過往專欄

　　自從特首林鄭上任以來，係咁強調要改善行政立法關係，仲開設咗每月一次嘅立法會行政長官質詢時間，一次有30分鐘，話多唔多話少唔少，但起碼都叫可以直接回應社會關心嘅事。舉行咗咁多次都相安無事，林鄭同建制派都揸住呢個Point話行政立法關係已經有所改善，不過今日竟然「流產」！人地成日話：「未曾相愛已忘情」好Sad；今日立會個情況，Jenny亦可用一句講完：「未曾質詢已完場」，勁Sad！

陳志全（慢必）畀保安挾走。

Miss Mo掛住嗌 結果被逐O晒咀

　　發生咗咩事呢？原來係因為前幾日民主派嘅朱凱廸報名選鄉郊代表，但就被選舉主任DQ參選資格。民主派批評呢件事係林鄭政府的政治同埋思想審查，就趁住今日林鄭嚟立法會時向佢抗議。民主派就跟喺林鄭身後，一路叫口號一路入會議廳，主席梁君彥就喺警告民主派議員停止叫囂，如果唔係就逐佢哋出會議廳。毛孟靜（Miss Mo）一路掛住叫口號，一路行入位，聽唔到主席講嘢，卒之佢就被第一個逐出去喇！

　　Miss Mo聽到嗰句「毛孟靜議員，請你立即離開會議廳」先至如夢初醒，O晒嘴咁望住主席。主席就冇理，繼續請佢離開。民主派就梗係唔服啦，Miss Mo大叫「Shame on you！」，拒絕離開。又有民主派就提出規程問題，質疑梁君彥未有講清楚警告。

未曾質詢已完場 

　　最後主席又出動保安抬人，仲要暫停會議處理，結果就搞到11:20分先復會，質詢時間都剩返10分鐘，主席就話特首答問時間有限，議員又係咁叫囂，會議都進行唔到，索性宣布行政長官質詢時間結束！

　　特首質詢時間第一次「流產」，建制派就梗係話係示威嘅民主派嘅責任喇；而民主派就話返係因為主席亂咁趕人，呢一個先係主因喎！事後毛姨姨就大呻，嗰陣先入到會廳10秒都冇，根本聽唔到主席講乜，覺得佢隨便趕人出去係「濫權」；主席就話，當時已經警告咗大家唔好叫囂，只係佢哋掛住做自己嘢聽唔到，叫議員自己都應該要「小心啲」。Jenny就覺得，其實公說公有理，婆說婆有理，都係打和啦！Super！

林鄭轉身去下場 出席香港新聞博覽館開幕禮

　　大主席宣布質詢時間結束，Jenny見林鄭頭也不回就行左去，今日仲一身Pink Lady裝束，究竟去邊呢？咪就係香港新聞博覽館個開幕禮囉！早咗10分鐘離開立法會，就唔使好似平日咁趕喇。

「香港新聞博覽館」副主席陳淑薇陪林鄭月娥一齊行個圈睇展品。

　　話說香港新聞博覽館前身係必列啫士街街市，街市被評為三級歷史建築，喺第三期活化歷史建築夥伴計劃項目入面，政府撥咗成8530萬畀新聞教育基金搞活化。經10年籌備，亞洲首間以報業、電台、新媒體發展歷程為題嘅博覽館終於開幕喇，Jenny見入面仲有位置畀大家一嘗做主播滋味添！

　　有媒體日前刊登咗一篇政壇花絮，話今屆立法會同政府關係非常良好，甚至有議席出缺，對立法會運作都完全無影響，議員「多一個都唔多」；更加借住呢個議題，指明年年底立法會選舉可能會大換血，估計有三分一現任議員離任，包括「自然流失」，如資深議員因年齡、黨內交棒退下火線，亦有議員涉及表現等不同因素。文章仲點名三位議員：謝偉俊、蘇長榮同林素蔚。

　　文章一出，立即喺政壇瘋傳。被指「太有個性」、喺現屆議會之中「格格不入」嘅謝偉俊，議會經驗豐富，亦都算得上係稱職嘅議員，對於文章所講，佢四兩撥千斤咁回應一句：「係咪格格都入就好呢？」絕對睇得出佢爐火純青嘅程度。至於蘇同林就被指表現欠佳，兩人都已經親自向其他媒體解釋，Tina都不再詳述。

　　不過呢篇文章亦帶出一個問題，就係來年會有幾多人冧莊繼續做落去呢？Tina亦借機會向多位議員打聽，佢哋有一個睇法係幾一致嘅，就係文章所講嘅「三分一無得連任」應該都係太保守，估計數字遠超三分一。其中一位資深議員分析，香港面臨新形勢、新局面，係極需要新思維，一批舊議員（佢自己都話可能包括佢自己）其實都好可能功成身退，讓路畀新人，將朝氣帶入議會。

有政圈中人認為，香港面臨新形勢、新局面，議會極需要新思維。(iStock)

　　嗰個資深議員仲認為，的確有部分議員喺議會工作上嘅表現同各方期望有落差，特別係部分選委界別議員，「不過又好難怪佢哋，依家每個議題，每個黨都會有固定發言人，涉及一啲行業嘅嘢又有功能組別議員去睇住，選委會界別議員要出位唔容易，太過進取敢言又好易講錯說話，所以唯一敢言嘅江玉歡可以跑得出，市民對佢嘅認知度相信亦係最高，但其他議員要出位真係好困難，做唔到成績，某程度上亦都係『制度』問題。」

　　另一位議員就指出，有部分議員都係當日「臨危受命」上陣參選，本身佢哋工作或者業務就已經繁重，本來對政治地位都無乜特別要求，但要佢哋兼顧咁多議會工作，確實令到佢哋左右做人難，「有唔少議員都私下抱怨，如果要做到『高層』所要求嘅KPI，喺議會要花上唔少時間，呢個係佢哋事先無估計到，所以最少十個八個現任議員都會係因為呢個原因而喺下屆拜拜，如果連同新丁加入競爭，三分一離任實在係太保守！」