職場

　　蘋果喺上星期WWDC發布會上除推出多項新iOS新功能及新Macbook Air外，同時更推出全新MR（Mixed Reality）頭戴式眼鏡 Apple Vision Pro。MR 意思係混合式實境，同時利用AR／VR 打造出一個沉浸式體驗。可以同時將現實世界情況同虚擬畫面結合互動之外，玩家更毋須使用其他裝置，只要用眼球同手勢就可以操控Vision Pro見到嘅內容。大眾重點放於其零售價$3,499美金，高昂定位令人卻步。其實當蘋果推出Vision Pro後，重點並不在於其售價，而係大家可以從產品喺巿場中嘅定位，睇到不少玄機。

圖片來源：Apple

　　MR眼鏡再配合獨有iOS同App所塑造嘅效果，不少人認為同元宇宙概念十分相似，Vision Pro其中一個功能係可以掃描玩家頭像後創造自己獨有虛擬頭像，喺虛擬會議或不同場景上同朋友交流，同Meta等元宇宙公司概念十分相似。但蘋果喺整個產品發布中完全避開對元宇宙相關嘅詞語同內容，一來唔想同元宇宙拉上關係，繼而影響股價，二來亦唔希望令大眾誤解Vision Pro係同Meta元宇宙眼鏡係同類產品。不過只要大家細心觀察，可以見到今次推出Vision Pro時蘋果對其巿場定位確實有少少尷尬。唔能夠成為元宇宙一分子，亦唔可以只係普通VR眼鏡，最後只能定位為一半娛樂新體驗，一半係家中／辦公室嘅工作輔助工具。最後目標客群變得「兩頭唔到岸」，用嚟工作又覺得唔太大需要，用嚟娛樂又太貴，大多數人都冇一個入手嘅理由，結果只得超級死忠粉絲先會購買。

　　另一方面，其實呢類元宇宙工具於巿場上已經推出，尤其係Facebook早於2021年10月改名為Meta，宣布會大力向元宇宙巿場進發後，期間不斷對外公開不同AR／VR眼鏡設計原型，令全城期待。但期待還期待，事實係元宇宙項目燒錢速度遠超於回報，令項目至今停滯不前。而當Vision Pro推出後，更接間對Meta 大大力來一巴掌。當Meta連設計原型都未能確定嘅時候，就可能因為Vision Pro而要作出大改動，以加強產品優勢去應對來年巿場競爭情況，Meta又再一次雪上加霜。

　　從蘋果今次推出Vision Pro，可以見到現時產品係站於元宇宙嘅入口，好想入去但又唔敢行太近，有「試水溫」嘅感覺。其實連蘋果作為巿場龍頭都對元宇宙前景抱有懷疑態度，可見元宇宙又再一次減速。

　　疫情出現加上科技發展飛快，大眾開始以線上為主要消費渠道。除咗部分行業如飲食業、服務業等，其他行業線下消費或營銷活動慢慢失去其定位。所以近年部分企業都開始作不同嘅轉型，除咗將生意元素轉為O2O（Online/ Offline to Offline/ Online）模型，亦有企業完全地將線上線下定位改變，線上為消費主戰場，線下只作陳列產品等等。但一些較傳統業務嘅公司，就需另作對策。以書店為例，近年開始出現「多元化書店」經營模式，呢類模式看似成功，但事實上又係咪可以長線持續發展？

圖片來源：Unsplash

　　自網上文章同社交媒體盛行後，大多人只會網上睇免費文章或買網上書籍，嚴重影響實體書店生意。最後去書店只為預覽書籍，並唔會消費。數據指十年前後實體書店數目變化，中國、台灣、日本等亞洲地區約有四至五成書店已經倒閉，而人流亦大減約六成。但近年中國實體書店開始進行轉型，企業為書店加入不同元素，令其變得多元化、百貨化同體驗化。雖然倒閉潮持續，但國內過去兩年仍有不少新書店開業。

　　其實書店多元化、百貨化等轉型模式好早已經出現，而最為人熟識嘅例子必定係台灣誠品書店同日本蔦屋書店。以文青風格作為包裝，再將書店結合餐飲同其他零售，或舉辦各類活動同講座等等，變成綜合式書店。書店文青氛圍能提升其他商品格調，引流目標客群到書店內不同生意之上。

　　書店多元化慢慢變成趨勢，而其他傳統嘅生意都有朝呢個方向發展。跨業務生意雖然能增加收入，同時加強客群到訪書店嘅理由，但書店多元化模式亦有其限制。首先書店多元產品類別不能走得太遠，要配合書店本業或其文青氛圍，如果過分偏離就會令書店變成百貨公司或超巿，繼而巿場定位失去重心，影響長遠發展。另外，大多客群到書店逛主要因為其文青氛圍濃厚，產品只係其次。慢慢書店由賣書/ 產品，變成賣空間/ 氣氛，大眾鍾意逛呢類書店去感受氣氛，但又未到好願意消費，最後變成旺丁唔旺財。就算書店能聯乘不同大品牌開設Pop Up Stores（快閃店）或店內活動，但都只能短時間加人流/ 消費，活動過後就會打回原形。

　　書店喺新時代下轉型之路，對比其他生意嘅路更難行。加上大眾貪新鮮習慣，令一時間嘅成功難以持久。所以未來生意轉型呢回事，將會變成一場持久戰。