過往專欄

　　大家都說辦公室內有很多擦鞋仔，究竟擦得怎樣勁，不妨交流一下。

　　一年，工作關係，我們去見一個富二代，商談一些項目合作可能性。這位先生在娛樂圈的曝光率比在財經版上多，人看上去，不花弗，卻像殷實商人。

　　見面地點在集團會議室，很大。他坐在主席位，他的私人助理帶我們走進去，我們亦走前和他握手。但他仍坐在座位上，沒有握手意圖，先收了我們咭片，然後單手把自己名片遞給我們。

　　他一副懶洋洋模樣，氣場不足，卻氣焰不少。

　　剛坐下來，凖備介紹公司業務，他立即說他有些計劃，叫我們研究如何合作。然後他說了幾個虛無縹緲計劃，有在內地的，有在本地的，但一聽已知道十劃都未有一撇，得一個「吹」字。

　　之後，他說有一個私人投資，指香港人口老化，所以做老人院大有可為。他在荃灣中心有一個地方，很適合改建成老人院，他打算把它建成五星級老人院，有醫生駐診，讓家人放心等等。

　　甚麼叫五星級老人院？沒有空曠草地、沒有閒逛地方、在一個交通不算方便的地點，又怎稱得上為老人家度身訂造呢？不過，人家說得開開心心，我們也犯不著上心。

　　他的私人助理扯高嗓門接著說：「我老細真的英明神武，他想到在每個老人院房間內有一設備，你們估下是甚麼？」

　　突然一問，大家還未會意過來，他已搶著說是「電話」。

（圖片來源：UNSPLASH）

　　不錯，是電話。他說老人家住在老人院，最掛住仔仔女女，如果在房間內安裝一部電話，他們便可以隨時和仔女通話。

　　怎知富二代笑著說「所以我整天教他們要食腦」，然後繼續自吹自擂說他的鴻圖大計。
那雖然不是人人一手機年代，電話卻普通不過。在房間內安裝一部電話又有何英明神武？那可不是在買地場上舉手投足間的豪氣，亦不是在股票場上舉重若輕的瀟灑，而只是把一個老舊屋苑的幼稚園改裝吧。

　　英明神武，只是講的人不臉紅；聽的人欣然接受、亦不臉紅。

　　其實在商場成功，自有其過人之處，但人人喜歡美言，明知是捧場、是褒獎，也罷。但有些擦鞋話，真的難聽，他們卻十分受落。

（圖片來源：TVB）

　　那一次會面，當然沒有甚麼發展，卻有後話。

　　離開時，助理送我們到電梯口，輕輕的說了一句：「不要見怪，搵食啫。」當電梯門關上一刻，他仍站在門外禮貌周周送客。

　　對，搵食啫，使唔使呀！

　　好多打工仔自覺成日唔夠時間用，除咗工作太忙、公司太多豬隊友、老細個腦太細之外，亦因為能做到真・時間管理嘅人唔多。而且不少人對時間觀都唔太了解，結果有再多時間也唔能夠完成工作。以下幾個對時間觀同工作效率嘅誤解，值得大家反思。學懂改善時間管理技巧，就算做唔到時間管理大師，都要學會用較少時間完成更多工作。

「有更多時間，先能夠完成手上工作」

　　首先要明白，如果係自身唔識好好管理時間，就算一日有 36個鐘，你都係唔夠時間用，36個鐘亦會出現36個鐘工作量。不免經常會感到，今日雖然時間好似鬆動咗，但後來又因出現相對嘅工作而變得好忙。歸根究柢重點係高效率，唔係時間多少；當做到高效率時，時間就會變得更多。所以唔係更多時間完成工作，而係更高效率完成工作。

　　要做到高效率有好多方法。老生常談，最先要學懂何時放棄。何時放棄工作質素、何時放棄某啲工作、何時放棄老細每一個要求等等。當然人人都想每件事情做到最好，但如果時間已迫爆時，只能放棄某啲事情。交由他人處理或用錢去處理，都係放棄嘅一種。不過點放棄都好，絕唔可以放棄自己底線，不然就會跌落忙死輪迴之中。

「親力親為係最好、最快」

　　職場上唔難見到好多高效率、高能力嘅同事，通常都係最忙一群，其中一個原因係佢哋傾向凡事親力親為。經常會覺得「我教得佢嚟，我做自己已經做完」，大多都係藉口。因為當你有能力嘅時候，你就有方法搵到對的人、做對的事。其實主要原因係呢類人往往缺乏安全感，一來唔放心交低工作，二來如果自己有太多空餘時間時，反而感到不安。最後習慣自己親力親為，習慣「忙」呢種感覺，沒完沒了嘅壓迫最後迫死自己。親力親為只能換來一刻嘅方便，要以長線嘅高效為目標先係真理。

「時間管理只在於管理工作」

　　好嘅時間管理同高效工作能力，只係助你完成工作嘅一種方法，係所有事情嘅第一步。最終目的係當你完成工作後，先能夠可以好好管理人生唔同事情。千萬唔好自己已經做到高效，而「搵野做」去填補每一個空檔。得閒冇野做，唔代表浪費時間。人生好多更重要的事情需要管理，不論係家庭、朋友，健康、興趣等，以上先係你嘅目標。緊記，100%填滿工作，並非充實人生。