過往專欄

　　辦公室有人為了上位做「擦鞋仔」、有人無心戀戰，日日準時返工放工無驚無險又過一日。驟眼睇後者好似不思進取，唔識為前途而努力打拼，但其實準時收工先係上位之道！試諗下，「擦鞋仔」一星期7日24小時，都要服侍老闆，份糧又唔見得有大增長，不過你都可以話「鐵柱磨成針」，擦到若干年後老闆記起你，等佢加你人工嘅。但原來其他hea底同事利用「擦鞋」時間，日日接秘撈磨練，仲畀佢磨咗個真正機會出嚟添！

　　公司同事Simon，平時返工低低調調無乜特別，只係有時偷懶上下網、睇下facebook，都係人之常情。但原來Simon係個玩具專家！需知道玩玩具唔係細路專利，一啲大人玩嘅玩具，一隻分分鐘都洗你幾個月人工。而Simon就因為自己熱愛玩具，所以做埋香港代理，分身幫香港玩具玩家訂貨賺錢。而平時我地見到佢係辦公時間用facebook、whatsapp，就係用嚟同客仔溝通；偷懶上網睇嘢，就係用嚟source下有咩新款玩具可以賣畀客仔。聽佢講，除咗做代購玩具，仲接埋玩具上色、幫玩具論壇拍片剪片出demo，總之有關玩具嘅工作，佢都可以參一腳賺埋一份。有人可能話「做咁多嘢都唔知賺唔賺到錢。」根據Simon呢個case賺得最多一定係玩具買賣，佢仲話有好嘢炒嘅話分分鐘一隻賺成萬蚊！至於嗰啲玩具後期加工根本唔係用嚟賺錢，而係一種興趣，試諗下有幾多打工仔真係視自己份工為興趣，OT完有滿足感？

　　秘撈達人亦都有女將，女同事Gigi亦不甘示弱。Gigi係個平時乜都答到咀的女仔，由女性用品至男性麻甩資訊，乜都傾到計。最初我地以為佢只係一個為咗Social，乜都「識少少」嘅人。後來先知道，原來Gigi出面接咗多間公司的Social Media maintenance，即係Facebook，IG成日見到出post嘅小編，所以對唔同範疇嘅都有深入認識。據知，因為Gigi相當有經驗，一個post都值$500-$800不等。當你一個page要求一星期出3個post，Gigi共負責緊5個page，保守估計一個月最少可以有7000幾蚊收入。你以為一個月多$7000無乜用？其實最值錢嘅係Gigi得到嘅第一手資訊。所有新產品、新功能、大特價等等，Gigi都係第一個知道。Gigi精通到連大老闆有時都會搵佢問私人嘢，幫得大老闆多自然就有人照啦，真係連啊姐都要忌佢三分啊！所以話，千祈唔好睇小隔離位睇落冇乜上進心嘅同事，人地出面做嘅嘢講出嚟分分鐘嚇到你鼻哥窿都無肉啊！

　　「土壤論」，我查勻網上，也找不到，但這種定論，在中六時，已在腦中萌芽。

　　乜意思？正是，一粒種子，放在某一種土壤上，只要正常施肥灌溉，就會茂盛地開花結果；不過，同一粒種子，放到不合適的土壤上，就算正常施肥淋水，卻可能一日內凋萎，又或，無法開花結果，就算有，也是瘦弱不堪，難抵風雨。

土壤，對任何植物及人才皆十分重要，關乎生與死！

　　點解中六時開竅？因會考成績普通，故被一間高水準的名校請離，改報讀一間低水準的普通書院。就此，變「虎入羊群」，個人突然信心飛升，學業成績立時大進。

　　那年，我開始明白，每個人都有不同天份不同能力，對環境的適應也有所不同，故此，一定要爭取自己落在適當的土壤。

　　講個真實經歷，1987年某一個晚上，仍在公司處理文件時，收到「敵對」機構老闆電話，劈頭就話：「想約你晚飯，可以嗎？」

　　當時，我即時反應：「好，請通知時間地點！」

　　放低電話才知，弊，被上司知道咪死得？竟與對家阿頭單對單晚飯？間諜行為喎！

　　立即找上司通報，佢笑哈哈大方講：「你咪去囉，呢類邀請，我不時都有啦，即係你有料到呀 ！」

　　準時赴會，對方單刀直入：「阿碌，我想挖你過嚟幫手，人工加一倍，職位在我之下！睇好你，不應只做目前的職位，浪費才華！」

　　幸而，我早早有「土壤論」的掌握，禮貌回答：「今晚見面，正因仰慕你在業內的過人貢獻，有機會共飯，是項榮耀。不過，自己知自己事，我的能力、喜好及天份，百分百只適合公營機構；事實，也做得很開心，並得到上司賞識，故準備服務終身，絕不考慮轉機構。但無論如何，謝謝你你的賞識及好意。」

我自知只適合做不以牟利為目標的公營廣播，商營的「土壤」，絕對不利發揮潛能。

　　結果？哈哈，這餐飯有點「不歡而散」，因當年這個小子真是「不識抬舉」。

　　從此，與這位大老闆在任何場合碰見，佢必立時轉身，絕不打招呼。

　　故事繼續下去，此君終於搵咗另一敝機構猛將加盟。不過⋯⋯未夠半個月已「一拍兩散」。這正是掉到不適當土壤中的惡果。

 有土壤也要有栽培者，我的，正是吳錫輝。

　　今日講此主題，因小弟認識眾多香港名廚，上周有位阿A約見，擺明心緒不寧。

　　A君乃香港某大飲食集團靈魂，捧場客眾多，老闆錫晒，剛剛又再蟬聯米芝蓮。

　　突然，對頭大集團老闆約見，拿出空白支票：「我誠意邀請，年薪任開，你填啦。過嚟之後，將再開10間不同品牌店你管！」

　　小弟一五一十將「土壤論」詳細解釋， 阿A若有所思。究竟決定如何，未知。

沈殿霞也是最佳「土壤論」人物，一如不少早年TVB藝人，一過檔亞洲電視，立即黯然失色。

　　英語有云，想一個人成功，就put the right people in the right place；相反，想佢死，就put the right people in the wrong place！