過往專欄

　　立法會繼上個星期完咗行政長官質詢時間，今日又有見林鄭去立法會接受質詢？可能有朋友仔會問：乜唔係每月一次咩，點解變咗每個星期都有嘅？原來係今個月本身有4個禮拜，不過因為農曆新年嘅關係，有兩個禮拜都冇會，而最後一個禮拜就係公布新一份財政預算案嘅日子，所以今個月嘅質詢時間就調咗喺今日進行喇！今日林鄭可謂戰鬥力Power Up，句句回答聽落都有啲嘢！

林鄭今日到立法接受議員質詢，面色不若之前兩次寬容。(政府新聞網片段截圖)

　　其實，計埋上個月頭嘅行政長官答問會，今年只係開始咗短短40日唔夠，林鄭就已經嚟咗立法會三次喇！Jenny見林鄭頭兩次嚟都冇乜同議員有言語上衝突，就算好似上次律政司司長鄭若驊嘅僭建風波，幾乎被圍攻，林鄭都收放自如，唔見唇槍舌戰，冇咩火藥味。

林鄭面燶燶 議會火藥味濃

　　不過，今日民主派第一個提出質詢嘅嘅民主黨許智峯問到，噚日「雙學三子」上訴得直，政府會唔會覺得自己有錯，平日答問題總會面帶微笑嘅林鄭面色開始麻麻地；之後再到熱血公民嘅鄭松泰（泰博）問有公務員透過轉移物業畀伴侶後再買樓，當中慳咗成500萬嘅首置稅，質疑政府嘅利益申報同品格審查有漏洞，甚至畀人「好Cheap嘅感覺」。林鄭塊面就立即變黑亦得，得咗！直斥有啲議員同埋傳媒利用一啲「似是而非」嘅資料，然後「穿鑿附會」、抹黑個別官員或公務員，係非常有問題！雖然用字遣詞、語調依然同一貫冇分別，但你絕對Feel到出事喇……

「清者自清 社會自有公論！」

　　林鄭無名火起，Jenny都嚇咗一跳，唔通喺林鄭心目中，涉事嘅兩位常任秘書長仲重要過鄭司長？無幾耐謎底終於解開！

　　林鄭之後「爆Seed」主動講起今日有某間週刊嘅封面故事，指佢推動「同股不同權」，係助內地科企「小米」上市，從而令大仔林節思可以上位。佢忍唔住再次大鬧篇報道「呢啲穿鑿附會、似是而非，我唔打算告佢誹謗，因為係嘥我時間同埋精力，我覺得清者自清，社會自有公論！」（言談間串埋前任特首CY鐘意出信告人，勁！）原來一切係因為囝囝無端端畀人擺上枱，難怪做阿媽嘅林鄭心情咁差喇！泰博都只不過係話嗰兩位常秘涉嫌扮首置慳稅，點知就誤踩地雷喇！

林鄭同大仔林節思感情好好，囝囝上年仲專程由北京飛返香港為媽咪助選。(資料圖片)

　　平心而論，小妹明白點解林鄭嬲豬，因為啟動「同股不同權」機制嘅係港交所，拍版嘅係財爺，諮詢嘅係市民同市場人士，但就拉埋林鄭同佢囝囝一齊講，真係夾硬嚟咗啲囉！最後，Jenny忠告各位；世上有兩種人千祈唔可以得罪，第一種係女人；第二種係做咗人阿媽嘅女人！

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」