職場

　　大台舉辦嘅「萬千星輝頒獎典禮」圓滿落幕，「最佳女主角」、「最佳男主角」、「最受歡迎電視拍檔」等16個獎項亦已花落各家，賽果（更多嘅係蕭正楠宣布已和黃翠如成婚嘅消息）更引來網友連日洗版，大部分都係戥「方以因」黃智雯失落視后唔抵。基本上呢，小編都算滿意今年嘅賽果，不過就嫌獎項唔夠「貼地」，於是自發搞咗個「小編獨自一人一票選舉」，為我哋呢班打工仔精選出十位「2018年最優秀職場角色」！

 

第10位：曾棟仁@《棟仁的時光》

 

　　要成為一個優秀嘅打工仔，首先一定要「精於逼車」，話晒香港有成700萬人口，如果無返咁上下「逼車功力」嘅話，就唯有做「遲到大王」（小心收警告信呀）。今年曾棟仁就為大家做咗個最佳示範，望住佢點樣日日逼幾轉巴士由屯門仆到中環返工，仲要識睇燈、攝位，就知優秀打工仔非佢莫屬！

 

 

第9位：「冷凍爺爺」鍾定國＠《逆緣》

 

　　忠忠直直，終需乞食？雖然唔少人覺得打工只係講個「錢」字，唔駛同人講承諾、講原則，但「冷凍爺爺」鍾定國始終堅持，做人做事最梗要係對得住自己良心。睇住佢由1945年嚟到2018年、由遊撃隊成員撈到做社會福利署特別調查組文員、警員，依然對身邊人言教身教兼施，單係佢呢份始於如一嘅正義感，就已經好值得大家欣賞，難怪唔少人都對呢位「冷凍爺爺」心心眼啦！

 

 

第8位：林美香＠《愛·回家之開心速遞》

 

　　「忠心」同「擦鞋」有時其實只係一線之差，就差咗喺有難嘅時候，嗰個人仲會唔會同你一齊捱過去。林美香（Mandy）做得大小姐個秘書，除咗日常要幫大小姐處理文件之外，仲要陪買衫、陪食飯……總之一句講晒，就係「跟出跟入」，而相處期間最唔少得嘅一定係，時時講好話嚟討大小姐歡心啦。雖然Mandy嘅好話有時真係誇張到明眼人一睇就知係奉承說話，但到大小姐有事嘅時候，佢諗都唔諗就即刻衝出嚟幫大小姐頂咗佢。齋係呢份忠心耿耿，已經令佢夠資格登上「十大優秀打工仔」！

 

 

第7位：和珅＠《天命》

 

　　雖然和珅出晒名係大貪官，但無可否認，佢的確係一個情商高、才華橫溢嘅人才，唔單只識得揣摩乾隆嘅想法而深得其寵信，就連宿敵嘉慶帝亦都承認佢「精明敏捷，原不微勞慮錄，是以皇考高宗純皇帝另以厚恩」。

 

 

第6位：「惡人菊」司徒菊＠《果欄中的江湖大嫂》

 

　　天下間最辛苦嘅工作，除咗做人阿媽之外，可能都係做人阿媽。果欄工人「惡人菊」雖然係一個棄婦，但佢為咗三個仔女，一個人默默咁撐起成頭家；而且一啲都唔姿整，做事親力親為、肯搏肯捱，絕對值得欣賞！

 

 

Read More：【活在黑夜的人】子承父業！80後金融男學做果欄掌門

 

第5位：卓差利＠《三個女人一個因》

 

　　今時今日，要喺職場度遇到一個對工作有熱情嘅人，真係好難。一直醉心演藝事業嘅卓差利，寧願冒坐監嘅風險，都唔願意以自己患有焦慮症為抗辯理由，為嘅只係想喺觀眾面前一直維持自己嘅搞笑形象！

 

 

第4位：龍力王＠《愛·回家之開心速遞》

 

　　雖然龍力王（Terry）係龍家二少爺，身分尊貴，不過佢份人無架子之餘，仲深明自己天資比其他人差，所以無論佢做財務部職員、人事部經理、保安、IT部職員都好，都一直謙虛地默默工作，抵讚！而講到佢最令人印象深刻嘅，一定係佢為咗融入IT部，放低晒自己嘅「偶像包袱」，轉著格仔恤衫，仲改埋名做Wi-Fi！

 

 

第3位：顛峰特技隊＠《特技人》

 

　　雖然呢套劇入面，特技場面唔算好多，不過大家都可以喺當中窺探到一班特技人嘅工作辛酸，佢哋唔單只要親身上陣各種危險動作（甚至因為咁而搞到終身殘廢），到完成拍攝、套戲再大賣都好，都唔會有人提起佢哋個名，呢種勇於冒險又不求成名嘅工作態度，的確係好令人欣賞！

 

 

第2位：魏瓔珞＠《延禧攻略》

 

　　講到最優秀打工仔，點可以唔提到魏瓔珞！由小小嘅繡坊繡女，憑住勇往直前嘅勇氣、機敏靈活嘅頭腦、寬廣博大嘅胸懷，一步步化解宮廷上下嘅重重困難，最終走上皇貴妃寶座，佢仲唔係人生勝利組！

 

 

Read More：【點止煲劇咁簡單】職場「受寵」靠什麼？《延禧》教曉我的6大生存法則

 

第1位：「雄姐」呂劍雄＠《跳躍生命線》

 

　　終於嚟到第一位！佢就係……「雄姐」呂劍雄！身為救護員嘅佢，唔單只做事細心，又樂於照顧人，仲非常注意安全添！只可惜意外嘅嘢永遠無人預料到，尤其救護員嘅工作本身就存在一定危險性，結果「雄姐」就喺救護期間遇上唐樓倒塌而墮樓殉職，最終安葬浩園。「優秀打工仔」第一名，佢實至名歸！