過往專欄

　　近排大台套「BB來了」收視同聲勢都有唔錯成績，起碼連我呢個唔睇電視嘅人都知道佢嘅存在，就證明佢low cost得嚟都有幾高嘅value，成功入屋！佢嘅成功之道除咗因為婆媳紛爭內容一向都係收視保證之外，內容貼地，命中一眾媽媽、師奶群亦係另一個好主要因素。講到湊BB經，我自問真係冇咩經驗及常識，但呢套劇就喚醒咗我扮工經驗以嚟嘅一啲記憶！

　　記得咁多年行走辦公室，有次一個新手媽媽同事Winne有咗，開心又興奮嘅佢用盡大肚婆嘅福利，係空餘時間不停上網查找育嬰資訊。（咁當然，公司同各位同事都唔敢忙親大肚婆，所以對佢自由上網冇太大反感。）因為公開又公然地自由上網，個個經過佢個位嗰陣都會見到有關資料，順便吹水兩句。

　　同事A：「唔洗買水泡㗎，個頭仔扁咗慢慢自己就會圓返㗎啦！我嗰三個咪又係冇用水泡，而家一樣冇事！」

　　Winne：「係呀？咁我唔晒錢買啦。樣樣都係錢，慳返百幾蚊都好！」

　　對話過咗一陣，同事B又走向Winne……

　　「頭先同事A講咩呀？唔好聽佢講呀！BB個頭形好緊要㗎，扁咗圓唔返，到時個頭三尖八角咁，你唔介意BB都介意啦！人地出得呢隻Product就係有呢個需要，你唔係唔記得佢平時做嘢幾俹簁呀？湊BB都一定是是但但啦！聽我講，百幾蚊為咗個B，唔好慳啦！」

　　Winne：「哦……你都講得啱嘅！我再考慮下先！唔該晒！」 

　　辦公室內所有雌性同事都分別向Winnie傳授育兒心得。久而久之，Winnie寧願去Pantry避避對話，靜一靜…… 

　　「哎呀，恭喜你啊！仔定女啊？」 

　　Winnie心諗「又嚟？！」，答：「多謝晒，未知啊，我未去驗啊。」 

　　「你唔可以嚟咁多Pantry㗎，微波爐啲輻射會影響到你個肚㗎！個陣我阿嫂直頭唔食微波爐翻熱嘅食物添，唔係呀，好易生畸胎㗎！」 

　　Winnie心諗：「啋過你咩，你就生畸胎！」

　　經過公司30-80歲嘅女性不停好心提醒，以及眾人嘅經驗分享，Winnie感受唔到溫暖之餘仲覺得好煩，好似去親公司每一個角落都要同人應酬。其實洗腦都算，可唔可唔好將私人瓜葛加入對話之中？每次傳授秘技畀佢之後，都要單打其他人。第時生咗BB出嚟，Winnie應該用A方法定B方法呢？用咗其中一個方法，另一派嘅人會唔會又覺得Winnie埋咗堆呢？講到呢度，Winnie同我講，生仔最煩唔係6299（老爺奶奶），原來係公司同事以及辦公室政治……

　　「土壤論」，我查勻網上，也找不到，但這種定論，在中六時，已在腦中萌芽。

　　乜意思？正是，一粒種子，放在某一種土壤上，只要正常施肥灌溉，就會茂盛地開花結果；不過，同一粒種子，放到不合適的土壤上，就算正常施肥淋水，卻可能一日內凋萎，又或，無法開花結果，就算有，也是瘦弱不堪，難抵風雨。

土壤，對任何植物及人才皆十分重要，關乎生與死！

　　點解中六時開竅？因會考成績普通，故被一間高水準的名校請離，改報讀一間低水準的普通書院。就此，變「虎入羊群」，個人突然信心飛升，學業成績立時大進。

　　那年，我開始明白，每個人都有不同天份不同能力，對環境的適應也有所不同，故此，一定要爭取自己落在適當的土壤。

　　講個真實經歷，1987年某一個晚上，仍在公司處理文件時，收到「敵對」機構老闆電話，劈頭就話：「想約你晚飯，可以嗎？」

　　當時，我即時反應：「好，請通知時間地點！」

　　放低電話才知，弊，被上司知道咪死得？竟與對家阿頭單對單晚飯？間諜行為喎！

　　立即找上司通報，佢笑哈哈大方講：「你咪去囉，呢類邀請，我不時都有啦，即係你有料到呀 ！」

　　準時赴會，對方單刀直入：「阿碌，我想挖你過嚟幫手，人工加一倍，職位在我之下！睇好你，不應只做目前的職位，浪費才華！」

　　幸而，我早早有「土壤論」的掌握，禮貌回答：「今晚見面，正因仰慕你在業內的過人貢獻，有機會共飯，是項榮耀。不過，自己知自己事，我的能力、喜好及天份，百分百只適合公營機構；事實，也做得很開心，並得到上司賞識，故準備服務終身，絕不考慮轉機構。但無論如何，謝謝你你的賞識及好意。」

我自知只適合做不以牟利為目標的公營廣播，商營的「土壤」，絕對不利發揮潛能。

　　結果？哈哈，這餐飯有點「不歡而散」，因當年這個小子真是「不識抬舉」。

　　從此，與這位大老闆在任何場合碰見，佢必立時轉身，絕不打招呼。

　　故事繼續下去，此君終於搵咗另一敝機構猛將加盟。不過⋯⋯未夠半個月已「一拍兩散」。這正是掉到不適當土壤中的惡果。

 有土壤也要有栽培者，我的，正是吳錫輝。

　　今日講此主題，因小弟認識眾多香港名廚，上周有位阿A約見，擺明心緒不寧。

　　A君乃香港某大飲食集團靈魂，捧場客眾多，老闆錫晒，剛剛又再蟬聯米芝蓮。

　　突然，對頭大集團老闆約見，拿出空白支票：「我誠意邀請，年薪任開，你填啦。過嚟之後，將再開10間不同品牌店你管！」

　　小弟一五一十將「土壤論」詳細解釋， 阿A若有所思。究竟決定如何，未知。

沈殿霞也是最佳「土壤論」人物，一如不少早年TVB藝人，一過檔亞洲電視，立即黯然失色。

　　英語有云，想一個人成功，就put the right people in the right place；相反，想佢死，就put the right people in the wrong place！