過往專欄

　今晚就係立法會補選候選人簡介會，咁就意味住選舉主任嘅「DQ工程」都暫時告一段落，入咗閘嘅候選人終於可以安心做選舉工程喇！當然小妹忙碌嘅生活亦會更加忙碌啦！

今晚就係立法會補選候選人簡介會，會前抽籤各候選人號碼。

4個被DQ 3人唔真心1人唔夠數

　　Jenny同大家埋單計數睇睇先！而家總共有4個參選人被DQ咗，新界東同港島區各有2個。新界東包括有本土派嘅劉頴匡同陳國強，佢哋兩個都簽咗確認書，但都係被人覺得「唔真心」而被踢走。港島區被DQ嘅就有自決派嘅香港眾志周庭，同埋退休牙醫馬金泉，周庭被DQ嘅爭議聲就大到街知巷聞，Jenny在此不贅，至於呢位馬醫生嘅DQ原因竟然係……因為提名人數不足？！老實講，Jenny都O咗嘴，乜工作人員唔係喺報名嗰陣就會校對晒啲簽名嘅咩……真係耐人尋味！

區諾軒係agnès b？

　　以往早有DQ嘅先例，今次仲要係單議席單票制，民主派梗係做定兩手準備喇！所以作為Plan B嘅區諾軒喺周庭被DQ嘅同日朝早就「突擊」報名，噚日終於都收到確認資格嘅通知，今日先補返個記者會，正式宣布參選。

　　雖然區諾軒喺政治光譜上係近泛民多過近香港眾志嗰邊，不過由佢補位上去選港島區，大家都好難唔將佢同周庭相提並論！區諾軒就講笑話：「我成日都聽講……有人笑稱周庭嘅Plan B係 agnès b（周庭英文名係Agnes）！」引起全場爆笑！之不過，劉頴匡都被人話「顯然繼承梁頌恆」咁區生你都好難免畀人哋話「顯然繼承周庭」噃！怕唔怕再畀人針住話係自決派先？區生即刻轉Mode，正經到好似拍廣告咁答：「我就係我，我就係民主派區諾軒！」應對時搞笑又得，霸氣又得，Jenny估唔少選民都Buy呢套，睇嚟陳家珮(Judy)真係要小心啲，再定過個選戰策略！　

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」