27/11/2018
建制派為陳凱欣甘願做「兵」 齊睇建制「追女」過程
#女神 #選舉 #立法會 #陳凱欣 #兵仔 #將軍 #曖昧九龍西補選一完，之前問極都唔肯認係建制派嘅前食衛局政助陳凱欣，終於肯認自己係建制派喇！建制派都唔知等咗阿欣呢句幾耐！而民建聯主席李慧琼（琼子）仲好興奮咁話，民記隨時歡迎阿欣加入添！Jenny見證住呢一幕一幕，彷彿睇到一名只會遙望女神嘅「兵仔」，終成為「將軍」嘅故事！好勵志吖！
Stage 1 「兵仔」被Friend Zone：
女神：「我一路都同佢冇嘢㗎，希望可以識多啲朋友仔。」、「我同佢呢排行得埋少少，大家可能會咁諗，但係對於我嚟講，外界點樣講都無所謂，最緊要都係做返好自己啫～」
V.S.
阿欣：「我一路都係無加入任何政黨、無黨派，希望搵到不同黨派支持。」、「民主派已經有一個代表，好自然我企喺度大家都會有呢個形容詞，但在我嚟講，外界點樣形容無問題，最緊要做好自己」
Stage 2 曖昧期：
女神：「其實我無刻意話我唔係同佢一齊囉。」
V.S.
阿欣：「其實我無刻意講自己唔係一個建制派。」
Stage 3 確認心意：
「可唔可以叫你做『阿嫂』呀？」
女神：「梗係冇問題啦！」、「識耐咗都覺得同佢幾夾吖！」、「好開心佢認我係佢女朋友！」
V.S.
問：「第時稱呼你做『來自建制派的陳凱欣』都恰可嗎？」
阿欣：「係，冇問題，梗係冇問題啦！」、「我自己嘅理念係同建制派絕對絕對係非常吻合」、「好開心建制派視我為好重要嘅一員！」