過往專欄

　　男女價值觀分歧大，要走在一起不容易。有女生自稱新工過了試用期，為想氹自己，以分期付款買了一個3萬元名牌手袋，卻遭男友狠批貪慕虛榮兼「港女」，並提出分手。有兩性關係專家指，情侶價值觀有別，感情難維繫。

　　名牌手袋是不少女士的心頭好。有女網民指剛踏入社會大學，為慶祝新工過了試用期，以免息分期買了一個3萬元名牌手袋。惟男友知道後大發雷霆，更狠批她是「港女」，又指她「未識賺錢就學人用貴嘢」，令她感到很委屈。帖文指，「我啲朋友都係男朋友送名牌袋，我唔想佢咁大壓力就無問過佢，自己買有錯咩？又唔係要佢幫我找卡數！」

反映兩人價值觀不同

　　帖文吸引逾5萬人次瀏覽及超過500個留言討論，網民反應兩極，有人撑事主，認為她用自己錢，又負擔得起，男友不應干涉。亦有人估計事主男友擔心她日後會債台高築才會勸阻。也有網民認為「一個慳家，一個好名牌，錯配了」，分手也是好事。

　　圓滿關係中心總監暨心理輔導學家蔡綺文指，這類爭拗在兩性關係中常見，反映兩人價值觀不同。「女生想氹自己開心，覺得錢是身外物，但男生則較實際，認為女友胡亂花錢，這是理性與感性的分別。」

婚前應協調使費分配

　　蔡續指，曾有30歲多的太太將大部分薪金用來買衫及美容，丈夫認為她不顧家，對家庭欠缺使命感，雙方常為此爭拗。「太太認為丈夫應寵愛她，扮靚不外為丈夫面子，但丈夫卻不認同，最終要進行婚姻輔導。」她建議準新人在婚前應協調財產及使費分配；若只屬初認識情侶，兩人對金錢運用概念難以磨合，或需考慮是否仍走下去。

　　Speed Dating FEVER總監黃新發認為，情侶對用錢的價值觀有別，沒有誰對誰錯。「好像有些男生喜歡光顧茶餐廳，女友卻堅持去高級西餐廳，視乎兩人如何協調。」他指，曾有女性朋友從事金融業，需要一、兩個名牌袋以備見客需要，但對方知道能力有限，「有一、兩個襯衫便可」。部分初出社會工作的女生或因「人有我有」心態追求名牌，即使能力不及，仍「死充」便不鼓勵。

　　富三代鍾培生一向都高調兼言論出位，自信爆棚嘅佢身邊長期不乏女伴，日前佢就連登一啲「仇女」言論拍Reel，指係某啲港男嘅個人問題先識唔到女仔，又分享自己認為一個稱職男友嘅應有條件。有網民挑機問到有關佢外形嘅問題，都被佢嘅自信回應秒殺。

　　鍾培生喺片段中講到連登論壇嘅男性認為所有港女都係「雞」（意指港女貪錢），佢表示：「雖然有啲港女真係雞嚟，但我自己覺得一個男性30歲，起碼要照顧到自己條女（女朋友），你話廿幾歲啱啱grad，未搞得掂，可以接受；但你三十而立，你起碼（做）各行各位都有番咁上下（位置）啦。最基本，照顧條女衣食住行，尊重自己條女，就算你今日搞唔掂，起碼邁向可以做得到先啦。如果唔係學咩人溝女呀，返去打xx啦（意指自慰）。」

　　唔少人都反對鍾培生講法，指香港生活指數做到佢講嘅嘢都有難度，而佢係含金鎖匙出世先咁「口響」：「有爸爸， 你照顧幾多條女都得。」、「你有錢先咁講啫，衣食住行，最難就係住，租屋租成世呀？買樓又冇你咁有錢，我諗你咁講全香港4成男人都要靠打xx過日子。」鍾培生回應：「sad fact（可悲的事實）, 所以啲女去晒嗰60%度。」

　　另外，都有唔少人關心鍾培生嘅外形，因為以佢嘅財力絕對可以更加「四正」，但鍾培生就長期「爛面」，生暗瘡同埋佈滿凹凸洞，有網民留言問：「點解你溝到女，但係唔整吓自己塊面？」鍾培生自信留言，指自己係為咗「斬桃花」，令呢位網民都反駁唔到：「唔想太多女，所以我出街都已經唔gel頭，日日uniqlo。」