過往專欄

　　僭建風波呢排由律政司司長嗰邊，燒到去補選喇！噚晚參加咗立法會「建築、測量、都市規劃及園境界」補選的南區區議員司馬文，喺社交網站自爆物業有僭建物，仲Post咗正在處理嘅相畀大家睇。嗯嗯，泛民鬧司長僭建鬧咗咁耐，今次仲唔畀建制派拎到子彈威返次？

拆咗就當冇存在過？睇嚟冇咁容易喇！

個個都僭建不用分那麼細

　　今日第一個衝出嚟鬧嘅建制派，就係經民聯嘅梁美芬喇。Jenny心諗呢個畫面咁熟悉嘅……咪好似上次政府一任命鄭若驊做律政司司長嗰陣，芬姐都係第一個出嚟讚鄭司長又有豐富經驗又專業㗎！不過第二日司長就爆出僭建醜聞，芬姐就潛左水一段時間，直至司長話去委員會佢先再就事件出聲。今次佢又第一個出嚟大嗌「匪夷所思」，唔怕又中伏咩？

　　不過Jenny知道，其實司馬文呢單僭建並唔係新聞，事關佢自己都喺2011年向屋宇署申報有5個小型僭建物（包括：天台的玻璃上蓋、石凳、熱水爐、廚櫃及玻璃圍欄） ，不過佢一直冇拆到，所以物業就被屋宇署釘咗契，喺2012年嘅時候亦都有傳媒報道過。點解去到今日又拆呢？司馬文就話因為「明白到公眾對從政者的要求」，所以一決定參選就請人去拆。係囉！順手拆埋彈吖嘛！不過按Jenny睇，傷害已做成，比著小妹係對手的話都一定咬實你唔放。

芬姐響司馬文全朵 Tanya「溫馨提示」

　　難得有子彈喺手，芬姐就梗係唔會咁順攤啦，除咗話「匪夷所思」之外，仲大鬧呢單仲嚴重過司長嗰單添！佢話因為司馬文係明知都唔拆，司長就唔知自己間屋有僭建喎！咁又唔係咁講呀芬姐，司長住咗喺嗰度9年，連咁大個地庫都睇唔到，仲要按揭文件冇提地庫，點睇都係司長（對眼）嚴重啲噃！

　　芬姐霸住咗個咪兜講咗10分鐘都未講夠，排緊隊嘅陳淑莊(Tanya)都頂唔順，學電視台啲PA咁「圈」芬姐，提佢夠鐘喇！讓下一個講喇！唔知係唔係等得太耐，Tanya一埋位就面都黑埋咁「提醒」芬姐：「其實行管會已經唔係第一次提醒過立法會嘅同事，唔可以用公共資源（咪兜）做選舉工程。」

　　Tanya話，家下芬姐喺咪兜面前直接講咗一個候選人個名，係影響緊嗰個人當選或唔當選嘅機會，所以都屬選舉工程嘅一部分喎！不過以芬姐嘅身份，Jenny估行管會都只係「勸喻」下嘅啫！至於僭建嗰邊？既然「司」長都冇事，「司」馬文都應該冇事啦！係咪先？

　　如果問依家有咩嘢可以令到全香港市民槍口一致嘅，的士業可以話係唯一。自從有的士行家自行放蛇捉Uber司機之後，全香港市民(除咗的士從業員)都齊心聲討的士行業，將過往坐的士受過嘅冤屈氣都發晒出嚟。雖然的士業將會有重組，推出的士車隊，而的士業最近亦都搞禮貌活動，但都無阻政府全面檢討網約車規管嘅決心，似乎政府已經心裡有數，香港即將落實Uber合法化。

　　Tina最近同一位執法部門高層飯局，佢就直言，Uber今時今日喺夾縫之中生存，擺到明就係得到政府嘅首肯；Uber嘅業務肯定唔會係合法，以政府今時今日嘅行政主導，再加上警隊嘅雷厲風行，有心要打擊Uber的話，肯定佢地明日就連上線都上唔到。「點解政府唔郁手？最重要就係Uber解決到的士行業永遠都解決唔到嘅問題：唔會揀客、唔會拒載、唔會濫收車資，所有行程都有後台去監察，有咩問題都投訴有門。更重要嘅係， 政府依家係要『無處不旅遊』，全世界大部分嘅旅客都會有Uber App去叫車，Uber就正正係幫到政府解決呢個大難題，試問的士業又點會有條件去同政府講數？」

的士業最近推行禮貌活動，但無阻政府全面檢討網約車規管（資料圖片）

　　有立法會議員就坦言，Uber所代表嘅網約車行業喺全世界都已經證明咗畀的士更有效率，而內地更加係其中之一，「網約車喺內地成行成市，亦都見到網約車同的士係可以拼行，你好難同阿爺講點解香港就只可以有的士而無網約車」。不過呢位立法會議員亦都坦言，特區政府亦都有責任平衡各方利益，全面開放市場令到的士牌價大幅下跌亦都唔係政府願意見到，所以佢都私下建議，下一步開放網約車的話，亦都要將網約車同的士嘅功能劃分，「的士可能係繼續打大眾化市場，而網約車就可以定更高嘅價格，係畀啲捨得花更多錢買服務嘅人士，咁就各有各嘅市場，河水不犯井水。」

　　議員亦都向的士業界派定心丸，認為如果網約車合法化，網約車司機亦都要喺規管之下營業，咁就自然要交牌照費、更高嘅保險費等等，「佢地嘅經營成本亦都會大增，唔會好似依家咁，有車牌、有架車就可以做，所以估計只會有部分網約車司機會正式登記，某程度上亦都會令到客源流返去傳統的士業嗰邊，同依家比，應該係有利無害。」