過往專欄

　　補選又來了！講緊嘅就係自劉小麗放棄DQ案上訴之後，九龍西將會喺11月25日就佢被DQ之後空出嚟嘅議席進行補選。小麗就決定咗要重奪議席，反而建制呢邊，一直盛傳係咁被遊說參選嘅食物及衛生局前局長高永文（高醫生，又稱「民望高」），今日就走出嚟話「唔Go」，建制今次點算好？

　　不過其實高醫生之前退出政府呢條火線時，早就講過自己最想係做返臨床工作，佢今日都話，如果當選咗立法會議員，冇可能兼顧到兩方面嘅工作，所以唔會去馬。

得力助手陳凱欣「頂上」？

　　今次高醫生「唔Go」，呢排喺九西廣掛Banner嘅經民聯梁文廣係唔係有機出戰呢？非也、非也！政界已經講緊，高醫生唔想Go，仲有佢個得力助手、做過記者嘅前食衛局政治助理陳凱欣「頂上」！搞到梁文廣都話希望建制快快手協調好，可以齊心團結為補選作戰。睇嚟阿廣都有啲坐唔住咁啦噃！

　　Jenny就問過阿欣，佢話事件「嚟得太快」喇！而家仲未決定到，要諗埋個人事業發展、政治環境等因素先。佢亦都話，而家暫時唔會為下決定設Deadline，實行「慢慢諗」政策。不過補選選戰唔易打，今次仲要遲過對家出牌，建制同阿爺點睇都唔會肯畀你諗咁耐噃！

建制好少可遲過泛民出手 下星期便知有沒有

　　記得，上次民主派就為咗補選傾咗好耐都冇結果，喺補選前個零月先定好補選人選；相反建制派大半年前就已決定好，有得早一大截時間開始宣傳，加上大量人力物力，源源不絕嘅資源，點睇都有優勢過民主派啦！

　　不過，今次補選係因為劉小麗放棄上訴而觸發，民主派嗰邊已經決定咗「DQ主角」優先，做「Plan A」嘅劉小麗，已經開始同佢屬意嘅「Plan B」李卓人齊齊行孖咇；反而一向準備充足嘅建制派竟然仲未傾好派邊個出，而家離補選得返3個月左右嘅時間，唔多似佢哋嘅作風！Jenny估計，雖然今日高醫生宣布唔出、阿欣話諗下，但係建制派應該都差唔多協調到人選，話唔定下星期就有結果喇！大家拭目以待啦！

　　九龍西第二次補選周日塵埃落定，由「三次唔認係建制」嘅陳凱欣擊敗泛民李卓人當選，重演鄭泳舜打低泛民嘅一幕。

　　選完之後，問責泛民之聲四起。有泛民支持者（包括李卓人自己）繼續批評馮檢基鎅票，又有人話泛民多年來不思進取、食老本，吸唔到新生代票源，搞到今時今日咁樣真係自己拎嚟。但點講都好，從兩次九西嘅補選，有兩大啟示，的而且確係泛民需要認真面對。

　　第一次補選，姚落敗，有人話佢選舉工程「離地」，無用到傳統選舉嘅策略，即係大開街站、洗樓等等。OK，咁剛剛呢次又點？乜都做足了，連泛民大佬都齊齊出來拉票了，結果李卓人同馮檢基得票總和同姚松炎不相伯仲，呢個就顯示出，泛民係老態龍鐘，基本盤係咁多就係咁多，含淚投票嘅遠遠多過無私支持，無少到票已經要開香檳，遑論話可以開拓後生仔嘅票源。

　　呢個啟示帶出嚟嘅後果對泛民極為不利。兩次選舉之後，Tina聽聞已經有建制派提出研究將選舉改返為單議席單票制嘅可行性，因為非建制嘅票源已經劃咗兩份，每一份都唔會投去另一邊，變相對建制有利。建制喺呢兩次選舉之中亦都見到泛民散過散沙，所謂合作只具形，根本就唔似建制咁齊心咁實在，若果日後立法會直選轉做單議席單票制的話，淨係泛民協調出選已經令佢地頭痛，所以建制派私底下傾呢個建議，都唔係無的放矢。

　　另一個啟示係泛民流失中產票源嘅速度係非常可怕。睇返今次票站結果，公屋區敗陣，泛民歸咎於「蛇齋餅稯」都無可厚非，咁中產區你都無理由畀人大幅拋離呱？區內家庭月入中位數達到10萬嘅九龍塘區，票站嘅結果係陳凱欣得票近53%，而阿人只係得42%，呢個結果顯示出，建制派只要培植更多號稱中立、有活力嘅專業人士出選，就已經足夠搶到泛民嘅中產游離票，泛民未來選舉之路真係一片暗淡。

　　話咁快唔使一年就已經係區議會選舉，Tina唔使水晶球都估到，建制派將會大勝而回，呢個就係啟示。