過往專欄

　　新任律政司司長鄭若驊第一日上任就被爆咗個僭建風波出嚟，都可以係話今屆政府開局以嚟最大嘅醜聞，仲要呢位新任律政司司長本身都有土木工程師資格添！Jenny真係好好奇，點解咁多官員都鍾意「玩」僭建嘅呢？唔通其實呢個就係做官嘅「必要條件」嚟？真係好玩唔玩喇！

今次真係考鄭司長智慧喇！

影「全相」有航拍機就得喇！

　　Jenny仲記得，當年嘅「唐宮風暴」就間接令唐英年冇咗特首寶座，嗰排啲行家日日喺約道7號門口捕住，仲Book埋「吊雞車」由上而下影落嚟，就係為咗張「唐宮」全相。Jenny企喺出面望住，都已經覺得好震撼！（聽聞當年有行家雖然畏高都頂硬上，上咗「吊雞車」，非常專業！）不過去到今日，要影「全相」唔使用「吊雞車」嘅，有部航拍機就得喇！話口未完，Jenny就見到頭頂有幾部機飛過喇！

帆哥去過大宅但唔知有景轟？

　　相信大家同Jenny都係一樣，正正係因為今次嘅僭建風波，先至認識司長嘅「先生」、前香港工程師學會會長潘樂陶。仲有行家摷出，當年為佢兩個做男方證婚人嘅，竟然係而家嘅運輸及房屋局局長陳帆（帆哥）添！帆哥仲話自己都去過潘生屋企幾次，不過就冇留意僭建問題咁話喎！不過，大家咁熟工程嘢，你話冇留意、唔知道，Jenny真係覺得好匪夷所思囉……

　　嗱！今日屋宇署就派咗人去視察，Jenny就同大家一齊睇吓新司長同佢老公嘅兩間獨立屋，到底有咩僭建物啦：

4號屋（鄭若驊寓所）

1. 一間3.5米乘2.5米、高2.5米的天台屋；

2. 一個50平方米（約500呎）地庫；

3. 車房對出一個15平方米玻璃L型簷篷；

4. 地下樓層有0.5米乘5米、高3米的外牆擴建物。

3號屋（潘樂陶寓所）

1. 一間3.5米乘2.5米、高2.5米的天台屋；

2. 一個50平方米（約500呎）地庫； 

3. 車房對出兩個分別8平方米及4平方米的玻璃簷篷；

4. 地下樓層有1米乘5米、高7米半的外牆擴建物；

5. 花園水池，5米乘2.5米、高1米。

買定花生等睇戲

　　唉！今次呢個「僭建風波」唔知會點落幕呢？好打得嘅林鄭今次會點聯同各級官員幫鄭司長解圍呢？定還是鄭司長會主動一「辭」以謝天下，為林鄭班子保住面子？計Jenny話真係好睇過大台台慶劇！

　　有老友問我，點解在一場黑雨之後，有不少獨立屋豪宅變成危樓，反而聽唔到公屋或者居屋出現問題，我話這是監管問題，做政府工程一定按本子辦事，只有做多不會做少，如果有問題寧願拆了再起過，否則如果出事就可能是刑事責任。

(Shutterstock)

　　大家都知道，香港的獨立屋是很貴，如果能夠在安全的情況下加建，甚至僭建，令到平均呎價下降，吸引力是相當大，相信有不少獨立屋業主有加建或者僭建，甚至已經是公開的秘密。

　　由於受到地積比率所限，任何加建都會超過地積比率，所以，獨立屋的業主是很難合法加建，既然不合法，就一不做二不休，將加建面積去到最大，而你唔做，但見到其他業主去做，在加建之後實用面積大了很多，自然會心思思去加建，而且政府又唔多理，合唔合法都唔知道，真係唔加建就笨。

　　有人話，大廈管理處應該負一定責任，理論上的確如此，但試問那些已分拆出售的獨立屋，管理處是業主立案法團，會唔會自己倒自己米，況且大部分業主都有加建，管理處亦無謂做醜人，正是集非成是，大家都以為僭建是合法的。

　　今次極長時間黑雨，令到不少獨立屋變成危樓，原來大家發覺那些獨立屋並沒有合法申請加建，估計那些業主一定要還原，幸好沒有出現人命傷亡，否則公務局就責無旁貸，老實說，現在政府一定會執正嚟做，有僭建的業主想唔還原都唔得。

　　有不少人不明白，每一次買賣交易，賣方都要證明物業是沒有違規僭建，否則買方有權不成交，點解重會有咁多違規僭建，理論上的確如此，但不少豪宅是以公司轉讓形式進行交易，是否有僭建是不會影響交易，只要公司股權轉讓清晰便可以，最後令到違規僭建愈來愈多。