過往專欄

　　公司早排搞咗個Company Dinner，邀請咗母公司、子公司等等上下所有員工出席。秘書唔驚搞飯局，最驚無人去！假如一眾大老闆坐係個冷冷清清嘅包場展覽廳自high，對住一排排空枱發表偉大演講。做搞手嘅，可以先行退下切腹謝罪。所以專業嘅搞手一定會安排抽奬環節，仲要係成餐飯不定時抽幾份，大奬留到最尾，以確保出席嘅各位可以留到最後。不過，有啲人就好識得玩權力遊戲，自己走先，但要求小薯留低幫佢抽奬。 

　　今次事件發生係阿姐Summer同直屬小薯Kovis身上。話說Summer姐出席咗飯局唔夠半個鐘，就蠢蠢欲動想割席離開。明嘅，餐飯咁多人，擦鞋又唔輪到你，有無出席都無人知，係人都唔想嘥時間，早走早著啦！所以Summer姐就交低咗自己張抽奬號碼比Kovis，意思即係「嗱，我走先，你醒醒定定坐到最尾幫我抽奬！」做細嘅無權say no就唯有硬食！又比佢咁好彩，Kovis抽中百老匯現金卷$200，Summer姐抽中MacBook一部。忠心嘅Kovis辛辛苦苦將戰利品帶返屋企，翌日再帶返公司。入世未深嘅Kovis以為幫阿姐抽中奬，佢心情一定好好啦，所以係交收之時，再加上其他同事半推半就嘅情況下，斗膽咁向阿姐要求一件事⋯⋯

　　「Summer姐，部電腦最新model，一定好好用喇？咁開心，會唔會請大家食tea慶祝一下呢？」 

　　Summer沉默兩秒，之後竟然話：「你都好似抽中獎喎！」 

　　「係喎！自己都係得獎者喎！畀佢講講下，我都好似應該請大家食野喎！」腦中立場突然好似畀阿姐點醒咗！

　　招架唔住的Kovis弱弱地講咗句：「係啊⋯⋯」 

　　「咁我地一齊夾啦！叫大家聽日唔好食lunch，嗌Tea吖！」 

　　最終，可憐的小Kovis就畀阿姐拉咗落水，一齊夾錢請食Tea。其實，你估托部Macbook返屋企，再係返工時間托佢迫地鐵輕鬆乜？係，Kovis係衰多嘴，但輪地位、得獎金額，身為阿姐請班細嘅食Tea真係好正常。但呢單嘢佢直頭無念過Kovis幫佢拎機嘅功勞，諗都唔諗就扯埋人落水。人哋抽得果$200現金券，真係一炮過就畀你食咗，唔似得你部Macbook咁貴！仲有！唔知大家有無發現，阿姐叫大家唔好食lunch，等Tea Time佢請！啫係咩意思？食完飯唔可以食Tea嗎？定係想扮闊佬請食lunch，但又厭貴，就叫大家食tea當食飯？好明顯，Kovis畀一隻孤寒鬼拉咗落水！

　　「土壤論」，我查勻網上，也找不到，但這種定論，在中六時，已在腦中萌芽。

　　乜意思？正是，一粒種子，放在某一種土壤上，只要正常施肥灌溉，就會茂盛地開花結果；不過，同一粒種子，放到不合適的土壤上，就算正常施肥淋水，卻可能一日內凋萎，又或，無法開花結果，就算有，也是瘦弱不堪，難抵風雨。

土壤，對任何植物及人才皆十分重要，關乎生與死！

　　點解中六時開竅？因會考成績普通，故被一間高水準的名校請離，改報讀一間低水準的普通書院。就此，變「虎入羊群」，個人突然信心飛升，學業成績立時大進。

　　那年，我開始明白，每個人都有不同天份不同能力，對環境的適應也有所不同，故此，一定要爭取自己落在適當的土壤。

　　講個真實經歷，1987年某一個晚上，仍在公司處理文件時，收到「敵對」機構老闆電話，劈頭就話：「想約你晚飯，可以嗎？」

　　當時，我即時反應：「好，請通知時間地點！」

　　放低電話才知，弊，被上司知道咪死得？竟與對家阿頭單對單晚飯？間諜行為喎！

　　立即找上司通報，佢笑哈哈大方講：「你咪去囉，呢類邀請，我不時都有啦，即係你有料到呀 ！」

　　準時赴會，對方單刀直入：「阿碌，我想挖你過嚟幫手，人工加一倍，職位在我之下！睇好你，不應只做目前的職位，浪費才華！」

　　幸而，我早早有「土壤論」的掌握，禮貌回答：「今晚見面，正因仰慕你在業內的過人貢獻，有機會共飯，是項榮耀。不過，自己知自己事，我的能力、喜好及天份，百分百只適合公營機構；事實，也做得很開心，並得到上司賞識，故準備服務終身，絕不考慮轉機構。但無論如何，謝謝你你的賞識及好意。」

我自知只適合做不以牟利為目標的公營廣播，商營的「土壤」，絕對不利發揮潛能。

　　結果？哈哈，這餐飯有點「不歡而散」，因當年這個小子真是「不識抬舉」。

　　從此，與這位大老闆在任何場合碰見，佢必立時轉身，絕不打招呼。

　　故事繼續下去，此君終於搵咗另一敝機構猛將加盟。不過⋯⋯未夠半個月已「一拍兩散」。這正是掉到不適當土壤中的惡果。

 有土壤也要有栽培者，我的，正是吳錫輝。

　　今日講此主題，因小弟認識眾多香港名廚，上周有位阿A約見，擺明心緒不寧。

　　A君乃香港某大飲食集團靈魂，捧場客眾多，老闆錫晒，剛剛又再蟬聯米芝蓮。

　　突然，對頭大集團老闆約見，拿出空白支票：「我誠意邀請，年薪任開，你填啦。過嚟之後，將再開10間不同品牌店你管！」

　　小弟一五一十將「土壤論」詳細解釋， 阿A若有所思。究竟決定如何，未知。

沈殿霞也是最佳「土壤論」人物，一如不少早年TVB藝人，一過檔亞洲電視，立即黯然失色。

　　英語有云，想一個人成功，就put the right people in the right place；相反，想佢死，就put the right people in the wrong place！