陪審團無聊做咩好？ 原來佢地會偷睇……
早前審咗整整70日嘅旺角騷亂案，因為法官命令唔准報道，所以今日先開始有返啲庭上新聞出嚟，點知其中就有單新奇有趣嘅插曲，唔係關於案情，而係關於陪審團噃！
退庭商議時偷偷睇片
今次呢單旺角騷亂案就審咗成70日，雖然審訊期間陪審團有得返屋企，但係一入到去退庭商議嘅階段，佢哋就要「與世隔絕」。今次單案退庭商議咗5日4夜，點知幾位陪審團就被人發現佢哋偷睇電影《雷霆救兵》，同埋其中一名陪審員嘅結婚片噃！估唔到各位陪審員短短幾日就變得咁Friend呀吓！
邊個食「雞翼」及「啤酒」？
據兩位負責看管陪審團嘅傳達員所講，喺退庭商議嘅第4晚，懷疑有陪審員違規帶通訊設備入休息室，仲聽到有女陪審員話要「影張相Post上我哋個Group度」，仲有幾名陪審員喺休息時間喺房入面「圍爐」睇片，期間傳出「雞翼」及「啤酒」呢兩個詞添！
舊式手提DVD機都出埋！
法官大人一聽到梗係覺得「大件事」喇，問完傳達員同埋等控辯雙方討論咗成個下午之後，就決定向陪審團書面查詢一下係咪有啲咁嘅事。唔問猶至可，一問就有成7名陪審員認係睇過其中一名男陪審員嘅結婚片段，同埋電影《雷霆救兵》。聽講係用一部舊式手提DVD機睇嘅。
法官雖然認為咁嘅情況係「不理想」，但係未嚴重到違反陪審員誓言同埋引致裁決不穩妥嘅質疑，所以就冇作進一步調查，只係提醒陪審員要交出身上所有器材，陪審員第二日簽咗封聯名信，通知法庭已經交咗喇。不過Jenny表示你哋真識揀，《雷霆救兵》有成兩個幾三個鐘，Hea時間一流吖！
悶還悶都唔好犯法
大家都知陪審團唔易做，尤其是遇到啲大Case嘅時候，除咗要面對繁複嘅審訊過程，退庭後又要日以繼夜夜以繼日咁討論、討論、再討論，仲要唔可以同外界接觸、冇得用手提電話，好悶㗎嘛！不過Jenny都係第一次聽到有人會帶舊式手提DVD機去開庭，大家如果有機會成為陪審員記住唔好喇！萬一法官大人追究起上來，就手尾長！