13/03/2018
立法會不思義之：被咀咒的健身室 咖哩飯最記得
#立會補選 #立法會 #選舉 #范國威每個地方都有屬於佢自己嘅都市傳說，就好似學校邊個廁格都冇啦啦自己沖水、某某電台深夜做節目嘅時候突然聽到一啲怪聲……所以立法會都唔例外，呢排適逢立法會啱啱出咗補選結果，Jenny就同一眾立會新丁講吓做議員嘅「頭等大忌」先！
要Fit啲個Body做Gym係好方法，但有啲地方都係唔好再去好啲喇！
咖哩飯重返Office咪再去喇！
可能好多人會估：「唓！大忌咪就係宣誓玩嘢囉！」Jenny只能講一句：「少年，你太年輕了」！因為呢個大忌一犯，就算你正常宣誓都會出事！而今次贏咗新界東補選嘅新民主同盟范國威（咖哩飯），都曾經係受害者之一嚟㗎！
新丁謹記 否則ByeBye
呢個都市傳說，就係入過立法會間健身室，下次選舉就會入唔返議會！而大家有Follow開咖哩飯嘅專頁話，都知道佢閒時都會去做吓健身、操Fit啲個Body咁，所以立法會有個健身室就方便佢日日操啦！結果上次2016年換屆選舉，咖哩飯真係返唔到議會。據聞連沖個涼都會「中咒」！結果呢個健身室人人敬而遠之，使用率近乎零。據Jenny所知公民黨黨魁楊岳橋（AY）更已經下令黨員嚴禁使用5樓健身室！寧可信其有吖嘛！贏個議席返來好辛苦㗎！
經過咗兩年，唔知係咪呢個「連任失敗」咒終於消散，今次咖哩飯憑新界東補選重返議會！所以各位新丁／舊人記住，入到立法會之後千祈唔好去個健身室做Gym喇！想身體健康Keep Fit？落去樓下添馬公園跑吓一樣得啫！