青年民建聯顏汶羽成「青民吳克儉」？
#民建聯 #Taste of Hong Kong #特首話說前晚民主黨就首得特首林鄭捐款三萬，隨即引起各大建制派「葡萄」，紛紛問「咁我值幾多錢呀？」不過小妹就諗起，以建制派入面最有頭有面嘅民建聯（民記）為例，賣幅字畫都可以籌好多個「三萬」啦！
等Jenny同大家介紹下，左起李均強、胡綽謙、顏汶羽。
個個月都飛 唔通個個月都想飛？
嗱！今日Jenny去咗民記「個仔」──青年民建聯（青民）個傳媒聚會，佢哋個主席顏汶羽（Frankie）就同Jenny講，今年個個月都要飛一次咁滯：3月去廣州、4月去安徽，又去韓國旅行、6月去重慶、7月去杭州、8月去上海、9月就自己生日所以想飛轉日本、10月去西安、11月去台灣睇大選、12月就去北歐過白色聖誕！Jenny一聽，即刻就諗起一個人，就係前教育局局長吳克儉喇！
Frankie身邊嘅副主席胡綽謙一聽到Jenny講，都忍唔住笑咗出嚟，仲伸多腳：「佢邊有一個月睇30本書呀！」Frankie亦都大呻，雖然有得月月飛，但係就算係飛去公幹都係要自己扲荷包㗎！不過照咁睇，Frankie連去工幹都可以自己出錢咁有財力，咁小妹覺得民記咁多位又點會「葡萄」個三萬蚊呀！
林鄭會否快閃Taste of Hong Kong拭目以待！
Jenny就冇Frankie咁財力厚，但好彩fd子多，喺萬豪國際（Marriott International）做嘅朋友知道小妹前排做完立會補選好辛苦，聽日又要去立法會做跟進《國歌法》同「一地兩檢」報道，即刻就帶咗小妹去食好嘢，等我叉叉電咁話，平平哋去咗Taste of Hong Kong，一次食勻佢哋集團旗下五星酒店嘅米芝蓮菜式，真心好食到不得了！（我已經充滿力量喇！）
嗱！上次特首林鄭月娥就快閃去咗香港美酒佳餚巡禮，吸引唔少人同佢Selfie，今日Jenny食完好嘢，都行咗陣，期望林太趁開幕日去行個圈，畀小妹野生捕獲，可惜失望而回！大家如果見到特首出巡記得話畀小妹知呀！
原諒小妹放毒，右上紅菜頭醃三文魚賣相勁靚；右下煎銀鱈魚配鮮奶油芝士好香好滑；左下香煎帶子配蕃茄三文魚子超級鮮味！