【笑中有淚】道盡「扮工」精神！過年必定翻煲的10套經典賀歲片
#職場 #打工仔 #賀歲片 #農曆新年 #辦公室貼士 #新年2019新年將至，除咗食團年飯、行花市、拜年逗利是之外，睇賀歲片絕對都係過年嘅另一指定動作！唔想新正頭入戲院逼餐懵，不如留喺屋企重溫那些年的經典賀歲片，一樣可以開開心心笑餐飽。即睇小編嘅10大推介，包你睇戲嘅同時仲可以學埋「扮工」精神，新一年喺職場如魚得水、心想事成！
1. 《喜劇之王》
扮工金句：「精神啲，臨時演員都係演員。」
早前，由周星馳執導嘅賀歲新片《新喜劇之王》釋出預告片，翻炒多個《喜劇之王》嘅經典畫面，令人忍不住想一再回味呢齣經典好戲！
雖然《喜劇之王》笑點多多，但望住尹天仇（周星馳飾）醉心戲劇表演卻始終無人賞識，心裏不由得慨歎職場「有志難伸」嘅殘酷真相。好彩尹天仇最後都做咗一個最佳嘅追夢示範——頂住旁人嘅冷嘲熱諷、堅持不輸掉自己身為一個演員嘅專業（茄喱啡都要演技！）。所以就算你喺公司只係一個無得say嘅小薯仔，又或者一個被人投閒置散嘅老員工，都要用心打好份工，咁先對得住自己！
2. 《嚦咕嚦咕新年財》
扮工金句：「愈爛嘅牌，愈要畀心機打。」
同親戚朋友「大戰四方城」絕對係過年嘅必備節目，再睇埋呢套以打麻雀為主題嘅《嚦咕嚦咕新年財》，成個package無得頂呀！
劇中「麻雀大俠」（劉德華飾）打遍麻雀枱無敵手，偏偏被前女友詛咒「舖舖摸爛牌，要嗰隻冇嗰隻，出沖，包大牌，叫糊叫死糊，求上不得，求碰不能，一舖清袋，永無翻本之日」，結果就一直輸錢輸到傾家蕩產。雖然係咁，佢依然冇放棄過「人品好，牌品自然好」嘅信念，就算打逆境牌，都堅持要盡力打好佢。呢份逆境自強嘅精神放喺「扮工室」一樣啱用，尤其係當身邊人盡是豬隊友、狼上司，只能靠自己；甚或再慘啲，面對減薪、失業，都要沉著「應戰」，直至曙光出現。
3. 《行運超人》
扮工金句：「食君之祿，擔君之憂。」
新年想行過大運，梗係要搵返套《行運超人》旁身啦！雖然有人話「一命、二運、三風水、四讀書」，不過葉孤紅（楊千嬅飾）話畀大家知，為人心正、待人心誠先至係最無敵。
提起呢套戲，不得不提鄭中基飾演嘅算命師「斷蟹」，雖然佢助紂為虐，暗地裏左右葉孤紅嘅運勢，使其頭頭碰著黑，但其實佢都只係「忠於恩人所托」，唔係全無可取之處。不過各位打工仔要記住，忠心可以，但絕不可以愚忠。
4. 《行運一條龍》
扮工金句：「年初四，假又放完、錢又使晒、工又要返，點會好樣！」
恭喜發財、萬事如意、身體健康、生意興隆……都不及一句「行運一條龍」。喺新年睇《行運一條龍》最令人覺得抵死又有共鳴嘅，一定係李老闆（吳孟達飾）同何金水（周星馳飾）講，地產商「姣婆四」擁有一副「年初四嘅樣」，搞到阿水即刻嚇到面都青埋！其實都唔難明嘅，年初一、二、三快活不知時日過，一眨眼就去到年初四要返工，真係同喺天堂跌入地獄無咩分別。所以小編喺度溫馨提示一下各位腦細、小薯，放完假返工個日記得關心下身邊同事嘅心理健康。
Read More：【萬千星輝「打工仔」大獎】魏瓔珞頂多排 No.2？編輯評選十大優秀職場角色
5. 《唐伯虎點秋香》
扮工金句：「小子，從今天開始，你就是華府的低等下人，9527就是你的終身號碼。開始做事！」
雖然《唐伯虎點秋香》唔係賀歲片，不過喺新年嘅播放率都係非常之高，皆因佢成套戲笑點滿滿，包你笑到停唔到落嚟。
所謂「一入職場深似海」，唐伯虎（周星馳飾）為咗親近秋香，不惜投身華府做食物鏈嘅最低層，仲要一嚟就畀武狀元（梁家仁飾）施展一個下馬威，真係咪話唔用心良苦。不過佢嘅遭遇都帶畀大家一個借鏡，就係「扮工室」總係有一兩個old seafood揸住雞毛當令箭，恃住自己有多少少經驗，就以一副高高在上嘅口吻嚟命令你做嘢，不過「小薯」報仇十年未晚，有實力嘅就唔怕畀人睇低一線，所以喺呢啲關頭，最緊要係能屈能伸，明哲保身。
