過往專欄

　　Jenny同各位打工仔都一樣，臨瞓前鍾意碌吓Facebook，回顧吓成日發生過啲咩事。噚日Jenny碌碌吓，就見到公民黨嘅譚文豪（Jeremy）有新Post喎！原來係有人向佢設訴，喺選舉事務處嘅培訓簡報入面，講到票站職員原來發現選民有「掌心雷」係唔駛干預，因為有關行為並不構成罪行喎！Jeremy梗係嬲嬲豬喇！事關建制派最鍾意用呢招「教」啲公公婆婆投畀邊個呀嘛！不過既然選舉事務處話唔犯法，泛民學嘢喇！

箍實長者票 南亞裔票亦不可少

　　不過喺建制派好落力咁箍實公公婆婆啲票，驚佢哋唔記得自己嘅同時，社會上都有好多被忽視嘅族群嘅，例如少數族裔咁啦。出得嚟選，呢啲市民嘅票當然都一張不能少，尤其油尖旺、九龍城和深水埗係少數族裔嘅聚居地，所以Jenny呢排都見到九龍西兩個候選人鄭泳舜（舜仔）同姚松炎（姚教授）都有喺吸引少數族裔選民方都下咗啲工夫咁噃！

做嘢淨係快係唔夠㗎！

　　雖然兩位候選人幾乎係同時出Post，時間上睇就係舜仔險勝，之但係論誠意啦喎……大家睇埋落去就Feel到。

　　嗱！舜仔曾經係民建聯少數族裔委員會成員，當然識得唔少朋友仔啦，所以就整咗張合照，加埋例牌「民建聯成功爭取」乜乜乜，Caption都幾貼心，記得用英文寫，但係內容只係Copy返預算案，讚吓財爺肯撥5億加強支援少數族裔。之但係Jenny有少少印象，爭取支援少數族裔好似唔只民記有講㗎噃，今次淨係拎份財政預算案整Banner，「抄考」成咁，誠意似乎都係爭咁啲喇！

　　民主派呢邊姚教授同佢嘅友好團體就以少數族裔嘅語言寫Banner，都可以話係前無古人喇！仲有烏都語、印度Hindi語同埋印度雅利安語3種版本添！雖然冇姚教授個大頭，不過塊Banner係人手逐隻字寫出嚟，難度分都幾高！Jenny聽講仲有好多少數族裔市民都覺得好Warm添！所以話呢，好多時做嘢，淨係快又真係唔夠㗎！呢份心思，就輪到建制派要學嘢喇！

　　九龍西候選人還有蔡東洲。

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」