過往專欄

　　人人都知睇港股走勢就睇恒生指數，Jenny今日話你知原來一國兩制都有「指數」㗎噃！講緊就係行政會議成員湯家驊(Ronny)搞嘅「民主思路」自從上年回歸廿周年開始，每半年發布一次嘅「一國兩制指數」喇！既然係上年開始搞，所以今次都只係出到第二期，恒指呢排經過大跌之後升返少少，唔知一國兩制指數又點呢？Jenny一於就去睇過先！

 「民主思路」自從上年回歸廿周年開始，每半年發布一次嘅「一國兩制指數」。

跌幅細到宋教授都Surprise

　　近排政圈發生咁多事，今次調查期間發生咗一地兩檢、DQ事件、修改議事規則、「13+3」判監等具爭議性事件，研究員初初仲以為個指數會跌得好勁，點知兩次調查結果按完全可比口徑對比的話，個數都只係跌咗0.3%，即係由6.46去到6.44分。負責今次研究嘅民主思路理事宋恩榮教授都忍唔住話個跌幅係「出乎意料咁細」噃！言下之意，即係教授你其實覺得一連串事件係會大大衝擊到一國兩制？

　　作為行會成員嘅Ronny聞言梗係即兜啦！話係因為香港人「好務實」，唔會輕易受政治口號唆擺喎！Ronny話，「一國兩制」指數分兩部分編成，一部分係由中大亞太研究所對香港市民進行電話調查，另一部分係國際智庫對香港自由和民主水平所編製的「自由民主指數」。佢自己對政治新聞好敏感，日日起身都睇幾份報紙，但係香港有幾多人會好似佢咁日日睇幾份報紙吖！？所以評分冇乜大變，雖然係出乎意料，但都係可以解釋到嘅！

矛盾不是女人專利

　　如果單睇個電話調查嗰Part，香港市民對「一國兩制」嘅評價指數係4.98分，Jenny記得上一次個指數係4.84分，當時Ronny話個分數係「唔合格」，唔知今次Ronny又點睇呢？Ronny就有少少老尷咁話今次指數嚴格嚟講都係唔合格，但係社會唔應該只睇絕對數字，應該係睇返個趨勢，個趨勢都係向上升緊嘅！呃……個分跌又「感正面」、個分唔合格又叫人睇返趨勢……所以唔好話女人矛盾喇，你睇，男人有時都幾矛盾㗎！

林鄭！俾啲掙扎！

　　CY在位之時社會有幾撕裂大家有眼見，所以調查入面又問到，特首林鄭月娥上台之後，覺得社會撕裂嘅情況有冇改變？結果係50.7%市民認為「冇變」，42.3%市民認為「減少」，7.0%市民就認為係「增加」。

　　Ronny同教授都話反映到林鄭上台後市民普遍都覺得「正面」喎！之但係，一半人都覺得社會撕裂嘅情況係「冇變」，如果一半人都覺得林鄭上場後都仲係同ＣＹ時代一樣「冇變」，Jenny點睇都覺得市民唔似Ronny同教授所講咁對林鄭上台咁「正面」噃！咁當然，覺得撕裂減少嘅人都有四成二，林鄭都算做咗啲成績出來，但要再俾啲掙扎喇！

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」