職場

　　放工執嘢走個陣，唔覺意望咗放喺滑鼠隔離個水杯一眼，心諗：「點解仲有大半杯水嘅？」然後先醒起自己原來全日無點飲過幾啖水，唔怪得好似冇乜點去過廁所。專家話，人長期唔飲水，身體唔單只會脫水，久而久之仲會精神唔集中、好易攰、便秘，甚至有較高生腎石、患尿道炎嘅風險！

　　其實根據小編嘅觀察，好多打工仔並唔係唔想飲水，又或者唔鍾意飲水，只係做嘢專心得滯，就完全忘記咗有飲水嘅需要。小編有朋友就諗咗個方法提自己多飲水──日日隨身帶個2.5公升嘅大水樽，返到公司就即刻去pantry度「打水」，仲要一日打成兩三轉添！至於最愛「一身輕」嘅小編，當然係訴諸科技，搵咗幾個飲水提示app嚟幫自己啦！（文末仲有個「飲水黃金時間表」添～）

 1. 喝水時間

　　輸入基本資料，例如身高、體重、年齡、作息時間等，「喝水時間」就會根據你嘅身體情況，智能調整提醒你飲水嘅時間和目標建議。

 2. 喝水寶

　　同「喝水時間」嘅用法差唔多，主要都係按照你嘅體重、性別嚟計算每日應該要飲嘅水量，並按運動量而調節。而每當你飲完一杯水後，添加返一個杯，咁個app就會提你下一次喝水嘅時間。呢個app比其他app亦多出圖表功能，可以追蹤喝水與體重之間嘅變化。最大問題係廣告有啲多，所以會比較煩人。

 3. Plant Nanny植物保姆

　　呢個將喝水概念和遊戲結合嘅「Plant Nanny植物保姆」，一定係最可愛嘅飲水提示app！一開始嘅時候，你可以選擇種植黃金葛或者蒲公英（其他植物要用種子來兌換），揀好之後就可以幫你嘅植物改名！只要每飲完一次水，你就可以幫你嘅植物澆灌返同樣份量嘅水份啦，OL一定大愛啊！

　　飲返多水固然好啦，但大家切忌一次過飲太多，如果唔係就會令血液中嘅水份比鈉多，以致過多水份進入腦細胞，引起頭痛、嘔吐、噁心等症狀，即「水中毒」！所以小編亦參考咗唔少網民和專家建議，最後得出咗下面呢個「飲水黃金時間表」。

早上7時

　　起床後，空腹飲一杯溫水，唔單只可以補充睡眠後流失嘅身體水份，亦有助排便，幫助身體排出前一晚所累積嘅毒素！有便秘嘅人，可以轉飲淡天然蜂蜜水，或者淡海鹽水。

早上9時

　　趕頭趕命返到公司，飲返杯水先開工啦，既可以紓緩緊張情緒，同時提高集中力㗎！

早上11時

　　做咗一個朝早嘢，係時候補充返上午缺失嘅水分。大家仲可以趁行去pantry斟水嘅時間放鬆下添！

下午1時

　　雖然網上有傳言話，吃飯個陣飲水會影響消化，但呢個原來係謬誤嚟㗎！有醫生曾經就呢個傳言解釋，指胃酸嘅酸度好高，除非係「以公升計」咁飲水，如果唔係都好難可以中和到胃酸。而且適量飲水仲有助吞嚥食物添，尤其係過乾、過辣嘅食物！

下午4時

　　下晝放個飲水break，畀自己個腦都唞一唞。

晚上7時

　　放工時飲返一兩杯水，緩解下工作疲勞啦！

晚上9時

　　瞓之前兩個鐘，記得補充下水分呀！記得咪臨瞓前先飲水，好易會水腫和影響睡眠㗎！

　　好多打工仔自覺成日唔夠時間用，除咗工作太忙、公司太多豬隊友、老細個腦太細之外，亦因為能做到真・時間管理嘅人唔多。而且不少人對時間觀都唔太了解，結果有再多時間也唔能夠完成工作。以下幾個對時間觀同工作效率嘅誤解，值得大家反思。學懂改善時間管理技巧，就算做唔到時間管理大師，都要學會用較少時間完成更多工作。

「有更多時間，先能夠完成手上工作」

　　首先要明白，如果係自身唔識好好管理時間，就算一日有 36個鐘，你都係唔夠時間用，36個鐘亦會出現36個鐘工作量。不免經常會感到，今日雖然時間好似鬆動咗，但後來又因出現相對嘅工作而變得好忙。歸根究柢重點係高效率，唔係時間多少；當做到高效率時，時間就會變得更多。所以唔係更多時間完成工作，而係更高效率完成工作。

　　要做到高效率有好多方法。老生常談，最先要學懂何時放棄。何時放棄工作質素、何時放棄某啲工作、何時放棄老細每一個要求等等。當然人人都想每件事情做到最好，但如果時間已迫爆時，只能放棄某啲事情。交由他人處理或用錢去處理，都係放棄嘅一種。不過點放棄都好，絕唔可以放棄自己底線，不然就會跌落忙死輪迴之中。

「親力親為係最好、最快」

　　職場上唔難見到好多高效率、高能力嘅同事，通常都係最忙一群，其中一個原因係佢哋傾向凡事親力親為。經常會覺得「我教得佢嚟，我做自己已經做完」，大多都係藉口。因為當你有能力嘅時候，你就有方法搵到對的人、做對的事。其實主要原因係呢類人往往缺乏安全感，一來唔放心交低工作，二來如果自己有太多空餘時間時，反而感到不安。最後習慣自己親力親為，習慣「忙」呢種感覺，沒完沒了嘅壓迫最後迫死自己。親力親為只能換來一刻嘅方便，要以長線嘅高效為目標先係真理。

「時間管理只在於管理工作」

　　好嘅時間管理同高效工作能力，只係助你完成工作嘅一種方法，係所有事情嘅第一步。最終目的係當你完成工作後，先能夠可以好好管理人生唔同事情。千萬唔好自己已經做到高效，而「搵野做」去填補每一個空檔。得閒冇野做，唔代表浪費時間。人生好多更重要的事情需要管理，不論係家庭、朋友，健康、興趣等，以上先係你嘅目標。緊記，100%填滿工作，並非充實人生。