過往專欄

　　唔經唔覺香港首位女特首林鄭月娥已經當選一周年，仲記得當日雖然大家都話無懸念，但Jenny喺會展睇住開票其實好緊張！參選人辛苦拉票，一日跑幾場係等閒事，其實追訪嘅記者都不遑多讓，日日做到冇停手，小妹同埋同事都唔知付出幾多汗水同通宵。不過，努力係有回報嘅，除咗各位讀者對報道嘅點擊之外，Jenny噚日就收到個喜訊，《經濟通》攝影記者張嘉奇憑住曾俊華於開篷巴士接受支持者打氣嘅相，成功喺《前線．焦點2017》新聞攝影比賽眾多優秀作品中，脫穎而出獲評為一般新聞組嘅季軍。

要影到呢張得獎相片一啲都唔容易!

一張相一個故事 辛苦拍攝有回報

　　《前線．焦點》新聞攝影比賽來頭唔細㗎，於行內極具認受性！佢係一年一度全港最大型新聞攝影比賽，最早於1993年開始舉辦，係本港同類比賽中規模最大嘅一個，得獎都咪話唔威！《前線．焦點2017》睇名就知係挑選上年影到嘅精彩作品啦！今屆比賽共收到70名參賽者加埋1405張相片，比賽共分7個組別包括：一般新聞、突發新聞、人物、圖片故事、自然與環境、特寫，以及體育，經過三輪評審後，每組最多選出6張得獎作品，包括冠軍、亞軍、季軍及優異。其中一般新聞General News組別今屆有成180張參賽相片！

站在前線找對焦點 點只撳快門咁簡單

　　據Jenny所知，有得獎者知道獲獎時開心到大聲叫咗出嚟！遲啲得獎相片就會公開展出，務求向社會大眾展示具歷史意義，又兼具新聞同藝術價值的攝影作品，Jenny就最希望可以加深市民對時事嘅關注同認識，令普羅大眾更認同攝影記者同傳媒嘅工作喇！每次見到Photog（攝記）哥哥拎住幾乎重過一個人嘅器材爬高爬低、走來走去，就係為咗一張靚相，Jenny對佢哋敬業精神不得不寫個服字！

　　其實，我哋嘅同事喺特首選戰入面仲影咗唔少精彩相片，各位不妨Click入去以下連結重溫：

http://lifestyle.etnet.com.hk/column/index.php/archive/ceelection

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」