31/08/2018
林鄭見完師弟妹 感嘆「歲月催人老」！
#本土 #特首 #90後 #林鄭月娥 #港大 #學生會特首林鄭成日話好重視青年意見，噚日佢真係身體力行見咗港大學生會……嘅其中一個屬會社會科學學會一班同學仔噃！
林鄭曾做「三蛇」學會時事秘書
唔知大家仲記唔記得，林鄭都係喺港大社會科學學院讀社會學，所以呢班同學仔都可以話係林鄭嘅師弟妹。Jenny就見到林鄭喺Facebook Post咗兩張相，仲話今屆學會同佢「相隔咗整整四十年」！佢仲話，當年自己喺港大讀書嗰時就係呢個俗稱「三蛇」嘅學會做時事秘書，仲感嘆一句「歲月催人老」！
到底傾啲乜？
睇返個Post ，原來林鄭話呢個學會今年成立50周年，所以就搵咗佢做訪問。不過唔知係唔係因為個訪問未出街，所以同班同學仔傾咗啲乜，林鄭就冇講啦！至於學會嗰邊，Jenny都曾經接觸過佢哋㗎，不過唔知係唔係忙緊開學嘅事，截稿前都未有回覆啊！
話時話，Jenny就碌咗下個學會嘅Facebook，發現佢哋都對時事幾熱心，最近嘅取締香港民族黨一事，佢哋亦都轉載咗大專學界批評政府打壓香港民族黨嘅聲明，亦都有爭取真普選、反對一地兩檢咁，唔知佢哋有冇同林鄭反映呢個意見呢？Jenny見相入面，雙方相談甚歡，定今次見面談風月不談政事？
Anyway，今次都係同學仔約林鄭做訪問，唔知林鄭又幾時肯約見八大學生會嘅同學仔，聽吓佢哋對政府嘅意見？