6. 《國產凌凌漆》
扮工金句：「就算係一張廁紙、一條底褲都有佢本身嘅用處。」
《國產凌凌漆》又係一套包笑到碌地嘅港產片，大家又點可以錯過？常常將豬肉刀掛喺身上嘅凌凌漆（周星馳飾），一直「匿藏」喺街市等待國家委以重任，雖然被人投閒置散咗成十年，但佢「呢啲咁出色嘅男人，無論喺邊度，都好似漆黑中嘅螢火蟲一樣，咁鮮明，咁出眾」，又點會一世被埋沒！所以話，做人千祈唔好妄自菲薄，平時仲要識得好好裝備自己，唔係有一日伯樂出現了，你呢隻千里馬已經跑唔郁！
Read More：【扮工室哲學】對2018年討厭的人與事微笑！與其抱怨，不如改變
7. 《金雞》
扮工金句：「阿金努力，阿金搵到食！」
新春佳節，打工仔梗係要放假陪下屋企人啦，不過有啲工種，例如飲食業、港鐵、巴士、警察……就要繼續on duty，真係咪話唔辛苦呀！雖然小編知道有部分人要喺紅日開工係因為行業／工種需要，但其實社會上都有唔少人係過緊手停口停嘅生活，就算大時大節、人人放假都只可以唱返句「一二三四五六七，多勞多得。一定得，一定得，多勞實會得……」嚟幫自己打氣。
就好似電影《金雞》裏，金如（吳君如飾）係一個不折不扣嘅底層人物，為咗生活，佢15歲就開始做妓女，經歷過許多人情冷暖，猶幸佢仍能保持一顆善良、樂觀嘅心，無論遇到再多嘅困難，都會笑笑口叫自己努力，仲要不遺餘力咁幫助身邊人。呢個處世之道，確實值得學習。
8. 《富貴再逼人》
扮工金句：「依家係請示年代，咩都要請示。」
中六合彩頭獎、一夜之間變成千萬富翁，真係打跛腳都唔駛憂。唔知呢個會唔會就係一班打工仔嘅新年願望呢？不過今時今日物價飛騰，就算真係畀你中到一次中六合彩頭獎，都可能只係夠你裸辭到三五七年咋。想一世人「un un腳」唔駛做？都係繼續請示上天啦！
每逢新年，以「忽然發了達但最後打回原形」為主線的《富貴逼人》系列，絕對係家家戶戶必睇嘅喜劇片，貪佢劇情貼地之餘又幽默抵死，而且仲係由大家非常懷念嘅董驃和肥姐主演添，你又點可以錯過！
9. 《食神》
扮工金句：「煮食之道，一字記之曰，心。」
過去一年喺職場上跌跌碰碰、被人照肺多過被人讚賞，可能唔少人都會開始諗，究竟呢份工係咪真係適合自己，係咪需要辭職轉行？但其實打工仔喺職場上撞板，原因除咗同自身能力不足、工作難度太高、與同事關係不佳……有關之外，某程度都同有冇用「心」有關，以《食神》的史提芬周（周星馳飾）為例，明明有天份、有才華，但就因為成名後開始目中無人，結果就逐漸忽略用心待人接物、料理真材實料嘅本質，結果搞到自己身敗名裂，好彩佢最終痛改前非，習得一身好廚藝，名正言順咁重奪「食神」嘅美譽！
10. 《家有囍事》
扮工金句：「黃臉婆嘅工作唔容易做，早啲辭職啦。」
經典賀歲片又點少得《家有囍事》！呢套集齊由黃百鳴、周星馳、張國榮、張曼玉、吳君如及毛舜筠等多位巨星嘅喜劇，絕對令大家睇得賞心悅目，其中最印象深刻嘅莫過於吳君如飾演苦情程大嫂，以一頭亂髮、汗毛滿嘴嘅形象示人，直至佢發現人生原來可以不用再委屈自己，單單圍住老公轉，於是決定改變自己，後來更風騷咁向小三拋出一句「黃臉婆嘅工作唔容易做，早啲辭職啦」，真係大快人心。
撇開套戲嚟講，雖然唔係個個「黃臉婆」都一定會被老公（或者仔女）嫌棄，但相信每個女人都想以最美嘅一面見人，都想得到身邊人嘅稱讚和肯定，所以過新年除咗講恭賀說話之外，不妨都同老婆／媽媽講多幾句讚美嘅說話，包大家新一年豐衣足食！
Read More：【由失望開始的2019年】拒絕濫用正能量！每天給自己寫一篇殘酷日記