轉工變成一件必然嘅事,「喺A公司工作,希望得到X嘅經驗,到咗B公司後,我學到Y、Z技能;轉工嘅目的係為咗裝備好自己,之後能夠到一間大公司工作。到咗今日,相信我現在嘅能力,可以喺貴公司有長遠嘅發展」,記得結尾時要提及「喺貴公司有長遠嘅發展」,令面試官更為安心。
「你工作能力欠佳,點解我哋要請你?」
上一輩好常用嘅提問手法,但現今嘅面試官就較為少用。呢一類型問題嘅目的有兩個:一,想應徵者講出自己性價比較高嘅地方,加上言語帶少少貶義,希望壓價。二,可能工作時需要長期受壓,想考驗應徵者嘅抗壓能力,有陣時仲會用嚴厲嘅語氣,以尖銳嘅問題去攻擊應徵者,考驗你即時反應,同時間亦可以抬高自己/公司嘅位置。
但其實如果真係覺得應徵者能力未能勝任的話,係唔需要問呢一條問題,可以直接結束面試。所以一啲故意攻擊,正正反映出上司對同事嘅工作態度,同公司嘅工作文化,應徵者應考慮該公司/上司/文化是否適合自己,建議應徵者三思。
(待續)