過往專欄

　　大家玩咗咁耐嘅「估副局」遊戲，今日終於玩完Round 1啦！Jenny早前收到風今日會揭開部分副局同政助名單，所以一早就捕到實，事關Jenny同人打賭咗一杯雪糕，終於臨放工時，政府終於將個名單揭盅！不過，仲有啲位係「待定」中，大家可能會諗，唔通真係冇人肯入熱廚房？定係林鄭想賣吓關子先呢？其實都唔係！據Jenny所知，只係剩低的人選未完成品格審查，所以唔公布得住啫。

今日公布的八名政助

副局政助終有年輕新面孔

　　仲記得林鄭參選嗰陣話要為問責團隊注入年青嘅新血，結果公布新班子嗰日，唔少都仍然係上屆政府嘅人，司局長平均年齡達58﹒7歲，係歷屆政府最大，結果個個都投訴話「貨不對辦」，紛紛將希望投放喺副局長身上。今次副局政助名單出爐，終於有返啲年輕嘅新面孔，林鄭不至於要拆自己招牌，亦睇得出佢真係有心想聽下新一代嘅聲音。

　　睇睇份名單先，最後生嘅副局長得40歲咋！仲有三個咁多！佢哋分別係商務及經濟發展局副局長陳百里、財經事務及庫務局副局長陳浩濂同埋勞工及福利局副局長徐英偉，真係年青有為喇！而且佢哋除咗都係40歲之外，仲有一個共通點，係咩呢？等Jenny轉頭話你知。

今日公布的10名副局長

政府跳板──民建聯

　　啱啱講到三位最年輕副局仲有咩共同點，相信有緊貼時事嘅讀者都會諗到，就係佢哋都係同樣出身建制派嘅政黨。嗱！陳百里同徐英偉都係出身民建聯嘅，而且佢哋都做過上屆嘅政助，今屆就晉身做副局喇！而陳浩濂同埋運房局政助符傳富，都係出身自由黨，依家陳生就可以敗部復活、而符生就由青年團主席，一個轉身做咗政助。Jenny諗諗吓，入啱政黨泊個好碼頭，幾時都有著數！

 
政助未夠30歲　夠晒卜卜脆

　　副局後生，政助仲後生！事關有三個政助都係未夠30歲，最後生嘅就係創新及科技局嘅政助張曼莉，僅得28歲。咁又係嘅，做得創科局，要緊貼一日千里嘅潮流，唔後生啲又點得呢？而跟隨其後嘅仲有商經局政助馮海容同埋運房局政助符傳富，都係得29歲咋！Jenny真係覺得好fresh吖！小妹今年25歲(其實年年都係！)，努力啲的話，唔知到下屆政府時，可唔可以成為最年輕政助呢？到時拎住10幾萬人工一個月，「上車」買樓終於不是夢喇！

　　區議會選舉塵埃落定，估唔到一場事前咁唔被睇好嘅選舉，最終都能夠咁戲劇性收場。唔少人唔睇好投票率，點知喺政府力推之下都推到上27%，仲要臨收工搞到個系統故障要加時作賽，真係劇本都好難寫到咁精彩。

　　今次選舉，焦點並不在於邊個選區選到咩人，而係各大政團最終能夠收割到幾多議席。直選議席方面，44個地區直選選區，一共有88個席位，貴為香港第一大黨嘅民建聯，每區派出一個人，最終只係得3個人落馬，一共奪得41席之多，成功率達九成三。另外佢哋喺地委會界別共有77人參選，68人贏咗，成功率亦有八成八。透過呢兩個選舉已經囊括109席，仲多過梁山泊嘅好漢。

　　睇番搶灘第二位嘅建制派工聯會，25人出戰直選，7人落選，18人搶到議席，當選比率都有七成二，但喺地委會選舉，21人出選就只係得9人當選，即係合共僅取得27席，只係得民建聯嘅四分之一，更遑論其他議席更少嘅新民黨、自由黨同經民聯。

民建聯及工聯會是今次區選得到議席最多的頭兩大政黨。（資料圖片）

　　民建聯紮根地區咁多年，得到較多議席自然係好正常嘅事，例如2015年區議會選舉，全部議席都係直選，佢哋派出171人出選，都有119席，放飛其他建制派政團。不過有其他建制中人就指出，今次完善咗嘅區選制度，直選畀民建聯拎到44席都無問題，但問題在於連地委會界別佢哋都拎到咁多席，畀人嘅感覺就係成個選舉遊戲出現明顯偏差，搞到其他政黨都不是味兒。

　　呢位建制中人表示，依家無咗泛民，全部建制派對陣，好明顯嘅一個效果，就係無論地區直選定地委會選舉，「識得人多就有著數」，佢又話：「大家講嘅政綱都差唔多，喺市民心目中亦都覺得選到邊個都差唔多，所以投票率創新低，而咁嘅環境之下，有樁腳、動員能力強嘅政黨，優勢顯而易見。而民建聯過往做區出身，咁三會入面好多人都有民建聯背景或者同民建聯領導層都係熟絡，進一步鞏固佢哋嘅優勢。試問一日個選舉制度不變，啲細黨或地區聯繫無咁強嘅政團，有乜可能同到佢哋競爭？」而喺選舉期間，已經出現工聯會嘅重量級人馬專係去幫民建聯嘅對手站台嘅現象，好明顯就係大家對於「大黨」好有怨言。

　　仲有個細政團叫香港新方向，讀者可能無聽過，不過佢哋嘅立法會議員張欣宇都算係曝光率幾高嘅議員。佢哋區選出五人，僅僅得一個當選，地委會更加無派人去選。之後佢哋就向全港市民發公開信，信中有一段提到：「政治，從來不應該只是僅僅取悅粉絲或圍爐埋怨的遊戲。政治，本就應當回歸到市民日常生活的每一天。」呢一句正正道出成個新選制之下，要贏，就要靠圍爐、就要靠日常生活嘅每一天去取悅粉絲。睇嚟未來兩年（現屆立法會餘下任期），各大政團都會諗諗計點樣減低「大黨」嘅影響力。