【小薯逗利是錦囊】唔想一開年就得罪腦細？熟讀8大拜年禁忌
#職場 #打工仔 #農曆新年 #新年2019 #辦公室貼士放完新年假第一日返工，最苦中作樂嘅事一定係搵腦細拜年，逗返封大利是！但有唔少打工仔可能太樂極忘形，結果踩中咗腦細地雷都不自知！即睇以下8個拜年禁忌，包你唔會一開年就得罪腦細！
1. 忌「年初四咁嘅樣」
（截圖自《行運一條龍》）
放完農曆年假，Holiday Mood仲未收拾好，返到公司就直接用一副「年初四咁嘅樣」入房同腦細拜年，實死硬！
2. 忌穿著太紅噹噹
（截圖自《愛·回家之開心速遞》）
過新年，雖然係要著到紅噹噹先夠應節，但公司始終係做嘢嘅地方，都係低調返少少好啲。更重要嘅係，著得太紅、太搶眼，搶埋腦細鏡就弊喇！
3. 忌單獨行動
（截圖自《少林足球》）
除非你同腦細關係好好，否則切忌單獨拜年。畢竟公司上上下下加埋，閒閒哋都至少有百幾二百人，大公司甚至會有過千人，腦細真係唔會咁得閒逐個逐個同大家打招呼！再加上，單獨行動有機會令身邊同事覺得你唔合群，分分鐘都會得罪埋佢哋，要小心呀！
4. 忌太早拜年
以為一返到公司就搵腦細拜年係有禮貌嘅表現？No！同腦細拜年切忌太早、太心急！話晒過年後第一日開工，腦細們都可能有公事要優先處理咗先，最棹忌被人打擾。所以大家「出發」前最好先睇睇腦細秘書有咩指示，咁就一定唔怕撞板啦！但如果係腦細出嚟派利是嘅話，咁就唔好太怕羞，主動波行埋去啦，千祈唔好等腦細行到埋你位先起身接呀！
Read More：【開工大吉】同事利是好難逗？醒你5大必勝攻略！
5. 忌兩手空空
（截圖自《火藍刀鋒》）
雖然喺公司同腦細拜年就唔駛送禮嘅，不過禮貌上，逗利是前都係要請腦細食塊曲奇、食粒糖，唔好兩手fing fing呀！
6. 忌講老套祝福語
（截圖自《富貴逼人》）
拜年講嚟講去都係「恭喜發財」、「身體健康」，就算你唔悶，腦細都聽到耳生繭啦！嗱，一於趁豬年學返幾句同「豬」有關嘅吉祥話，就好似：「豬」事如意、「豬」籠入水、妙語如「豬」……
Read More：【拜年必備】唔想對住新戚朋友口啞啞？ 5套有能量的新春賀年語你要知
7. 忌逗留時間太長
喺公司拜年，一般都係講句「恭喜」就ok，最多都係傾多幾句喺啱啱過咗嘅假期做咗啲咩，盡量都唔想阻礙到大家做嘢。同腦細拜年亦一樣，雖然腦細通常都會問多大家幾句「新一年有咩新目標？」，但大家畀個大方向就好，切忌為求表現大講特講，如果唔係真係會聽到腦細頭都痛埋……而且外面仲有好多同事等緊㗎！
8. 忌當面拆紅包
（截圖自影片《新年特備節目-拆利是》@ ThisDV）
收到腦細封利是當然好開心，唔少打工仔仲會好心急想知道腦細有冇好「闊佬」咁封包大利是畀自己！但開心還開心，千祈唔好拎轉面就即刻拆利是呀，非常唔禮貌㗎！不過小編見過有腦細同員工玩「抽利是」遊戲，利是面額有$20、$50、$100、$500等，抽到$20嘅話，就可以即時抽多封，如果係咁嘅話，就唔同玩法啦！