最近讀了一系列二手時裝、二手鞋及二手汽車對東非所造成的禍害。城市人的購物慾無窮無盡，但生活空間有限，於是捐贈成為了購買的最美麗藉口。東非國家如肯尼亞、烏干達、坦桑尼亞等地，80、90年代開始接受西方國家的恩惠，接收大量二手物品。可是壞車、不斷湧入的時裝，為當地帶來交通意外，亦摧毀了東非的成衣業。正所謂「己所不欲，勿施於人」，捐贈前最好多了解物品的去向。
其實，助人除了捐贈之外還有更多永續方案。為了解決農民世代貧窮的現象，過去幾十年出現了不同的討論。公平貿易是其中一個主力協助發展中國家的生產者，改善被剝削的買賣方式的方法。
公平貿易不但為農民帶來更多收入，更關顧到環境及社會民生的改善。今年參與了《餐桌里程︰料理‧好‧空氣》的其中一家位於上環荷李活道的餐廳「Ωohms順逆珈琲酒館」，便是香港少有的全素及推廣公平貿易的小店。店子雖小，但各類輕食、咖啡和甜品都一應俱全。
你更可以在店內購買調味料及乾貨等不同的公平貿易產品。上月周潤發先生亦有幫襯支持呢！
香港地，一講起做飲食業，無論經營者或食客，皆多唉聲嘆氣。前者呻人工材料舖租樣樣貴，根本冇得做；後者呢，同樣呻樣樣加價服務差劣點解唔北上？
究竟這個是否真像？我肥碌觀察，中咗八成左右啦。剩返兩成，並非如此，反見有食肆日日排長龍兼訂位要三個月至半年！
隨便舉例，灣仔浙江軒，樂富海鱻城，以及，近日家中「排骨仔」介紹為父的生煎包點心專門店，全部旺到爆。
香港人口高速老化， 六十歲以上長者邁向三百萬 ，佢哋喜歡乜？十之七八喜歡「懷緬過去常陶醉」。就似小弟，搞親飯局，個個老友都話最好歎懷舊菜，愈舊愈好，若搵到已經消失的菜式更佳。
前排在九龍家全七福，正正試到瀕臨絕種的雞子戈渣，難做到飛起，長者為食鬼一入口，便話真係神仙企唔穩。
好嘞，更多兩蚊雞族鍾情的，當然是飲廣東茶，歎其一盅兩件。不過咁，隨著樣樣成本高漲，不少「飽肚」點心，漸趨消失。經營飲食業老友呻：「碌Sir，你估我哋想咩，若個個嚟整個雞球大包、臘腸卷又或懷舊糯米雞，一塞就飽，拍拍屁股走人，咁我哋賺乜呀？」
唔係冇人想食，係形勢所逼，唔賣！
講返間生煎包專門店，有乜咁吸引，要排隊？第一，客人如潮，故點心流轉快，全部新鮮出爐；第二，價錢平民化；第三，最重要，不少流失了的點心，呢處有。例如：懷舊雞球大包、鮮蝦腐皮卷、豬膶腸粉、乾蒸牛肉燒賣、梅菜扣肉包⋯⋯
久違了的豬膶拉腸粉、雞球大包及乾蒸牛肉。
而此店招牌，正正是生煎包，非常誇張，每份三大個，只賣三十蚊，幾乎枱枱食。分量好勁，你吞一個，必飽咗大半！
招牌生煎包$30 ，三大隻，吞一隻已經半飽。
是日，我只與老婆大人兩位殺去，盡量叫，食唔晒打包，也只能點六款點心，已經「肚滿腸肥」。去時為上午十一點，仍然人潮如湧，有的是一家大細，有的是師奶買完餸，也有的是提早午餐勞動工友，迫爆，從冇一張空櫈。
整個上午座無虛席。門外則有條小人龍。
嚟呢類食肆，絕不可要求食得寧靜、坐得舒服、事事衛生、招呼週到。
總之，未來前清楚自己要乜，有位就即坐低即劃點心紙。點心上枱快歎（因人人都趕），你點好意思細嚼？套用廣東術語——唔該o趙完鬆，俾位下個客。
總結，點心新鮮熱辣好味，Value For Money，旺得有理。
蝦餃、潮州粉果及雞紥等例牌點心也「靚仔」。
但最大弊端，店內冇洗手間，要出街市公廁，真真大鑊，因呢個公廁，也百份百「懷舊」，五六十年代裝修及味道有齊，好惡頂也。
食一半，打包一半，埋單拜拜。
生煎包點心專門店
地址：何文田忠孝街六十號愛民邨熟食店一號
電話：2363 1968