過往專欄

　　「天鴿」襲港後今日街道上一遍狼藉，仍然見識到十級颶風的威力，猶幸香港沒有太大人命傷亡！而十號波狂風暴雨之下仍要報道風暴消息嘅行家、繼續返工嘅運輸業、飲食業、保安業人士，仲有周圍救人嘅消防哥哥……總之邊個打住風都要返工嘅，Jenny在此向你地獻上最大嘅敬意!

你睇！民政事務局副局長陳積志（左一）同 局長劉江華幾friend。

一上任就打十號波

　　風就打完啦，大家今日都要繼續返工，政府都唔例外。今日民政事務局局長劉江華今朝一早就Call定記者，話介紹新返工嘅副局長同埋政治助理畀大家識喎！原本噚日打十號波之際，亦都係民政事務局副局長陳積志（Jack）第一日返工嘅大日子，但係因為「天鴿」非常惡嘅關係，噚日日間都係掛十號同八號波，陳副局就同大家緣慳一面。

　　陳積志個名大家可能陌生一啲，但係佢其實係一個非常資深嘅AO，未做副局前屬公務員職級入面嘅首長級乙級政務官（D3）。根據政府資料，陳副局曾經喺前文康市政科、警察總部、前民意匯集處、前政務總署、香港駐三藩市經濟貿易辦事處、前公務員事務科、前保安科、大學教育資助委員會、前工務局、前環境運輸及工務局、發展局、民政事務局及民政事務總署。就咁睇真係一個「周身刀」嘅公務員噃！至於係唔係「張張利」呢？Jenny遲吓再八過大家知！之不過，上得呢副局呢個位，總有啲本事嘅！

傳同西環Friend底 副局唔認「紅底」

　　作為一個非常資深嘅AO，據Jenny收到嘅風，陳副局同好多地區嘅建制派人士都好熟，仲傳過佢同中西環好Friend添！Jenny聽聞陳副局喺AO界唔算有太多朋友，未做副局前係D3級，而家升咗做副局，可以話係爬咗唔少師兄師姐頭。

　　據聞當日不少AO收到陳積志將要做副局呢個消息口嗰時都好詑異，但係局長劉江華就偏偏對佢情有獨鍾，非君不用！最後，就係今日大家就見到咁，佢地兄弟班咁款見傳媒囉！

　　對於好多人話佢「紅底」，陳副局今日見記者時就梗係即刻否認，「首先我唔係咩『紅底』！」仲話同無數公務員合作無間，相信喺未來嘅日子，雖然身分轉咗，但對住相識幾十年嘅，相信工作上絕對唔會有問題咁話。Jenny都希望承你貴言啦！

　　陳副局一上任就打十號波，狂風暴雨立立亂，有人就問副局覺唔覺得開局唔順利呀？陳副局就同Jenny講話絕對唔擔心呢家嘢。政府中人仲即刻幫陳副局講說話，同小妹講，其實陳副局噚日一落波就返咗嚟做嘢㗎啦！只不過見十號波嘅威力咁強勁，梗係唔好要記者特登冒險過嚟採訪啦！咁又係嘅，古語有云：「貴人出門招風雨」，不過，做民政梗希望無風無浪，所以陳生你唔好再招惹狂風巨浪喇！

　　童年時，經常被長輩忠告：「智華呀，記住，做人要專注一強項，切勿變『周身刀，冇張利』！知冇？」正是言者諄諄，聽者藐藐。我從來不贊同。當然，為免麻煩，也不會駁嘴咁傻。

　　直至在香港電台工作後，認識了蔡瀾。更肯定，人，其實是可以「周身刀，張張利」的！

蔡瀾，是我見過「周身刀張張利」的最犀利人物。他的書法，國內價值甚高。

　　年近八十歲的蔡瀾，是我的偶像（呢個世界冇幾多個㗎咋！）。作為粉絲，小弟頗受佢的人生觀影響，再跟隨。其中有兩項最重要！

與倪匡這對活寶貝，是逍遙人生專家。

　　第一：山不轉路轉，路不轉人轉。基於蔡瀾早年出任電影監察，不斷在東南亞各國奔跑，協助電影製作團隊解決古靈精怪的問題。又要面對不少擺架子難相處的性格導演及天王巨星。所以，再棘手的人、事、物麻煩都遇過。久而久之，真真正正可以做到「天跌落嚟當被冚」。世間上冇乜事不能解決，轉過彎就可以了。例如，早年豬流感傳入香港，一段時期冇新鮮豬肉食，蔡生在電台就以開朗笑聲話：「使唔使死？冇新鮮豬肉食，可以食歐美急凍豬肉。再冇，可以食牛肉羊肉。再冇又可以食雞鵝鴨海鮮。就算乜肉都冇，簡簡單單食齋菜生果也可，使乜成個大喊十咁呀？」

任何「玩意」落在他手上皆可變「生意」。

　　呢種豁達開朗，小弟百分百認同及跟隨。

　　第二：著名食肆冇位俾我？最好廚藝唔輪到我欣賞？易！一於努力寫寫寫。寫乜？寫食經！由寂寂無聞寫到人盡皆知。自然，間間食肆歡迎你，個個大廚見到你「神咁拜」！

沒有甚麼人可有如此江湖地位，絕對「我口講我心」。

　　是否次次做到？當然不是。但呢種自我主動開拓性精神，若有，在人生很多環節上皆無往而不利。

　　蔡生一生快快樂樂享受人生，恍似從不需要認真工作，就像日日在退休，在享受人生中。

蔡瀾的女人緣羡煞普天下男性。他的「有趣」及「有風度」，是吸引女性兩大磁石。

　　其實呢？佢根本冇興趣也不會過俗世的「退休」生活。反之，仍然周身癮，不少足以帶來財源滾滾。例如，過去年多面對疫情，被迫留港甚至留家。蔡生就積極研究食品，寫書法，寫揮春（可賣到錢的呀！ ），拍YouTube飲食節目，寫專欄……充實到不得了，笑看人生中渡過每一天。

他隨身的「和尚袋」，也成淘寶熱賣貨品之一。

　　蔡瀾還有幾點小弟努力學習的，是：一、準時；二、守禮；三、整齊；四、衛生；五、事事求專業。

　　第五項，非常重要。若不追求事事專業，那麼，你只會永遠是個「周身刀，冇張利」的平庸之輩。